Marapa nata eima Hlaphôh Phoryhpa

(Mara People and our Poetic Culture)

(He châpaw he Deiva Mara Daily ta a papua haw)

     Marapa he hlaphôh (poem) ta bie a reih tyhpa chi (poetic community) eima za châ. Châropa y hlâ tawh chhaota hla nata phôh zy hmâpa ta bie za reih tyh pi ta eima zâ chho tyh. Chhâreina (genealogy) chhao phôhpa hawhta pahâh kawpa ta saw nata nawhzy eima za chho tyh hra. Chavâta Marapasaw hluhpi ta ama pathlatuhzy chhâ hrawh chhâ kih taih ta ama za reih thei. Hla nata phôh nata chhâreinazy tawhta hlâno Mara chithâtih (history) hluhpi pahno theipa ta ama y.

      Eima missionaryzy kha Marapa kyh la maniah ama pachâ tlai. Mara chhâ zydua liata ama moh lei khao aw vei. Chahawhta Marapa châta ama hrona dâhdei chhao taihta so khâhpa ta hmo phapa hluhpi ama tao nota, ama chakaopa chi nata pho phoryhpa zana nata chhypa kyh liata deikua bâhta amâ phahla pâpa ta â lâ. He vâna heta âmo maochhie muaruana mawh la châ vei. Âmo chhâ liata Mongyuh nawh ta khizaw hropa ama hmô dâh a do khai leipa ama vaw sie khei hrapa tlâ a châ chai. Kha daihti liata cha Mongyuh missionaryzy ta Africa, Asia nata Latin America râhzy liata Krizyh leipa chi nata phozy phoryhpa nata hrozie hluhpizy kha ahripa achhyna chhaichhi hawhta hmô ei ta, chavâta Krizyhpazy châta cha siesai khai awpa ta amâ hnaw. Mara râh liata chhao chahawhta pachupa a châ hra. Chavâta Krizyna ta Marapa hla nata phôh phoryhpa a pahlei daihmâ. Atlia tawhta thyutliazy a kaw hra heihna nata hriapasana vâta Mara hla, Mara lâ nata Mara phoryhpazy kaw thyu heih ta, lei khao hraoh aw vei. Hlâno Mara hla phi dâh nata sa zie zy, siaramo nata pyu ngia hropa zy nata lâzy chhao bâti pachâsa ta, Khazohpa hrohpa achhyna châta hmâ hra awpa kyh liata deikua hmah eima la via awpa a peimawh kaw aw.

Châ nata bie (literature) kyh liata hmahsie laih lymâ nawpa ta, a sa ta sapa hlazy deita phi thlah ha awpa châ leipa ta a rei ta reipa hlaphôh (poem) zy chhao phi lymâ ta papua lymâ awpa a byuhzie pahnopa ta, he rohtuhpa heta kô 1998 liata ei hlaphôhzy lapakhypa,  CHHÔSO RÔS PAW tahpa cha a bu ta ei papua. MTP Hqrs ta papua ta, a chhuh mâ deikua keima ta a tôh khai nahta a zuana mâ zydua chhao MTP ta ama to khai. Bâhta padopa ta hlaphôh thiehpazy baichhi viapa ta kô 2010 liata EI CHHÔSO RÔSPAWZY tahpa ta a bu moh bipa ta bu chyhta ei papua heih. Hezy he Mara hlaphôh a bu ta a pua tua chaipazy ama châpa ta ei pahno. Mara châ nata bie hmahsie viana châta nata Mara chithâtih rona châta hla nata bie keima hlâta a thai via syulyupazy ta a pha viapa nata â ngia viapa hlaphôh hluhpi ama phi lymâ n’awpa nata, a bu cheingei chhaota ama papua lymâ n’awpa châta tha pathyuna nata pathaona châta, ei hlaphôhzy cha a bu ta papuapa châ ta, â chhuahna a hlaotloh kheipa ta ei pahno. Keima hlaphôh châbu papuapa ta a pahaopa ei a châ cheingei leipa chhaota, atahmâhlâ eima thyutliazy hlaphôh phi ta reina kyh liata ama kaw pahâ pathaopa ei hmôpa ta eina palysa kaw. Deiva Mara Thâtihbu ta a kô kha tlohna alyna châta hlaphôh nata Biehrai bievaopa (recitation) areipasuana tao awpa â chhuahna thâtih ei vaw pahnopa ta eina palysa via pachai heih. He daihti liata reipa hlaphôh zydua a bu ta papua cheingeipa châ sa la a pha kaw aw. Marapasawzy châta ryu sôhpa a tloh aw.

