Ahnei Pahlaopa (Mixed Marriage)

“Ahnei pahlaopa” taha heta chi hropa nata chi hropa ahneipa a chakhi. He rohtuhpa ta keima hrotyhpa (experience) khaihna tawhta eima biepipa he pathlâ rei ei chhuah aw. Eima satlia nota Thomas Paw (Puhpa Pachi Hlychho) ta, “Chi hropa hnei awpa ei chhuah leina chhâpa la Mara khopheih nata vyhhai chô liata ‘Enga?’ ‘What?’ tah ngâ kaw awpa na ei pasai vei” a tah. A reipa hawh tlai ta ano cha Mara zuah tlai hnei ta, a sawnah chhao Marapa châna liata sia kaw ei ta, ama thapasa kaw hra ta, a sawchapawnah chhochhi cha Marapa thapasana nata hmahsiena lâ chhâh châpaw (article) zy roh pathao haw ei ta, thyutliazy hry liata Mara hlaphôh a phi thai chaipa py liata amâ hlao ha bâ hra.

He rohtuhpa chhao he Mara zuah cheingei hnei a vaw chhuah tyh hra na ta, chahawhta ei saduthliepa cha a hlaphôh ta hehawhta ei phi pâ cheingei.

Liah-ri ei â Marazuahnô,

Mara kuzô thai chainô y,

Chyna poh saih, chylyu poh vyh,

Na sapa mah y!

Ei mo ai lei Marazuahnô,

Mara maihtopaw ngianô y,

Na paw ngiazy, Â-uh châta

Pakai khai mah y!

Ei ngiabâh chai Marazuahnô,

Sopavaw ao ngia chainô y,

Nao ao ngia ta Â-uh chhôhso

Patlâh tyh mah y!

Ei reithai chai Marazuahnô,

Lôh soh, lôh vâh, sia chainô y,

Mara râh châ Â-uh nata

Hria khoh tyh suh vy!

Liah-ri ei â, Marazuahnô,

Paw maih di hry di chainô y,

Liah-ri châ â, Â-uh “Mara” he

Chhâ lo khei mah y!

Châhrasala ei saduthliepa hawhta sie thei vei; a lalao laih lymâ. Achuna kaw patlô na ta, Zyhno high school liata ei pachu pathao. Rai ei hria pathao haw tarawpa ta, ei hawti kaw chy thota private siku a châ chypa vâta eima hlao zy chyh ta, a châh ta cha a daihti liata hmô thei tyh leipa pi ta. Chavâta ei lahpi-saw a chyh thei awpa duahmo liata ei duapa ta a pahno mâh leipa na ta dyhchâ ngâh mâh vana. Châ a chu khao leipa satlia pi tlai ta keima nôpawzy ta tlyma, ei lahpinô nôpawzy ta tlyma ta maniah ama chyh thlah ha awpa a nawhtaw kache hapa châ na ta, chavâta keima kuphei ta ei dua thei hlâ via cha dyhchâ a chhuah leipa ei châ. He thota, ei nawhtanahzy amâ chuna kyh liata deichhy awpa byuh heih ta, he he ta dychâ awpa chhao khazie rakha ma a pahawh heih hra. Zyhno liata rai ei hria pathao kô (1979) tawhta ei nawhta nata tusawzy chyh lymâ ei na ta, atanoh taihta eima chyhpa amâ zao thlah ha chy. He he râh, awnanopa nata chhôhkha chakaona sâkha hawhta eima pachâ.

A chyuna lâta reih sih la, Khazohpa awna ei chyh-eipa vâta ei pachutuhpa rai bâsaipa ta Biehrai achuna lâ ei sie. Biehrai a chu ei kaw patlô tawhta chakaona chi nanopa nata su nata râh nanopazy liata chakao laih lymâ na ta, kheih nata kheih ta ma sie ta, ei dyhchâ chhao lalao laih lymâ ta, kô 40 lâ ei kaw hnia thlah ha bâpa cha ei nôpaw, chhôhkha, sanawh nata viasâ rihchâhzy taihta ama pachâ eina rôh khei pathao haw bâ ei. Kô 41 ei khô hlâta dyhchâ cheingei ei chhuah haw bâ. Mara zuah cheingei hnei a vaw chhuah tyh hra sa la, Khazoh sâbu chakhi lei vâta lalao laih lymâ ta, chi hro zuah cha keima châta Khazoh sâbu chakhipa tlao a vaw châ thlah haw. Mara zuah pathlie pathla bâ awpa cha ei palôh a vaw lie pâ kaw ta, he pathliena hlaphôh he ei phi pâ ngâ kaw:

Khazoh sâbu chakhi lei vâ,

Ei saduthlie Marazuahnô,

Hawka zoh ta tlâh hro kiah haw.

