ATLYNA, ATLYNA

(He châpaw he Deiva Mara Daily liata papua hawpa a châ)

Eima râh liata atlyna a vaw hluh kaw – VC atlyna, MDC atlyna, MLA tlyna, MP atlyna, MTP atlyna, MSO atlyna, MChP atlyna, MJA atlyna, party atlyna, awnanopa (Local, Bia, Presbytery, Assembly, KTP, KNP, KPP, KHP) atlyna. He atlynazy he baukhei kaw sai pi ta, MDC nata MLA atlynazy he eima buakhei chaipazy ama châ, tah sih la rei chhei thlyu aw mapi. MDC nata MLA atlynazy vâta su thokha liata sanawh chhôhkha, viasa rihchâh nata khih kha râh kha zy bie a chho thei khao leipa ta maniah a pa-ysa haw. A pei kaw. A tlia tawhna kha ta ECM nôpawpazy (executive secretary-zy) atlyna chhao eima buakhei pathao hrapa a lyu kaw. He he ta, democracy nata awnanopa kyh liata pitloh awpa hawhta eima pitloh mâh leina khazie rakha ama a palâsa.

Atlyna kyh, kheihhawhpa atlyna rai, liata eima pahno awpa peimawh kawpa cha he he a châ. Vawtuh (voter) ahyrai ta khotlyna ama hnei thei khai awpa a peimawh. Âtawhpa (candidate) zy ta râh, khih nata vaih nata awnanopa châta tao awpa amâ chhuahpa vision rei awpa la a pathaih. Ama tloh thei nawpa ta mopakha nata chhôhkhazy hnohta sôh ta tlyma, sawhkhâ rai ta tlyma, pakiasâh awpa ta tlyma, pasie awpa ta tlyma, contract rai ta tlyma, loan a tlyma zy ta pahnie a chhuahpa deikua pha vei. Hehawhta taopa he sawhkhâ nata Khazohpa mo hmô liata hmo do lei ngaitapa a châ. Vawtuhzy chhaota hehawhpa hmozy he âtawhpazy tawhta eima hnabeiseih awpa châ vei. Eima hnabeiseih khiahta cha sawhkhâ nata Khazohpa mo hmô liata hmo paraona lai ngaitapa a châ aw. Hmo parao khah ei suh u!

Eima hmiata liata atlyna sâno a y aw – India general election (MP atlyna) nata ECM nôpawpazy atlyna. He article he ta ECM nôpawpazy (executive secretary-zy) atlyna kyh â nua vai chai aw. He rohtuhpa he SIM lâta chakaona peimawhpa vâta atakô atlyna liata cha ei moh a hlao awpa châ leipa ta, chavâta columnist ei châna lâ tawhta atakô ta ECM nôpawpazy atlyna kyh rei awpa he a pathaih kaw thlah hapa ta ei pahno. ECM nôpawpazy atlyna he kô thôh padai ta eikha Assembly liata hnei tyhpa châ ta. Atakô (2014) New Siaha liata ECM Assembly he a tly kô a châ heih. Kô hro ta tao tyh dâh hawhta khiahta cha Senior Executive Secretary a tly tua chaipa châ aw ta, Executive Secretary (Education) nata Executive Secretary (Mission) atlynazy ta a pazi aw. Ryhpaoh leina kheihhawhpa vâta a tly thei lei awpazy tah leipata cha, chahnaopa ama châ tawhta kô 15 a hria hawpazy cha ama moh taw (candidate) thei khaipa a châ aw. Ei pahno chhei vei khiahta cha, member âkhophie hlâta a hluhvia vote a hmôpazy cha atlypatlohpa ta phuahpa ama châ aw.

Awnanopa nôpawpazy atlyna kyh liata ahmiatua chai ta pahno awpa peimawhpa cha he he a châ. Party politics siekhei dâh hawhta siekhei awpa châ leipa ta, thlahchhâna chôta Abeipa khopa hia awpa a châ. Khizaw party politics ta awnanopa atlyna liata â chahraoh awpa eima pasai awpa châ vei. A pho nata a hrâ tahpa tlyma, a kao nata a kâh tahpa tlyma, a chi nata a khih tahpazy tlyma pachâ awpa châ hra vei. Pastor a kaw châ hawpa maih cha Maraland pôhpalôhpa he ama vision châ haw ta, Mara râh zydua âkhopa ta kyh ama pachâ khai. Chavâta khih kha tawhta ama tloh khaipa chhaota, chi khapa nata pho khapa tawhta ama tloh khaipa chhaota pachâ pha leipa ta y awpa châ vei. Kô 15 pastor chakaona rai hria haw tawhta cha pitlohpa hawhta pachâ bâ awpa châ ei ta, kô 60 hleipa chhao rai ama hria thei lichih châ thlah ha chy ta, chavâta hawti tupa tlyma, uthei tupa tlyma tahpa chhao a y awpa châ hra vei. Pastor pha kawpa, tiama kawpa nata a piepasai kawpa sai châ ei ta, ahyrai ta tloh ei sa la, ama pha khai thlah ha aw.