Facebook liata thyutliazy ta hlaphôh ama ropazy ei mo tita, a loziezy pha ta, a biezy a ngia ta, machâ reih pha kawpazy hmâh thai kaw sai ei ta, pachupa pha ngaitapa hnei ei ta, rei thadâh â chhih ta, rei a pahâh kaw sai. Cha tlai chu! Mara reih he reih hneirôh ngaitapa châ ta, a sa ta sapa hlazy nata a rei ta reipa hlaphôhzy phi n’awpa châta thlôh ngaita ta â ngia ngaita kaw. Marasawzy chhao hla nah bie liata pahâh kaw pi ta, phi thai kaw pi ta, eima roh thai kaw hra. Chhâzaw râh lâ maniah a siesai hawpa Machâ S Mokia ta “Syna Chhôhno” tahpa hla a phipa zy reih châhta chhochhi la Mara reih tlu ta a ngiapa reih he khizaw liata a y khao hai tlamaw, tah ngâ kaw awpa â phuh. Machâ reihzy he reih a pahneirôsapa châ ei ta, hlaphôh liata eima hmâ leipa khiahta cha hmâ hro nawpa sôh kaw ta, chavâta a lei laih thei. Hlaphôh liata Marasawzy eimâ kaw hra pathaopa heta Mara machâ reihzy chhypa ta pabohsa aw ta, lei khao aw veih ei. Hlaphôh phituhzy baotuh châta machâ reih a kicho kawpa ta a bu ta a papua theipa y ei sa la a phahnai kaw aw.

Mara hlaphôh phi dâh kyh a chyu tata reipakawh via a chhuah sih la. Hla he a sa ta sapa tlyma, a rei ta reipa hlaphôh tlyma rai vaw châ sa la, a bie yzie nata a pachunazy peimwh kaw ta, a aony nata a lozie chhao ama peimawh kaw hra. Cha zydua amâ pôhkha thei n’awpa ta, Mongyuhnah ta “poetic licence” ama tahpa, reih sie dâh tyh leipa ta ro â ngiahna daihtizy y tyh ta, bie pachyuna hmâ â ngiahna su chhao a y tyh hra. Hlâno Mara hla nata bie thokhazy kha zô pha kawpa ta eimâ chu tita, tlâh kha nata tlâh kha azaona liata Mongyuhnah ta “rhyme” (parozie alyupa) nata “meter” (biesâ nata biekawh hmâpa zie alyupa) hmâpa ta ama phi tyhpa ta â lâ. Pakhona ta, tlâh nopa hla, Hlihchhy pawtho kiana hmôlai kô na, a pathli sualua na moh bao u la, liana heta tlâh kha liata biekawh (syllable) sâhrawh chyu y ta, parozie alyupa “na” nata “la” ta â pachhâ raihri. Hla a lâlaoh via chaipa, tlâh thôhpa hlazy liata chhao rhyme nata meter zy hmô theipa ta a y hra. Hao lia lôkâh ti pasoh moh, nâma thângiah ei cha sana, raiti hao hawh ta na a loh, tahpa hla liana heta tlâh kha liata biekawh sâcharie chyu y ta, tlâh khana nata tlâh thôhnazy liata moh nata loh rhyme pha kawpa ta a pachhâ raihri.

Chadei châ vei. Mara reih he reih chanôpa nata reih chapawpa a bao ta hmâ pakaopa â paoh kaw; pakhona ta, lâpi piah-la, chavah chahaoh, thokô râhkô, lyurâh obyuh, khih-liah râhpâh. Chavâta hlâno Mara hla nata hlaphôhzy mo tita biekawh sâpalih pakaoh ta, tlâh kha liata biekawh sâcharie a ypa hlazy ama châ via chai. Achô liata Hao lia lôkâh ti pasoh moh tahpa hla cha a châ. Mara moh hluh via zydua chhao biekawh (syllable) tlyma, biesâ (word) tlyma sâno ta bipa ama châ. Pakhona ta, Hlichhy, Hlyâh. He reih siezie hawhta hlaphôh chhao phi tyhpa châ ta, rei pha kaw ta amâ ngia kaw. Hla tlyma hlaphôh tlyma phi daihti liata biesâ athaona liata (prefix) “a” nata biesâ chhâna liata (suffix) “na” nata “pa” zy he hmâ chyhpa ta a lozie a pha via tyh hra. Pakhona ta, Chô thlapinô khaih phapa ry lia tah châpa ta khaih pha ry lia tahpa ta a lozie a pha via. Bie pachhâ nawpa ta, “a châ” tahpa hluh tupa chhao he a ngia vei. “A châ” tah leipa ta pachhâ dâh hropa hluhpi a y.

Achhâna liata eima rei khohpa cha, Mara chi nata Mara reih he ano y ta a vaw ypa (by chance) châ leipa ta, Khazoh chhâzaw hmochhuah chhôh liata a hlao hra ta, chavâta Mara chi nata Mara reih he pasô ta Krista rônana châta hmâ ta, Marasawzy Krista khozie hawhta hro awpa he Mara Krizyhpazy maophaona a châ. Chavâta, chi nata râh kyh, vâ-iana kyh, hro kyh nata kyh hropazy dei châ leipa ta, Khazohpa nata Krizyna kyh hlaphôhzy chhao phi lymâ ta rei lymâ hra awpa a peimawh kaw. He kyh liata Deiva Mara Thâtihbu zy, Awsichau zy, Siaramo zy, Thlihua zy, Maraland.Net zy nata Mara Facebook group nata website-zy he hmeihseihpa ta keih a chakâ ngâpa châ ei ta, chavâta hehawhpa thâtibuzy, websitezy nata social media groupzy he Marapasawzy ta a lykhei ei sih la, tha eima patlô awpa ei a peimawh kaw.