Keima chhao cha bôhpi laih tawh,

Ei chôhsu nô, tiriah zuah nah

Hro chhôh châta a kao’pa ta,

Dyhchâ khôpheih ’kiah bâ hra aw.

Mara nôvah a khaihly ta,

Mara lyuhbie zy a hlâ ta,

Mara vyhhai a hua khoh ta,

Châki zoh khoh, sakao khaih lâh,

Ei saduthlie, ramâ pha zy,

Beinô chhô lia my meih chhôh hawh,

Vâ lâ kiah ta ama pai haw.

“Â uh” tah ta, a reihkah pha,

Mara reih ngia, ao thlôh nai kha,

Ei thei châh ta, ’vâ kaw tyh aw.

Khazoh pha ta, Marazuahnô kha,

A motlei paw, a cheidô ri,

A saw a nawh, a saihzaw zy,

Thlaohchhi sa la, hrôhbie mawh sy!

Palôh-liena lâ cha kao nanopa châ chy bâ sa la, chi hropa ei hnei hawpa chhaota ei lahpinô cha ei chhôhkha sanawh, viasa rihchâh nata Marapa tha a pasa hrapa pachâsa cheingei ei chhuah. Chavâta hnei awpa ta ei khopa, Taiwan tawhta Sudan lâ missionary ta a vaw sie hrapa, Laihsa Debbie cha eimâ hnei hlâta hehawhta ei hiahri. “Kei he chhôhkha sipasa rietheipa tawhtahpa châ na ta, chavâta eima chhôhkha sawnawh bao a ngiahpazy bao pazao awpa ta nâ pasaih thei aw ma? Ei chi heih Marapasawzy nata ei Mara râhzy kyhpachâpa ta thapasana a hnei lai kawpa châ na ta, chavâta ei pension chy ta cha Mara râh liata chakao awpa khoh aw na ta, ei pension tawhta Mara râh liata pahrâ pazao awpa ei kho hra aw. Cha dei châ vei. Marapasaw nata Mara râh cha Taiwan zy hawhta a kaw duah pathla mâh leipa pi ta, chavâta Khazohpa nata Mara râhzy ei theina hawhta vaw chakao pakaoh lymâ na ta eima hnei khai tawh chhao ta he he pazao lymâ awpa ei kho. Chavâta chakaona vâta su hro râh hro lâ eima y laih chypa cha kao nanopa châ sa la, Mara râh lei sai ta râh hro lâ, Taiwan râh lâ zy, a paih thai awpa châ va na. Mara râh lâ eina vaw zi thei aw chi ma?”

Laihsa Debbie ta, Ruthi 1:16-na bie hmâpa ta, “Na siena lâ sie aw na ta, na pahrâna su liata pahrâ aw na ta, na chyhsazy ei chyhsazy châ aw ei ta, na Khazoh cha ei Khazoh a châ aw” tahpa ta einâ chhy. Hehawhta einâ chhy theipa vâta aly kaw na ta, hnei awpa ta biechhâna chhao ei tao thei haw. A pathlu thei vei khiahta la kho kaw hra sa la, ei hnei hlei na ta pangiasa va na. Chatanachata 1997 Di thlapa noh 7 nohta Taiwan râh Taipei khihpi liata a hnei pi ta, ano kyh a pachâ ngâsâ thlah hapa a awnanopa sahlaozy ta Âthaona 24:60 bie hmâpa ta, “Eima sietanô, thy sâh hluhpi nô châ la, na pathlazy ta ama chariahpa ku ochhi hnei ei se!” tahpa ta byhnâ ama awpa. Ano chhaota ngiapâtuhpa phapa a châpa hawhta a reipa a patlô lymâ. Râh hneirôhpa nata chhôhkha khihsa theipa tawhta avypa a châpa chhaota keimo chhôhkha riethei sipasapazy maniah mohnao leipa ta, tlao a ngia ta maniah chhie hri ta, chavâta bao chhao â pasai lymâ.

