Sa Sô Nga Sô ta Cha-ia Sa Pachâ

(He châpaw he Deiva Mara Daily ta a papua haw)

He Mara bieso, “sa sô nga sô ta cha-ia sa pachâ,” tahpa he hmialâta eima reipahmaoh hawpa, “zuneih ki phao ta phao” tahpa nah kha ta amâ hnia kaw. A pachuna chhao â lyu rô. “Sa sô liah sô ta cha-ia sa pachâpa” tahpa ta chhaota rei tyhpa a châ hra. Hlâno daihti liata cha Marapasawzy ta cha-ia sa he sa nata nga hmeihseihpa hawhta za pachâ veih ei. Râh pua daihti nata chavah sie ti zy ta, sa tlyma nga ama mâh keih vei khiah cha, “cha-iazy chhâ pahao ei suh u” ama tah tyh. “Sa sô nga sô ta cha-ia sa pachâ” tahpa bieso pachuna he a chyu thei chaina hawhta tlâh kha tata rei eimâ chhuah khiahta cha, rao awpa hropa ama y lei vâta a tlâh a châ tu leipazy rao thlah hapa, lâ chhâh a chakhi.

Cha-ia hmâpa ta Mara bieso hropa a y hôlô. “Cha-ia cha a nô a kâ (â sia) lâta a siepa hawhta a saw chhao a kâ (â sia) lâta a sie hra” tahpa bieso ta sawzy cha nôpaw hro hawhta ama hro hra awpa kyh a pachu. Nôpaw amâ do khiah sawzy chhao a do aw ei ta, nôpaw amâ sia khiah sawzy chhao amâ sia hra aw. “Cha-ia sa nie paru thai châ vei” tahpa bieso ta cha-ia sa cha a pyu y leipa ta nie thai’pa châ leipa ta, ama kiahpâh liatahpazy ta cha-ia sa a niepa cha ama pahno thlyu tyhpa hawhta hmo parupa chhao â lâ thlyu tyhzie a pachu hra.

“Ano cha-ia na tlâ â pahao bao” tahpa heta a hro nata â piepasaina tawhta mopa ta chahawhta zawpi vâtlâh châta thapasana a hnei tu hlei leipa ta alâpa, ano nata a chhôhkha phasa nawpa ta politics lâ angiapa, chakaona lâ angiapa, py apaduapa, etc-zy reina a chakhi. “Keimo cha-ia chyu ta eimâ pahao” tahpa ta Krista pachhana kyh liata mo hropa ta chakei pâ theipa châ leipa ta, keimo mopakha ngiapâna chyu liata â pahniezie a pachu. He biesozy he, râh pua tita nata chava chahaoh sao tita, sa nata ngazy cha â kho â ngâh tata a raipa ta o vaw tlôkhei tyhpa châ ta, cha-ia deikua cha a chakeipa ta amâ patu khai ha tyhpa vâta â rai ru kaw ta, a patu chyh ngâsâpa ama y hlei vei khiahta cha ama patupa chyu ta amâ vaw phao thlah ha tyhpa tawhta a vaw puapa a châpa ta â lâ. Cha-iazy ta âmo nata âmo a patu khai haw ei ta, a pua thei thlah ha awpa chhao papuasa thai khao leipa ta ama ypa tawhta a chu awpa eima hnei. Marapasawzy ta keimo nata keimo a isi khai haw sih la eimâ teitâ ha chhyh khiahta cha hmô pha to thei aw mapi. Pua pathla thei aw mapi.

Eima biepipa, “sa sô nga sô ta cha-ia sa pachâ,” tahpa ta a pachuna lâ a ngia pathu via a chhuah bâ sih la. Chhihtuhpa thokha ta a reisina reihkah ta, ama biepipa lâ amâ ngia hlâta, “Kei cha sa sô nga sô ta cha-ia sa pachâpa tlâ châ nahta” tahpa biehmiachhihpa liata ama patai pâ khoh kaw tyh. Châhrasala, he chhihtuhpa he, “Hy, Puhpa Sa sô nga sô ta cha-ia sa pachâpa” tahpa ta aw mawh pi sih la, khoh hlei aw vei. Chavâta chhihtuhpazy ta areisina reihkah châta he bieso hmâ tyhpa he pha chai hlei vei. He bieso hmâ nawpa kao dopa la a y tlai. Chhihtuh hmiatuapazy ta, âmo daihti liata rao hro awpa ama y lei vâta a tlâh ama châ tlyma châ vei tlyma, ama tloh tlyma tloh vei tlyma, a lei thei leipa ta chhihtuhpa ama kaw châna kyh reina châta la â do. Châhrasala, chahawhpa duahmo liata eimâ dua pazao ngâ thlah ha awpa châ vei. Daihti vâropi chhihtuhpa tlyma, rai kheihhawhpa tlyma eima hria ha tawh chhaota sa sô nga sô ta cha-ia sa pachâsapa eima châ ngâ thlah ha khiahta cha, eimâ reisi lâlao cha, a tlâh a châ viapazy kaw pua laih haw bâ ei ta, chavâta a tlâh a châ viapazy ta chhihthana rai ama kaw hria thei nawpa ta a lâpi zy taopa laih bâ ei sih la, a tlei chhao taih ta eima tlei thei khiahta cha khih, vaih, râh nata py kyh a pachâ hmeihseihpa eima tloh aw. Sa sô nga sô ta cha-ia sa pachâpazy kha sa-nga sôh chaipa nata pahâh chaipa lâta eimâ lie ha aw.

Achhâna liata eima rei khohpa cha, atanoh cha sa sô nga sô vâta cha-ia sa pachâpa châ khao leipa ta cha-ia he sa pahâh chaipa nata mâ ru chaipa lâta â lie haw bâ. Chahawhna hra cha ta, keimo chhao eima pathao tua nota a tlâh eima châ tu leipa chhaota, vision eima hnei tu leipa chhaota, raihria chybia eima pahno tu leipa chhaota, a chu laih lymâ ta, sasyh hmah a pasiesa ta, mo hropa nata su hro râh hro lâta ama tao dâhzy tawhta a chu lymâpa ta, chhihtuhpa nata raihriatuh phapa eima kaw châ thei hra.  Chhâ thieh Mara râh heta sa sô nga sô ta cha-ia sa pachâpa chhihtuhpa nata hriatuhpazy a ngiah khao vei. Chahawhpa chhihtuhpa nata raihriatuhzy ama y awpa châ khao hra vei. Chahawhpazy chhihthana ry liata y ngâ thlah ha awpa Mara râh ta hoh khao hra vei. Atanoh Mara râh heta a thaina atlohpa, a pahnona a kawhpa, vision ahneipa, hmo thiehpa nata sie dâh thiehpa a chu lymâ ta a thai lymâpa, veihseih palôhhâhpa, chyhsa dopa, chyhsa siapa, chyhsa ngâchhihpa, chyhsa tiamapa, nata kyhpachâna nata ngiachhihna ahneipa râhsaw phazy a hnei hluh kaw bâ. Chahawhpa chhihtuhpa nata raihriatuhzy ta ama hmotao phapa pazao lymâ aw ei ta, chahawhpa thyutlia chhihtuh nata raihriatuhzy vaw pua via lymâ aw ei ta, eima râh he pha viana lâ a pangai laih lymâ aw.