MUSIC TA ARÂPA: KHAZOHPA A PALYUPALIH AW MA?

(He châpaw he Deiva Mara Daily ta a papua haw)

Atahmâ hlâta eima râh liata chareipakhyna nata ahmânazy liata music a chatlie thei chaipa hawhta tô ta, hla chhao sa khao leipa ta a rôhpa ta nôtloh pawtlôh pizy ta hroh a râ ta a râpa kyh he a pasoh kawpa ta eima pachâ beih tlyma? Eima râh liata Khazohpa achhyna nata chakaona chi nano nanopazy vaw tla tyh ta: lyna sâhpa (Maw reih ta “hlim sang”) nata reih thei leipa zy, camping nata crusade-zy tawhta pachha châ a pahno pasiana pipathina zy, sapa a pielyupa nata hnohsy thlupa zy, Bethel chakaona zy, siphiah/alei liata pao ta kaw thyu heihpa zy, hmopiepa chakaona (ngiapâna chitupa nata o pahypa) zy nata music ta arâpa zy. He ahrana nata chakaona chi nanopazy tawhta a vaw pihpathi hawpa nata a Krizyna hro a kaw pitloh via hawpazy ama y cheingei aw. Chahawhpa hmo phapazy vâta alypa a châ kaw nota, pachâ khi a tlohpa hmo deikua sâkha a y. Hehawhpa ahrana nata chakaona chi nanopazy liata a hlao hawpa nata a hra hawpa hluhpizy hro liata adona nata raihria tiamana hro hmô awpa a y tu leipa hi!

Hlazy Nuhby 150:3-5 liata chiahmie, tlaipi, khoh, totâ nata paotlâzy tô ta, hla nata lâ-zy ta Khazohpa cha reithai awpa a châna kyh eima hmô. Hlazy nuhby 150-na he Haleluiah hla sâkha châ hra ta, “Haleluiah” tahpa yzie cha “Khazohpa cha reihthai teh u” tahna châ ta. Reithai dâh chi hluhpi hry liata, “Haleluiah” heta pakah ta Khazohpa reithaipa â nua via chai. Chahawhta pakah ta Khazohpa reithai tita, a châh ta a bie ta reipa châ ta, a châh ta thlahchhâpa châ ta, a châh ta a hla ta sapa a châ. Pakah ta sapa hla nata a tô ta tôpa musiczy he tâkâ hmia nata hnôh hawh châ ei ta, pachhaih thai awpa châ veih ei; ama sie khoh lymâ. Khazohpa achhyna liata chhochhi cha â pakaoh lymâ.

Chavâta, reithaina hla nata bie y leipa ta, music deita tô ta, tharôh ta a râ thlah hapa cha Khazohpa reithai palyupalihna a tloh hmeihseih nahta a ngia vei; eimâ râ chhôh ta thlahzy thata eima chhâ pâ laih khiahta cha kao nanopa châ sa la. Keimo nata keimo a palypa-uasana tlao a châ via hripa ta â lâ. Â râ ta hroh ta a râ thlah hapa cha lâpa chhao châ khao hra vei. Khoh nata music hropazy a chatlie thei chaipa hawhta tô ta ama sâluh nata hnopôh chhao khâsiana châh pahno khao leina taihta arâpa, achalyupa, luh chhipa nata paopazy he Viah nawh puzâ (puja) achhyna nata Krizy leipa achhyna hropa thokhazy liata ama tao dâh a châ hra. Khizawpa hla a sapa, a châhta Sâtâ baona nata thapatlôna chhao taihta ama hia pâ tyhpa hawhta ama reipa, rock metal music band thokhazy chhaota hehawhna heta ama music a chatlie thei chaipa nata a paro thei chaipa hawhta tôpa ta amâ chachhao chali tyh hra. Hlazy liata “paro theipa to nata lâpazy ta Abeipa reithaipa” deikua he la hehawhta music ta arâpa he â nuapa a châ nahta pangiasa a chhih vei. Pyu ngia chi nanopazy tô ta, yzie hnei kawpa nata pahâ kawpa ta hlasa ta, a lâ chhao lâ pâpa lâchhâh a nua nahta pangiasa â chhih chai.

Chadei châ vei. Music ta a râ daihti nata a khôlâ liata hmo pathaih leipa nata pha leipazy â vaw zie thei. Sahma parina chôta a râpa ama y khiahta cha Khazohpa palyupalihna châ khao leipa aw ta, Khazohpa pasipasawhna lâta â lie thei. Chanô/chapawzy a hnao pâ laih ta dai pâ laih awpa kho vâta a râ a chhuahpazy ama y thei hra. Hehawhta achhuahna a y leipa chhaota a chadie-chahmy tu vâta a hnao pâ laih thei ta, â daih pâ laih thei hra. A kheihhawhpa vâta a châpa chhaota chahawhpa hmo a y khiahta cha Khazohpa achhyna pathaihpa châ thei khao aw vei. A râ daihti (lâ daihti chhao) a vaw rei pâ tu haw khiahta cha Khazohpa a pachâ ngâ thlah ha thei khao leipa aw ta, satlia-laihsa, chyhsa nô nata chyhsa paw zy mo ta, pachâ ta, tlaichhainazy â vaw zie thei heih. Khazohpa achhyna daihti lia tlai ta satlia-laihsa nata chyhsa nô nata chyhsa paw zy a charia ta a chaki liata tlyma a liah liata tlyma lâ khohpa chhao â ngia lei thota apatlana taih a tlôkhei thei. Thapi phia ta reipi tlai a râpa ta chieh-leina ahneipazy paru via thei ta, saw phaopazy ama nawh rao thei ta, a râpa ama hluh kawna liata cha a chhuhdai tlamawna zy y thei aw ta, a pao tlamawpazy y mawh ei sa, tlysaopa ta ama y thei hra. Mokuh sai tupa vâta kahrao riabu a la theipa a châ heih hra. Chareipakhyna o siphiah zy raopa ta a byuh leipa liata sôh pahryuhna a châ thei heih hra. Rei awpa a hluh kaw.