Eima nô Vânoh Nô heta Mara râh chhao a vei kaw hra. Marapasawzy Krista lyuna hro ta hro ta, adona nata ngâchhihnazy pasâhsa ta, eimâ ngiapâna kyh liata pitlohna lâ eima ngai lymâ thei nawpa ta thapasana lai ngaitapa hnei ta, thlah khâ a chhâ tyh. Cha ta, Mara râh khô tho lâ kô 27 tlai vaw chakao haw bâ na ta, Beipa ta â ryh tah sa la, eima chakaona mission nata awnanopazy ta pha ama tah khiahta cha hâhkô (2015) February thlapa, a châ vei khiah, May thlapa tawhta cha eima râh liata chakao bâ awpa khoh na ta, Vânoh Nô chhao ta Mara râh lâ vaw sie hra awpa ta palôh tlâh kawpa ta â pachhuah-panoh lymâ. Eima sawchapawpa Vânoh deikua a viasazy siesai heih awpa â ngiaroh pâ kaw. He ary liata hlaphôh he ta ei chhôhkha nata chi heihzy kyh a pachâ kawpa eima nô Vânoh Nô ei palyupalih:

Khazohpa nah keima vâta,

Na kyhpachâ tiria haosâ

Râh ngiapa nah râh hneirôhpa,

Na tlaichhaipa na nô na paw,

Na heih na nawh, na lôhkhy zy

Lôhhia hra chô siesai khai ta,

Mara râh lâ na vaw zi chi.

Ei châ ly kaw, ei lapinô,

Tiria nohzuah di chainô y!

Riethei dyhchhie, a dôkhâ lei,

Ei chhôhkhazy mohnao lei ta,

Kyhpachâ ta mohôh chi ta;

Marapa chi, ei chi heihzy

Pathlua lei ta, a pyh chi ta;

Khazoh bie sôh hrona biezy,

Na chhôhso tawh miah na chho tyh.

Ei châ ly kaw, ei lapinô,

Tiria haosâ nohzuah di y!

Khazoh chipa nâma vâta,

Ei chhôhkha nah ei chi heih zy,

Vânoh to ta y aw pi ta;

Leidia veipa nâma vâta,

Zo lei hluhpi zo aw ei ta,

Hriapasapa nâma vâta,

Na chhôhnoh ry lôhhrâ tlô ta

Pahrâ aw pi; ei châ ly kaw,

Ei lôhdunô, noh zuah sôh y!

Kyhpachâtuh Khazoh pha ta,

Tlâhna byhnâ cha pie sa la,

Kô hluhpi miah hro lâh mah y!

Sona pietuh Khazoh pha ta,

Sona byhnâ cha pie sa la;

Hro lâthlôh bie miah pachu la,

Bâh lei ta thlah miah chhâpa la,

Khazoh pho tly Marasaw châ,

Byhnâ hnawh miah châpa mah y!

Chi hropa hneipa he a phana kao hluhpi a y hra. Khizaw chyhsa zydua he Khazohpa ta ano a lyupa ta maniah a taopa sai, chyhsa miakhapa (one humanity) eima châna pa-isa ta, Krista liata pôhkha eima châna a palâsa. Lahpinô chhôhkha nata vahpa chhôhkhazy â hnia kawpa ta ama y leipa vâta a hmô chhei tlamawna nata a eichhia tlamawnazy tawhta amâ boh via khoh kaw hra. Eima lahpinô/vahpa phoryhpa phapazy tawhta a chu vei châh awpa hnei pi ta, eima phoryhpa sie dâh pha leipazy chhao hmô theipa ta, pha viana lâta eimâ nano laih thei hra.  

