TUTE NGE HNAMBIL RILRU PUTE CHU?

(This article was published in The Aizawl Post)

Mi thenkhatin Mizoram chhunga hnam tlem zawk – Mara, Lai, Hmar, Paihte, etc – te hi Mizo nihna rilru ai-in mahni hnambil rilru nei lian zawk leh pu nasa zawk angin an sawi a, an ziak bawk thin. Dikna chen a awm ngei ang le. Mara, Lai, Hmar leh Paihte hnambilte an ni tlat si a. Mahse thuk zawk leh chipchiar zawka kan zir erawh chuan, heng hnam te zawkte ang bawkin hnam lian ber, Duhlian/Lusei tawng hmang, tuna Mizo inti tawhte pawh hi hnambil rilru an lo nei ve thovin a lang. An demawm hranpa lo ve. Duhlian/Lusei tawng hmang hnambil an ni tlat si a. Chuvangin he article-a kan zir tum ber chu hei hi a ni. “Mara, Lai, Hmar, Paihte, etc. ten Mizo nihna-ah za-ah za an in baptis theih lohna chhan hi Duhlian/Lusei tawng hmang Mizo hovin Mizo nihna identity hi an hijack vang a ni lo maw?” tih leh, chutih rualin Mizo nihna-ah kan za-in kan luan za theihna tura hriat tur, thlak tur, tihtur leh awmdan tur thenkhat tarlan kan tum ang a, Mara leh Mizo inkar thu hi chhuibik (case study) atan kan hmang dawn a ni.

Mara-te tobul thawnthu-ah chuan Mara hnam leh Lusei hnamte hi lei puk pakhat atanga lo chhuak an ni a, an lo chhuah ni atangin Mara leh Lusei tih ni-in hnam pahnih, hnam hrana lo chhuak an nihzia tarlan a ni. Hei hian, Lusei leh Mara chu hnam hran ve ve, Lusei chu Lusei a ni a, Mara chu Mara ni mahse, an lo chhuahna chu puk thuhmun a ni a. Thlahtu pakhat atanga lo chhuak, engtik hun leh hmun atang emaw-a hnam pahniha lo inthen an nihzia min zirtir a ni. Lusei tawng leh Mara tawng thumal inang tam tak awm mahse, an in hriat pawlh tawh loh dan atanga thlirin an inthenna pawh a rei thawkhat tawh niin a rinawm. Heng vang hian a ni ang, Mara leh Lai te kha Assam State hnuaia Lushai District huam chhungah dah tel ni mahse, hnam hran an nihna a bo lohna tur leh hnam hran an nihna anga an thanlen chhoh zel theihna turin Regional Council leh a hnu deuhvah Autonomous District Council te thlenga pek an ni ta a ni.

Lusei chu Lusei a ni a, Mara chu Mara a ni, tih kha kalpui dan a nih tlat avang khan, Pu Thanhlira MP nih lai, kum 1954 ah “Lushai District” chu “Mizo District” tia thlak a lo nih khan, “Mizo” tih chuan Mara chu a huam tel tawh lo a ni. “Lushai leh Mara- te hi Mizo i ni dun ang u” tiin Mara-te kha sawm an ni lo chauh ni lovin, an ngaihdan zawh leh hriat tumna pawh a awm lo reng reng a ni. Chuvangin, “Lusei leh Mara chu hnam hran ve ve kan ni a, mahse unau kan ni” tih thin kha, “Mizo leh Mara chu hnam hran ve ve kan ni a, mahse unau kan ni” tih kalphunga thlak a lo ni ta a; Mizo leh Mara tihin a in then hlen ta a ni. “Lushai” tih thin kha “Mizo” tiha thlak a nih hnu ah chuan Mara-te chu Mizo an ni thei tawh lo a ni, Lusei an ni ngai loh avangin. Hei hi Duhlian/Lusei tawng hmangten Mizo identity an “hijack” vawikhatna, hnambil rilru-a thil tih leh tun thlenga nghawng nei zui a lo ni ta a ni.