“Thyutliazy ta achhyna o nata chareipakhyna lâzy ngai khao leipa ei ta, chavâta music he thyutliazy sy nawpa châta chhaichhi peimawh kawpa na a châ” tahpa lâ chhâh ta a reihpazy chhao ama y tyh ei aw. Thyutliazy sy nawpa châta music hmâpa he la a pha kaw. Pakhyna daihtizy liata chhao thyutliazy ta music chi nano nanopazy tôpa ta praise & worship daihti hneipa ta maniah siekhei lymâ ei sa la a pha kaw aw. Atlia liata phipa Mara hla thiehpazy chhao fellowship nata album tao nawpazy liata deitata hmâ thlah ha leipa ta, achhyna o apakhynazy liata chhao hmâ lymâ theipa châ sa la a pha kaw aw. Eima pahno awpa deikua cha he he a châ: Music he a râ nawpa châta tô awpa châ leipa ta, hla sa ta Khazohpa reithai nawpa châta tô awpa tlao a châ hri. Music ta a râpa châ leipa ta, awnanopa chhihtuhpa, nôpaw nata ngiapâtuhpazy ta Khazohpa Bie nata eima hro ta thyutlia nata ngiapâ leipazy cha Khazohpa lâ eima sy awpa tlao a châ hri.

“Ama tha liahsa ta a chhâ hana taihta amâ râ tawhta Khazohpa Bie chhopa cha a pahy kaw ei ta, amâ pyh thei ha tyh na” tahpa ta reinazy chhao a y heih. Arâpa nata lâpazy he “Kalvari Eksar” hawhta nata “Kalvari Disco” hawhta a hmâhpazy ama y heih hra ei aw. Buakha thachhâpa vâta a pyh thlah hapazy cha rei a daih aw veih ei. Pahnopasiana vâta Khazohpa cha a py awpa a châ hri. Khazohpa achhyna o nata Khazohpa program ahmâna suzy he eksar la nawpa châta tlyma, apalypauasana nata avâ-iana disco lâ nawpa châta tlyma hmâ awpa châ vei. Khazohpa pasipasawhpa tlao a châ aw. A vai awpa a peimawh kaw.

Philipi 4:8-na liata “â ngiapa ta a pathâhpa maih” tahpa eima hmô. Chahawhta a châ nota Maraland Krizyhpa hluhpi ta music ta arâpa he a ngia ta a pha kawpa hawhta hmô lei p’aw sih la, eima hro ta padi hra leipa sa la, ngiaryh leina eima hnei khiahta cha, achô liata rei hawpa hawhta, he hmo heta a ngia leina nata pha khai leina a hnei vâta a châ thei aw. He vâna heta a châ aw; pakhypi daihtizy liata music ta arâpa â vaw thao nahta zawpi hluhvia amâ di haw tyh.

Music ta arâpa he phahnaina chatlu ta a hnei leipa chhaota, Khazohpa reithaina a tloh hmeihseih leipa chhaota, moleina mawh la châ vei. Rei hawpa hawhta, reipasaona deikua â vaw zie thei. Chavâta a râ awpa khâchâ ngiabâh hawna daihtizy liata cha a rei leipa daihtih chhôh châta taopa châ sa la, chanô nata chapaw a râ nawpazy pananopa châ sa la a pha aw. Khazohpa pachâ thei khao leipa ta a ruathâpa ta eimâ râ thlah ha bâ khiahta tlyma, satlia laihsa, chyhsa nô chyhsa paw pachâna nata hmo hropazy pachânazy tlyma â vaw zie laih thlah ha bâ khiahta cha eimâ râpa nata lâpa thlai bâ ta, o lâ a di ta, Khazohpa hnohta ngiathaina a haw ta, phie a mô hawpa a pha chai thei.

Achhâna liata eima rei khohpa cha he he a châ: A râ leipa ta, music nata hla a pha kawpa ta patla ta, nai zualuapa ta huhno kawpa ta hla sa ta, a khohpazy ta a lâ chhao lâ pâ ta, lâ khiehlô (Maw reih ta lamkual) chhao taih ta, a daihti tata program a pachhâ haw tyh awpa he zawpi a tlâhkhâh chai nawpa, â ngiapa ta a pathâh awpa nata Khazohpa reithai palyupalihna dâh pha chaipa a châpa ta â lâ.