Pakhypi Baona, Chief Guest Baona, etc

 Eima râh liata awnanopa pakhypi nata pakhypa hropazy eima tao dâh a rôhnah kaw bâ. Thokha liata cha eima râh liata chalei awpa a y leipa Ros pawpi zy taih ta sôh a thy nata a sâh ta hryuhpa ta Kolkata lâ zy bietapa ta, a hluh thei chaipa nata â ngia thei chaipa ta, stage kawhna zie padôpa ta ama tawh thei. Pakhypi a patlôtuhpa khih thokha cha a rôhnah thei chaipa hawhta pakhypi pandal nata byuh hropazy tao awpa ta ama hneina ta â daih leipa vâta sawhkhâ baona, a eih pachaipa ta Council baona ama hia awpa â ngiah tyh. NGOzy (MTP, MSO, MChP, etc) chhao ta Council tawhta baona hnabeiseih ei ta, pakhypi noh khih zy liata Chief Guest ta hruapazy tawhta baona hnabeiseih pi ta, maniah ama pie cheingei tyh hra. Hezy he hmahsie viana ma, hnôh a sy viana hri ma tahpa deikua pachâ khi a tloh. Hnôh a sy viana hri ma, eima tahna chhâpa cha sawhkhâ ta pakhypi a patlotuhpa awnanopazy abaona nata NGOzy abaona vâta avyuna (corruption) a pôh thei awpa vâta.

Awnaopa pakhypi baona rei tua chai sih la. Eima hneina nata theina khô lâta pandal (tabernacle) nata ahropazy â ngia thei chaipa nata a rôhnâh thei chaipa hawhta tao eima chhuah khiahta cha pahnie leipa aw pi ta, Council sawhkhâ nata Mizoram sawhkhâ department nanopazy baona hia awpa a byuh aw. sawhkhâ heih hra ta “Pakhypi Baona” tahpa budget liata a hnei leipa vâta, kheih nah kheih ta ma a parai pari laih awpa a byuh aw. Chahawhta sawhkhâ baona eima hiapa nata hmôpazy cha, “Cha khih pakhypi baona châta he zie he piepa a châ; he hmo he taopa a châ” tahpa ta ro theipa a châ vei khiahta cha a hmâna phi chhyh awpa byuh aw ta, pakhona ta “cha khih tlyliah paraihna châta he zie he hmâpa a châ” tahpa zy ta UC (Utilization Certificate) tao ta, tlyliah a paraih rai ta paraih leipa pi kha paraihpa hawhta haipa bie rei ta tao awpa a byuh bâ aw. Cha ta, haipa bie ta pakhypi cha eima hmâh, tahna châ aw ta, Khazohpa palôh a tlâh thei nah chhao ta a ngia vei. A awnanopa chaipa ta eima râh sawhkhâ biehneituhpazy avyuna lâta a pangiasatuhpa châ aw pi ta, a pei ngaita kaw aw.

 ngia kawpa nata a rôhnah thei chaipa hawhta a chhuahnohpa cha a pha. Anodeikua awnanopa hneina sôh nata tao theipa rakha ta taopa a pha chai. A byuh tu leipa nata a leipa ta tao theipa hmozy, pakhona ta Ros-paw mâ rupa hluhpa chaleipa zy, cha chalei leipa nata tao leipa chhao ta pei hria muarua aw vei. Pakhypi châta thyupakhy eihpa, awnanopa sôh hnawh tawhta budget taopa, a hlawhfâhna nata â do kawpa ta sôh eima tluapa nata hmôpa hropzy hmâpa ta pakhypi cha patlô eima chhuah awpa a pha chai. Sawhkhâ department kheihhawhpa tawhta a hlawhfâhna contract tlyma, contractor ahy tlyma tawhta sub-contract tlyma eima hmô khiahta cha a sôh nahta â phuhpa ta rai eima hria awpa a byuh. Vialuh viakhyh pathi ta sôh hluhpi hmô eima chhuah thlah ha awpa châ vei. A rai nahta â phuhpa hlâta sôh hmô hluh viapa he avyuna lai kawpa châ ta, Thlahpa lâ pakhypi tlai ta avyuna sôh ta patlô thlah ha awpa cha byhnâ a y thai nah chhao ta a ngia vei.

MTP, MSO, MChP, etc zy ta Council lâta baona hiapa nata Chief Guest-zy ta baona ama pie tyhpazy lâ a ngia a chhuah bâ sih la. MSO he a pakhona châta hmâh eimâ chhuah aw. Hehawhta MSO lâta baona piepazy he Council budget liata y leipa ta, “MSO Piepa” tahpa ta ro thai awpa a châ lei vâta, achô liata pakhypi baona eima reipa hawhta, kheih nah kheih ta ma parai pari laih awpa a byuh hra ei aw. Chief Guest-zy ta baona ama pie tyhpa chhao he budget liata a y thai leipa hawhta pahnopa a châ hra. Chavâta, âmo sôh tawhta ama pie thlah ha leipa khiahta cha kheih nah kheih ta ma parai pari laih awpa a byuh hra aw. Avyuna a kho lei chai awpa sikuhawtizy tlai ta sawhkhâ biehneituhpazy avyuna lâta pangiasa thei aw pi ta, a pei kaw aw. Chavâta Council lâta baona hia khao leipa ta, Chief Guests-zy ta baona maniah ama pie awpa chhao hnabeiseih khao hra leipa sih la, keimo ta thyupakhy tyh bâ sih la, eima thyupakhy theipa nahta â phuhpa ta program chhao hmâh sih la, eima py chhao a mohhôh sih la, eima râh taopathina liata eimâ hlao hrana châ aw ta, a rôhnah ngaitakaw aw.

Shillong liata Mara sikuhawti 600 hlei y pi ta, chhôhkha ta khih asapa chhao dy kih hlei eima y hra. Hezy he ta MSO châta kô kha châta mopakha ta tlaw 300 chyu eima thyu khiahta cha eima Freshers Social (Shillong liata cha “Annual Conference cum Freshers’ Welcome/Social” eima tah haw bâ) ahmâna châta nata kô chhôh zydua MSO a mohhôhna châta â khi kache ha aw. Cha ta, Council lâ baona hia awpa a ngiah khao leipa aw ta, Chief Guest nata Guest of Honor zy tawhta baona hnabeiseih awpa byuh khao hra aw vei. Su hro lâta MSOzy chhao ta hehawhta ama tao thei khai hra.

Awnanopa nata NGOzy ta eima sawhkhâ zachhihpa he hmo do leipa pataosa khao khah ei suh u!