“Duhlian/Lusei” hnam kha “Mizo” hnam tiha thlak a lo nih hnu pawhin tawng erawh chu “Lushai” tihin hun engemaw chen chhung a la awm rih a. School ah te “Lushai” tawng tiha zir a ni a, Mizo District/Mizoram UT official tawng pawh “Lushai” tiha hriat a la nih rih a. Tin “Mizo” tih chu Zohnahthlakte zawng zawng sawina huapzo hming a nih zia sawina leh ziakte pawh a awm chho zel a. Mara-te pawhin, “Chutiang a ni chuan Mara leh Lusei te hi Mizo kan ni dun ang a, kan official tawng erawh chu ‘Lushai’ a ni tihna a ni mai dawn alawm” ti-in Mizo nihna-ah in identify ve tumna te pawh a awm tan a. Mahse “Lushai” tawng chu “Mizo” tawng tiha thlak a lo nih leh hnu-ah chuan “Mizo” tawng hian Mizo leh Mara chu nghet takin a then hrang ta a ni. Mizo tawng thiam lo, Mizo tawng pai leh Thanga/Thangi hming pu velo Mara-ho chu Mizo an ni thei tawh lo a ni. Hei hi Duhlian/Lusei tawng hmangten Mizo hnam nihna leh Mizo tawng an “hijack” vawihnihna a ni a. Hnambil rilru pu-a thiltih hlauhawm ber leh Zohnathlakte inpumkhatna tichhetu ber a lo ni ta a ni. Hei vang hian a ni ang, Myanmar ramah chuan Duhlian/Lusei tawng hmangte chuan Mizo an inti fal bik a, Zohnathlak dangte insuikhawmna “Chin” ah an inti neitu ve lem lo. Myanmar ramah Mizo engzat chiah nge awm ang, tih chhuina-ah pawh Duhlian/Lusei tawng hmang Mizote chauh chhiar an ni thin.

Duhlian/Lusei groupten hnambil rilru avanga Mizo identity an “hijack” vawithumna leh tun thlenga harsatna siam reng thin chu hei hi a ni. “Enga” tawng hmang leh “Thanga/Thangi” hming pute chu Mizo dik tak (Mizo I)-ah an dah a. “Enga” tawng hmang ve lo leh “Thanga/Thangi” hming pu ve lo Zohnathlak hnam dangte erawh chu Mizo II ah an dah tlat a ni. Shillong vel-ah phei chuan Mizo III pawh an awm tan tawh awm e. Hei vang hian, Myanmar citizen mah ni se, “Enga” tawng hmang a nih a, “Thanga/Thangi” hming pu a nih chuan Mizo dik tak anga en a ni a. Mizoram mi leh sa ngei, mahse “Enga” tawng hmang ve lo leh “Thanga/Thangi” hming pu ve lo Mara leh Zohnahthlak hnam dangte erawh chu Mizo II-ah dah an ni tlat thin.

Hnambil rilru (communal feeling) thu-ah Mara-te ngaihdan, hmuhdan leh tawnhriatah chuan Duhlian/Lusei Mizote hian Mara-te hi Politics ah te, sorkar hna lak thu-ah te, promotion chungchangah te, contract hna pekna kawngah te, zirna lamah te leh kawng dangah te Mara-te chu Duhlian/Lusei Mizo an nih lo avangin, duhsakna an hlawh loh chang awm thin angin an hmu a ni. An hmuh dan hi a dik lo mai thei. Mahse rinhlelh theihna tur awmin an hre tlat thin. A dik deuh a ni mai thei. Chuvangin, Mara-te ngaihdanah chuan anmahni Mara-ho chauh ni lovin, Duhlian/Lusei tawng hmang Mizote pawh hian hnambil rilru an lo nei ve thovin an hmu a ni. Chutiang a nih si chuan, Mizoramah hian hnambil rilru put thu raurau-ah chuan, in kawk tur leh in sawisel tur kan awm chuang lovin a lang; kan inang tlang a, kan hnambil rilru tlang a ni ber mai!

“Mizo” tih hi hmanlaia Chin-Kuki-Lushai (Zohnathlak) hnam zawng zawngte huapzo hnam hming atan hmanga, “Mizo” tiha insuikhawm vek duhna hi thil tha a ni a, thil ropui tak a ni bawk a. Zohnahthlak hnamte kan ropuina tur leh thil kan tih theih zawkna tur pawh a ni ngei ang. Chutiang ni tura kan duh chuan Zohnahthlak tawngte zinga tawng mal pakhat, Duhlian/Lusei tawng, Mizo tawng tiha dah chu a dik thei lo hrim hrim. United Kingdom (UK) chhunga rambil pakhat, England ram tawng English khu UK tawng tihin emaw, British tawng tihin emaw dah tum ta se, Welsh leh Scottish-ho khuan an duh miah lo vang. Hindi pawh hi India tawng (The Indian Language) tia dah tum ni ta se, Telugu te, Tamil te leh Malayali ten an duh miah lo vang. Mara tawng hi Mizo tawng tiin thlak ta ila, Zohnathlak hnam dangten (Duhlian/Lusei tawng hmangte telin) an duh miah lo vang. “Mizo kan ni lo” tihtu pawh an tam ang.

