Father’s Day Special

Atanoh (15 June 2014) he USA nata râh thokha ta Pawzy Noh (Father’s Day) ama hmâ noh châ ta, pawzy nata paw a kaw awpazy ta he Biehrai ta areipa pawzy maohphaona he a thiehpa ta pahno heih sih la, a hla pathiehna hnei heih sih la, pha kaw aw.

1.     Biepiepa (Biehrawh piepa) sânona (Puasaina 20:4-5; Ryhpachaneina 5:8-9) liata pawzy hmotaopa theilâpa ta sawzy chhâ thôh chhâ palihna taih a tlôthlu thei zie maniah a chho. Chavâta pawzy maohphaona â sâh ngâsâ.

2.     Biepiepa sâpalihna (Puasaiana 20:10; Ryhpachaneina 5:14-15) ta pawzy cha lahpisaw nata ama o liata a ypa chyhsa hropazy nata sahrohzy chô liata chhie lei awpa ta zikyu maniah â râ.

3.     Biepiepa sâchariena nata sâhrawhna zy (Pusaina 20:15, 17) ta chhôhkha pawhrâhpa cha a opa lyuhri hmohneipa nata lapizy uahva lei awpa ta maniah a chho. Chanô hropa lâ mopadei leipa ta lahpinô chô liata ngâchhih awpa.

4.     Chhôhkha pawhrâhpa cha Khazohpa chi ta Khazohpa kho dâh hawhta hrona kyh liata a lahpisawzy a mopâ tlâh châpa ta a hroh awpa a châ (Athaona 6:9; 17:1-7; 26:5; Rypachaneina 6:4-9; Zawsua 24:15; 2 Abeizy 18:3; Ruthi2:12).

5.     A sawzy sona, hrozie phapa nata kuzothaina nata ku raihria zy liata chhitha ta, ano ama paw hrozie amâ mopâ awpa ta a pahao ngâh awpa ei a peimawh (Biesozy 1-9).

6.     Hehawhta a hro thei ha khiata cha a sawzy chô liata hmo chhiepa a patlôsatuhpa châ aw vei. A saw chhâ nawh chhâ riethei tao leipa ta huhiehpa ta ama y aw (Puasaina 20:5; Ryhpachaneina 5:9)

7.     Chhôhkha pawhrahpa cha chhôhkha a ngiahpazy: niedo, o nata lyu, chysia, thohna, etc zy patohpatiapa ta thlahlôhpa ta pa-ysa awpa ta maohphaona a hnei. (Ryureihtuhpazy18:21-25).

8.     Chhôhkha adyhryhna nata a pôhkhana a ngiahtlâh liata â pahnieh. Abeipa liata a sawzy chhorei aw ta (Ryhpachaneina 8:5; 2 Samuel 7:14; Biesozy 13:24; 19:18; 22:15; 23:13-14), hiehahpa ta tlyma, chhiesapa tlyma, sawzy ru pachhôpa deikua a tao awpa châ vei (Ephesi6:4).

9.     A sawzy châta byhna awna chôta thlâ khao â ngia awpa a châ (Athaona Bo 27; Bo 48-49).

Bie pachhâna

Pawzy ta sawzy hmosaipa pha chaipa nata ryu sôh chaipa eima paryupa cha keimo pawzy ta Khazohpa pahno ta china chôta adona nata ngâchhihna ta liahsa eima hro ha awpa he a châ. He he eima maohphaona châ ta, he maohphaona a pahno leipa pawzy vâta khizaw liata saw hluhpi riethei taopa ta nata hro hlaotloh leipa ta ama y. Atahmano ta paw a châ ngâpazy, paw a kaw châ awpazy, eima sawzy ta khizaw liata paw hropa hnei khao aw veih ei. Keimo he paw ama hnei chhôhpa cha eima châ. Chavâta eima sawzy chô liata eima maohpaona eima patlô vei khiahta cha eima sawzy lâthlôh phapa a chhi thei aw veih ei. Atanoh Pawzy Noh (Fathers’ Day) liana he ta paw a châpazy nata a kaw châ awpa zydua eima sawzy chô liata eima maohphaona – Khazohpa pahno ta china chôta adopa nata ngâchhihpa hro ta, eima sawzy Abeipa Bie tiama ta pachu ta, lâthlôh dopa liata achhina eima maohphaona - patlô awpa ta a hlâ heih ei suh u.