Marapa thâtih rohtuhpa NE Parry nata India râh maw
nochhi awnanopa thâtih rohtuhpa Fredrik Downs zy ta Mara nawh cha ama chheipâh
liata chi hropazy nata Viah-nahzy hlâta ama chanôhnah ama za thai via na ama
tah. NE Parry chhochhi ta cha Mara chapawzy ta chanônah mohnao leipa ei ta,
Mara chapaw a lahpinô atuhpa hmô awpa ama sôh kaw na, tahpa ta rei pâ cheingei
ta, chanô nata chapaw likawh a za vei châhna a yna chi he chi sopa (civilized)
chi châ ei ta, he kao lâ tawhta mopa ta cha Marapa he ama vaw civilized kaw na
a tah.
NE Parry nata F Downs zy maniah ama hmô dâh he â
do. Maw nawh ta “Thaibawi” (spelling?) nata “Nuthluai” ama tahpazy he Mara reih
liata eima hneipa ta a lâ vei. A pha kaw. Hehawhta eima chanônah za thaina hro
he Marapasaw ta eima hro khei pazao lymâ awpa a peimawh kaw. Chanônah maohnao
leipa ta, cha-ie chahmy hra leipa ta, ama tovyuh chhu hra leipa ta, kheihhawhpa
rai liata hmahta pakhâ leipa ta, o rai âmo sai pahriasa thlah ha leipa ta,
chanô nata chapaw a za vei châhna chô ta sie lymâ awpa he Khazohpa khozie chhao
a châ hra.
Atahmâno he Taiwan liata y pi ta, eima hlao
pachâpa ta ypâ a hnei thei awpa duahmo liata a duah leipa pi ta. Ypâ a hnei
thei awpa duahmo liata eima ypa chhao ta, ypâ hneipa hlâta keimo ku tlai ta
hria ta, olyu mohhôhpa eima khozie tlao a châ via hri. Eima chhôhkha pôlisi
liata raihriapa he phaohripa ta la leipa ta, alyna ta hmâ awpa ta eimâ chhuah.
Chavâta eima nô ta beih chhoh ta, chysia pasu awpa washing machine lâ khô ta, a
bazaar tyh. Bazaar lâ he a châh ta kei chhao ei zi pâ tyh hra. Eima sawchapawpa
(kô 12-pa) ta washing machine tawhta chysia pachhipa ta a zawh ta, a hi nah ta
loh ta, my pati nie khai tawhta dawh-râ a pasi tyh. Keima ta nohchhô pati nie
khai nata zâ pati nie khai tawhta dawh-râ beihphiah pasi na ta, Pachyhnoh maih
ta o ei hnao tyh.
Hehawhta o rai ei hria tyhpa vâ heta “Thaibawi” ei
châ hawpa ta a pachâ leipa na ta, lahpi-saw kyh a pachâpa, Krizyna kyh liata
pitloh viana lâ a pangai lymâpa, Krista pasaipha tlao ei châ hripa ta ei pahno.
Ei ly kaw.
No comments:
Post a Comment