Chutiang bawkin Zohnahthlak tawngte zinga tawng mal pakhat, Duhlian/Lusei tawng chu Mizo tawng tiha thlak a nih avang khan Zohnahthlak hnam dangte tan chuan Mizo nih ve a dik thei tawh lo a ni, Mizo tawng chu an tawng a nih loh avangin. Chuti lo zawng chuan, “Duhlian/Lusei” tawng hi literature lamah hmasawn ber a nih avangin leh, a hmangtu an tam ber avangin Mizoram official tawng leh Zohnahthlak hnam zawng zawng common language atan i hmang ang u” tih a nih erawh chuan, Mizoram chhunga hnam hrang hrangte pawhin an pawm theih a rinawm a. Zohnahthlak hnam dangte pawhin an pawm theih a rinawm a ni. Mizo tawng ti lovin, Lusei tawng tiin an hmang hlawm dawn a ni. Chutiang a nih chuan, Mizo tawng thiam lo leh Mizo tawng pai Mizo an awm tawh lo vang a; Lusei tawng thiam lo leh Lusei tawng pai Mizo erawh chu an awm nual ang. (He article ziaktu pawh hian he article ah hian Lusei tawng a “ziak pai” a awm nual ang.) Hei hi chu a pawi lo. Lusei tawng an thiam loh pawhin, an pai em em pawhin, Mizo dik tak an ni thei reng ang a, Mizo II, Mizo III tihte a awm tawh dawn lo.

“Mizoram chhunga cheng apiang chu Mizo an ni vek” tih emaw, “Mizo ka ni lo ti ho chuan Mizoram chhuahsan mai tur” tia sawite pawh a awm thin. Hei pawh hi belchian dawl lo tawngkam a ni. A nih leh Mizorama awm hlen tawh tur Mizo tawng pai miah lova thiam em em Vai te, Gorkhali te hi Mizo an ni vek tihna em ni ang? Ni love a. India rama chengte hi India-mi chu kan ni vek; mahse Hindi tawng hmang India-mi (Hindustani) erawh kan ni vek lo. Assam State-a cheng mihringte pawh khu Assamese an ni vek lo; Bodo, Karbi, etc. te an awm ve. Bodo-te khu “eng hnam nge in nih?” tiin zawt ta ila, “Assamese kan ni e” an ti lo vang. Assam State mi leh sate chu an ni ngei mai; mahse Assamese erawh an ni lo. Chutiang bawkin Mizorama Zohnahthlak hnam hrang hrangte hi Mizoram mi leh sa an ni vek na-in Lusei tawng hmang Mizo erawh an ni vek lo.

Huapzo Mizo identity-ah chuan Mara-te pawh Lusei tawng hmang Mizo ni lo mahse, Mara tawng hmang Mizo erawh an ni thei ang.  Hetianga kal phungah chuan “Mizo leh Mara” tia thliar hran  pawh a dik thei tawh dawn lo a ni, Mara-te pawh Mizo an ni ve tlat avangin. Lusei tawng hmang Mizo chauh Mizo dik tak ni-a ngaihna identity-ah erawh chuan Mara-te chu Mizo-ah pawm theih an ni dawn lo. Mizoram State mi leh sa (citizens) chu an ni a, Mizo erawh an ni thei tawh lo, Lusei tawng hmang hnam an ni loh avangin. “Lusei leh Mara” tih thin ang khan “Mizo leh Mara” tiin an awm tlat dawn a ni.

“Mizo ka ni lo ti ho chu Mizoram chhuahsan mai tur” tihte phei hi chu history hrechiang lote thusawi a ni a, thupui-hlapuia lak loh a tha ber ang. Heng thu hi thupui hlapuia lak tur a ni dawn chuan, Mara-te pawhin, “Mararam hi Duhlian/Lusei-ram a ni ngai lova, chuvangin chhuahsan tur ram kan nei lo. Duhlianram/Luseiram/Mizoram ah kan awm lo, kan Mararama awm kan ni. Mararam hi Mizoram State atanga chhuak tura min duh erawh chuan le kan chhuak mai ang. Mahni State chhung ngeiah 2^nd class citizen nih ai chuan, a theih chuan Mararam chu Mizoram Sate atanga chhuah law law chu kan duh zawk daih ang chu” tih hi an chhan letna tur chu a ni ang.

Thenkhatin, “Ralte te leh Fanai ten an hnam nihna leh tawngte kalsanin Duhlian/Lusei tawng hmang Mizo an ni vek tawh ang hian, Mara-te pawhin chutiang chuan tih ve mai tur alawm; in tan a tha zawk ang; minority nihte hi thil tha ber a ni lo, in tlem tham si a” an ti thin. Hei hi duhsakna tawngkam a nih chuan a lawmawmah ngai i la. In chimral duhna, Lusei-Mizonization rilru atanga sawi a ni erawh chuan, a lungchhiat thlak hle dawn a ni. Hnambil rilru a lang chiang leh hle tihna a ni ang. Zohnathlak tawng mawi leh tha Ralte tawng leh Fanai tawng te mah an bo tawh a, an ui awm em em nakalai a, Zohnathlak tawng zinga tawng mawi leh hlun pakhat Mara tawng te thlenga a han bo zel tur chu, Mizo dik tak kan nih chuan kan ui em em tur a ni dawn lawm ni? Chuvangin changkang zawk Duhlian/Lusei tawng hmang Mizoten changkang lo zawk Mara tawng angte a bo lohna tur leh a thanlen chhoh zelna tura tan lak pui hi an tih tur hmabak chu a ni zawk tur a ni!