Chavâta, atakô ECM nôpawpazy atlyna liata hezy he tao lei awpa a pha. Âtawh (candidate) thei awpa pastorzy ta chyhsa ngiachhiena a haw lai ngâ kaw awpa byuh leipa ta, a line zy â tao ta campaign laih ngâ kaw awpa châ hra vei. Vawtuhzy ta ama kho chaipazy ama vaw awpa tlâ a châ. Machâ nata pastor hropazy (a hria ngâpa nata a pension hawpa) chhaota a line zy tao ta, khokhei viapazy châta campaign laih ngâ kaw awpa byuh hra vei. A pho nata a hrâ tahpa tlyma, a kao nata a kâh tahpa tlyma, a chi nata a khih tahpazy tlyma chhochhi cha awnanopa liata la parosa awpa châ tiah-râh vei. Âtawh (candidate) awpa hropazy tloh leina, pha leina nata hmotao chheipa nata tao tlamawpazy chhao phuah laih ngâ kaw awpa byuh leipa ta, khokhei viapazy phana nata tlohnazy chhao rei lai ngâ kaw awpa byuh hra vei. Eima pastor châ khai ei ta, ama pha khai. Chavâta ahy hmahta rei pachhie tlâ leipa a pha chai.

Hezy he tao thei sih la a pha ngaita kaw aw. Thlah thata chhâ sih la, Khazohpa ta eima palôh liata a vaw palâsapazy moh tlâ ro awpa a châ. A pho nata a hrâ, a kao nata a kâh nata a chi nata a khih tahpazy liata a pabuasa awpa châ leipa ta, Khazohpa ta eima pathipalôh liata a vaw palâsapazy moh tlâ ro awpa a châ. Assembly memberzy, ahyzy tlyma ta ahyzy châta maniah ama campaign khiahta cha, a ua chhao uasua leipa a pha. Chata leipata la chyhsa kyhchhie reina moleina liata eimâ ngia tlamaw aw. Atlypatlohpa maih cha Khazohpa ta kô 3 chhôh châta ECM awnanopa chhihtha awpa ta a raopazy ama châzie a py ta, âmo châta thlahchhâpa ta a phapa ta hria lâh awpa ei a pha chai. Awnanopa nata râh châta hmo thiehpa nata hmo phapa (vision) Abeipa ta a pie thei nawpa ei ta, âmo châta thlah khâ chhâ tyh awpa peimawh ngaita kaw ta, atlohpazy chhaota awnanopa nata râh châta Khazohpa ta vision a pie thei nawpa ei ta thlah thata ama chhâ hra awpa a peimawh.

Atlohpazy ta âmo a vaw leipa hawhta ama pachâpazy chô liata viari thô khona tlyma, khokhei leina tlyma di kha chhao ama hnei awpa châ vei. Khazohpa ta awnanopa nata râh châta â tlypazy ama châna a theina chôta â do kawpa ta nata â kho â ngâh kawpa ta kyhpachâna ta ryurei ta ama chakao awpa a peimawh ngaita kaw.

Achhâna liata cha, pastorzy pi he biatuhpa pastor châ awpa ta Abeipa ta maniah a awpa nata keimo chhaota cha chakaona rai cha hria awpa ta â hlâpazy châ pi ta, chavâta Executive Secretary châta atlypatlohpa eima châ leipa chhaota noza awpa tlyma, hiehâh awpa tlyma, vâsâh awpa tlyma châ vei. Biatuhpa pastor chakaona rai aly ngaitapa nata thathyu ngaitapa ta eima hria pazao thlah ha awpa a châ. Atlypatlohpazy châta chhao a palai nawpa di kha chhao y vei. A maohphaona â sâh kawpa vâta tlao a ngiaroh kaw hri awpa châ ta, nawhna ta Beipa khozie hawhta ama chakao thei nawpa ta Beipa lâta thlah khâ ama chhâ awpa tlao a châ hri. Atakô ECM nôpawpazy atlyne he Khazohpa khozie hawhta eima siekhei thei nawpa ta Khazohpa ta maniah bao se!