Chahawhta a châ nota, rairuna (challenges) la a y hra. Nôvah likawh azaona (relationship) he azaona kei nao kawpa, paboh awpa ta thata hriapasa awpa chi châ ta, chi hropa nata chi hropa ahneipa liata cha thata hriapasa via awpa â ngiah tyh. Cha leipa chhaota chi hropa nata chi hropa ahneina liata cha sawzy reikah kyh liata bua khoh kaw ei ta, nôvah likawh liata chhao ta phoryhpa (culture) a lyu leina nata reihkahzy vâta a thei chheina nata buana zy a y thei hra. He kao lâ tawhta mopa ta cha chi khapa nata chi khapa, reih khapa nata reih khapa ahneipa thadâh â chhih via. Eima tiehtie lôhhawhpa nata saiso bie zy, eima pahâpa nata pasâhsapa zy nata khizaw eima hmô dâh nata sai dâh zy â lyu via awpa vâta rairuna hluhpi a khôkhâh thei aw. Hehawhta ei reipa vâta, “Vânoh Paw he chi hro zuah ahneipa a ngiapachhi pâ haw bâ khiah maw?” tahpa ta a pachâpa ama y thei aw. A ngiapachhi tiah-râh va na. Ei rei hawpa hawhta, atahmâta eima nô he keima châta Khazoh sâbu chakhipa tlai a châ. Khizaw sie dâh tyhpa nata phoryhpa lâ tawhta saipa ta ei reipa tlao a châ hri.

Mara chapaw ta chi hropa chanô hnei â chhuah khiahta cha a khonô cha Marapa a mohnao leipa nata Mara râh lâ â vy khohpa a châ awpa a peimawh, ano a chapawpa chaipa ta lei â chhuah haw khiahta cha kao nanopa châ sa la. Chi hropa lahpinô ta a hneipazy ta ama lahpinôzy Marapa thapasana pahneisa awpa ta, âmo Mara chapawzy ngiahtlâh liata a maohphaona â pahnieh. A taotia dâh thai ta, a pachyu ta, tlâ a vaw chhi awpa a châ. Chakaona nata raihriazy vâta su hro râh hro lâ y chyna daihti cha kao nanopa châ sa la. Marapa râh hro lâ – Australia, America, etc zy – liata khih a sa haw bâpazy ta chi hropa ama hneipa chhao ta Marapa thapasana palôh ama pahneisa thei thlah ha hra, amâ chhuah khiahta cha. Mara chanô chi hropa ahneipazy chhaota amâ vahpazy cha Mara râh lâ a vaw chhi awpa tlyma, Marapa thapasana pahneisa awpa tlyma a chhuah thei hra ei sa la alypa a châ kaw aw. Châhrasala khizaw phoryhpa hluhvia zydua he lapinô ta vahpa o lâ â ngiapa a châ viarô khaipa vâta Mara chanô chi hropa ahneipazy ta amâ vahpazy Mara râh lâ amâ vaw chhi thei leipa chhao ta pachâ thai awpa peimawh ta, Marapa thapasana chhâ ta ama hnei khiahta cha â daih kaw thlah ha.

Achhâna liata eima rei khohpa cha, khizaw he buah kaw bâ ta, chavâta Marapasaw chhao chi hropa ahneipazy ama y lymâ aw. Chahawhta chi hropa hnei awpa a châ tita, he hmo he pachâ peimawh chai awpa a byuh: Chi hropa hnei awpazy cha Krizyhpa phapa ama châ cheingei awpa a châ. Keimo Krizyhpa phapa châ haw sih la, chi hropa eima hnei awpazy chhao Krizyhpa phapa ama châ haw hra khiahta cha ahnei pahlaopa vâta rairuna a vaw y tyhpazy â pathlâ thei lymâ aw. Chi khapa nata chi khapa ahneipazy chhao ta Khazohpa a chi leipa nôvah la ama bua pyly thlah ha. Chavâta kao kha lâ tawhta pachâpa ta cha Khazohpa a chi leipa chi heihpa hneipa hlâta Khazohpa a chipa chi hropa hneipa tlao a pha via thlah ha thei. Chanôzy cha chi hropa lâ dyh eima pachâ ha tawhta cha amâ vahpa khih nata râh liata ama y awpa chhao pasaih sih la, chapawzy deikua cha chi hropa hnei leih kâ ta Marapa nata Mara râh eima leisai lymâ khiahta cha eima râh nata chi nata pho ta a tao kaw aw. A moh tata châ a thai viapa nata molai hneirô viapazy ta eima râh eima leisai lymâ chhochhi khiahta cha eima râh a pahleipa a lai kaw tahna a châ aw. Chi hropa hnei hra sih la, lei leipata â y thei thlah ha. Lei khah ei suh u!