Mizo nihna hi Luseinized Mizo mono culture nih a, Luseinized Mizo uniformed identity neia kalpui kan tum chuan, inpumkhat ahnekin kan in hlat tulh tulh ang. Heng ideology ah chuan Duhlian/Lusei tawng hmangte tan Mizo nih chu thil harsa a ni miah lo. Kalsan tur leh thlak tur an nei lo. An tawng an chhunzawm thei a, an hming invuah dan an chhunzawm thei a, an nunphung (culture) an chhunzawm thei a, an history pawh an chhunzawm thei a ni. Hnam dangte tan erawh chutiang chuan a ni ve thei lo. Kalsan tur leh thlak tur an nei tam a, a bik takin an tawng leh an hnam nunphung leh history te kalsan a ngai ang a, an phal dawn lo a ni.

Uniformed Duhlianized/Luseinized Mizo identity ah chuan Duhlian/Lusei hnam tih chu Mizo tihin lem ralin he khawvelah hian an awm tawh lo vang a, Mara hnam te, Lai hnam te, etc. erawh chu lem ral an duh dawn loh avangin an awm reng thung ang. Chuvangin, chutianga uniformed Duhlianized/Luseinized Mizo identity ni lovin, Naga ho tih dan angin, “Mizo” hi nation-state angin en ta i la, chumi nation-state chhungah chuan hnam chi hrang hrang an awm a ni tih hrechiangin pawm tlang ila, chung hnam chi hrang hrangte chuan an tawng, nunphung leh history-te hmang chhunzawm (preserve) zel bawk sela, Mizo tih hi nihliap (umbrella) anga hmangin “unity in diversity” policy hnuaiah awmho tum ila, kan inpumkhat thei zawkin a rinawm. Chutianga ti tur chuan “Mizo tawng” tih hi “Lusei tawng” tihin kan thlak kir leh a tul ang a, tichuan Lusei tawng chu kan official tawngah kan hmang ang a, a fel vek mai ang. Heta kan tarlan tum hi kan hriatthiama kan pawm duh chuan ‘Mizo’ tih leh ‘Zomi’ tih thu-ah te pawh kan buai lo vang. Zohnahthlak hnamte, tlang rama chengte sawina tawngkam an ni ve ve (synonym tawngkam an ni) tih hriain zalen takin kan hmang ve ve mai ang.

“Mizo tawng” tih hi “Lusei tawng” tiha thlak kir leh kan phal tawh lo a nih erawh chuan, “Mizo’ tih hi Chin-Kuki-Lushai (Zohnathlak) hnam zawng zawng huapzo hming atan hmang tawh lovin, Duhlian/Lusei tawng hmangtute hming thar bik atan hmang law law ila a fuh zawk tawh ang. Hetiang hian hmun tam takah chuan a awm chho tan mek pawhin a lang. Tichuan, Mizo leh Mara, Mizo leh Lai, Mizo leh Hmar, Mizo leh Paihte, etc tiin chiang takin hriat hran kan ni law law tawh ang. Kan duh chuan Mizo te, Mara te, Lai te, Paihte te, Hmar, etc. te min suihkhawm tur hming thar kan zawng ang a, kan hming tharah chuan kan insuihkhawm ang a, Mizo tawng hi, tha kan tih tlan chuan, kan common language atan kan hmang anga hnam lian leh ropui din kan tum dawn a ni.

Chutiang dinhmun kan thleng thei lo a nih erawh chuan, Mizo leh Mara te chu hnam hrang mah ni ila, unau kan nihzia leh State pakhata chengho kan nihzia hre rengin inhmangaih tawn leh inzah tawnin thenawm tha nih chhoh zel tum hi kan hmabak awmchhun chu a ni tawh mai.  Chutianga kan kal chuan hnambil rilru nei anga inpuhna te pawh a reh tawh ang a, hnambil theuh kan ni vek tih hi kan hriat theuh tur, kan pawm theuh tur leh kan kal dan tur a ni tawh ang a. Kan in-an lohnate inhriatpui tawnin kan inpawmsak tawn ang a, kan intawm state tihmasawnna hna te kan thawk ho ang a, kan intlawh tawn ang a, kan inneih pawlh chhunzawm ang a, intawngtai puiin Pathian rawng te kan bawl ho dial dial ang a, tichuan inngainain, thenawm tha leh thian tha kan ni phian zawk daih mai thei a sin!

                                                      Laiu Fachhai