BOSS PHAPA, BOSS CHHIEPA

(He châpaw he Deiva Mara Daily ta a papua haw)

Eikha cha eima nô Vânoh Nô ta, “Châbu chalei pahâh kaw chi ta, na chalei chiehpa zydua he na reih khai haw?” tahpa ta eina hiahri. Kâchhie pâ kawna chôta, “Y, a chhôh liata khâpa bie ma a y tahpa la ei chalei p’aw nah ta ei moh tyh na” tahpa ta ei chhy. Hehawhta eima nô bie hiahripa heta châbu he a chalei deita pahâ leipa ta a rei chhao a tiama via awpa ei châzie eina pahao kaw. Zâkô November thlapa liata Malaysia râh lâ ei tly nota Kuala Lumpur airport châbu daoh liata châbu sâkha tlai cha ei mo na la kaw ta, a mâ ru kaw hra sa la, châbu chalei nawpa nata papua nawpa châta cha a hnei chhôhpa sôh chhao a i leipa ei châpa hawhta thlai ta ei chalei heih. Robert I Sutton ropa, Good Boss, Bad Boss (New York/Boston: Business Plus, 2010) châ ta, a zydua ta reih khai mâh leipa na ta, ei rei chhôhpa khaihna tawhta eima râh liata hyuhtuhpa/chhihtuhpa rai a hria ngâpazy ta a chu thei awpa eima hneipa thokhazy a chyu tata ei vaw palâsa. Hyutuhpa/Chhihtuhpa reina ta Mongyuh reih “boss” he eimâ hly chy aw.

Chyhsazy ta py ama puasai tita tlyma, ama raihria ngâpa ama bâsai tita tlyma, a puatuhpa nata a rai a bâhpazy a do leina nata thai leinazy y thei hra aw ta, a chhâpa lai kawpa sâkha deikua cha py nata ama raihriana sawhkhâ deparment, company, etc zy ama kho lei vâta châ muarua hlei leipa ta, boss chhiepazy ry liata y ta, hria awpa ama kho khao lei vâta a châ tyh. Hriatuhpazy ta ama boss a pabâ thei awpa duahmo liata a duah mawh ei sa la, boss hluhpi cha pabâpa ama châ aw, tahpa ta he châbu he ta a rei pâ hra.

Râh hmahsiepa nata hneirôpa râhzy liata cha chyhsazy ta ama rai bâsai awpa chi tu hlei veih ei; rai hropa hria awpa a sô leipa vâta. Chavâta ama boss chô liata ama palôh a tlâh vei khiahta nata ama raihriana sawhkhâ department, company nata pyzy ta a do leipa ta ama chô liata hmo ama taopa hawhta ama pahno khiahta cha tlâ ama bâ tyh. Râh riethei sipasa viapazy liata deikua cha rai a sô kawpa vâta, rai bâsaipa châ mawh sa la, lahpi/vahpa-saw niedo awpa a y khao lei awpa pachâpa ta ama boss chô liata amâ ly tu hlei leipa chhaota bâ ngâh leipa ta, tlâ amâ pasai. Hehawhpa duahmo liata cha boss-zy ta ama ry liata hriatuhpazy chô liata a paboss-sa kaw ei ta, ama ry liata hriatuhpazy cha ama chhie nata pha pahnona ta a pasai leipa hmozy chhao taih ta pataosapa ta ama pahriasa raruah thei hra. Pakhona ta, awnanopa chhihtuhpa sawhkhârai hriapa pakha cha, a boss ta phichhyhpa UC (Utilization Certificate) pataosa a chhuah sa la, he awnanopa chhihtuhpa he ta a ngia â ryh thai leipa chhaota, boss a chipa vâta a tao thlah ha thei.

Boss châ ha hnohkua ta cha boss pha chaipa châ a chhuah awpa a châ. Chahawhta boss pha chaipa kaw châ thei nawpa ta, hmo eima tao pasipa nata tao chheipazy tawhta a chu lymâ awpa a peimawh (how to be the best … learn from the worst). Eima tao pasipa nata tao chheipazy ro ta, tao chheihpazy tawhta a chuna châh pahno leipa ta eima taopasi chanei ngâ thlah ha khiahta cha chhihtuhpa a châ tlâh châ leipa pi ta, sa sô liah sô ta cha-ia sa pachâpa, zuneih ki phao ta a phaopazy eima châ aw. Ama hmo tao chheipa â pahno leipazy tlyma, amâ pahno thlah hapa chhaota a palaina ta biepa vâta a ro khoh leipa nata sasyh â tao pathi khoh leipa boss-zy châta eima khakhai chariah lai chaipa cha mo hropa châ leipa ei ta, keimo sasyh tlai he eima vaw châ thlah ha.

Keimo tao chheipa tawhta dei châ leipa ta, mo hropazy tao chheipa tawhta chhaota a chu lymâ awpa a peimawh. Keimo tao chheipa tawhta a chu awpa ta hawh tu tlamaw thei aw ta, mo hropazy tao chheipa tawhta eimâ chu ha khiahta cha a chu patoh via ha aw pi ta, tao chhei thei awpa hmo hluhpi tawhta eimâ boh thei aw. Hehawhta châ awpa ta, châbu zy rei hluh awpa peimawh ta, seminar nata worshop zy a hlao ta, training zy sie lymâ awpa a peimawh hra.

Ry liata hriatuhpazy ta ama boss cha chyhsa dopa nata phapa a châ nata châ lei ama pahnopasia kaw. Boss-zy ta ama ry liata hriatuhpazy cha biehneina chabapa ta tlyma, dâh nata phôh ta tlyma pahnie a chhuah châpa ta, veihseih palôhhâh kawpa ta palôh tlao pahnie a chhuah hri awpa a châ. Ry liata hriatuhpazy palôh pahnie thei nawpa ta, boss cha a hro â do awpa peimawh ta, nie paru â chhuah rai ta a chhuah leipa a châzie ary liata hriatuhpazy ta pahno ta ama hmô awpa peimawh ta, raihria tiamapa a châzie â lâ awpa châ ta, kyhpachâna nata pahno thaina hnei ta ary liata hriatuhpazy chhie noh pha noh pahnokhei thai ta a taokheipa  nata a lykhei thai kawpa a châ awpa a ngiah ta, maihsâh liata a biereipa nata office liata a hmotaopa nata hro chhao â lyu awpa a peimawh.

Boss chhiepa vâta py nata râh a tao thei. Boss chhiepa yna office cha a ziza â hri khoh ngâsâ tyh. Boss phapa yna liata deikua cha office ziza a huapa ta a hu a hno ta, boss nata hriatuhpazy a tlapeipa ta a tlaichhai kaw sai ei ta, hriatuhpazy raihria chybia pahno ei ta, thathyu kawpa ta nata a ly kawpa ta rai hria ei ta, chavâta py, company nata râh hmahsienazy a tlôkhei tyh. Memberzy ta ama puasaipa, ry liata hriatuhpazy ta ama bâsaipa nata ama pabâ khohpa boss châ leipa ta, ama za kawpa nata tlaichhai kawpa, ary liata raihria palôh tlâh a chhih kawpa, hnôh pazi pha ama tah kawpa boss châ awpa he hmo rupa châ vei. Achhuahna tlâ hnei awpa a peimawh.