Hmâ tlâhpa nata Hlaotlohpa Chyhsazy Hro

(He châpaw he Deiva Mara Daily ta a papua haw)

Einstein ta, tao tyhpa tao pazao ngâ thlah hana chôta, theilâ (result) nanopa (pha viapa) hnabeiseihpa he palôh a ki leina ama tahpa cha a châ, tahpa ta a rei. A yzie: Hmo phapa nata theilâ phapa hmô khoh sai pih ta, chahawhta theilâ phapa hmô thei nawpa ta tao awpa nata tao dâhzy y ta, eima tao dâh tyhpa tao pazao lymâpa ta theilâ phapa nata nanopa a pua hlei vei khiahta cha eima tao dâh pa nano awpa a peimawh aw. He he atahmâhlâ Mongyuh reih ta paradigm shift (sie dâh thiehpa) tah ei ta, achhuahna a hlaotloh sa la, theilâ phapa nata nanopazy hmô thei nawpa ta palôh phaozie zy, hmo saizie zy, hmo tao dâh nata raihria dâh zy nata sie dâh zy pananopa ta hmo pachâna thiehpa nata sie dâh thiepa tlua ta hmâpa lâ châh â nua.

Kô 1989 liata, Amerikâh râh liata châthaipa nata company luhpa pakha, Stephen Covey, chhaota, zua hluh chaipa a tlohpa a châbu, The Seven Habits of Highly Effective People (New York: Free Press, 1989) liata, sie dâh thiehpa kyh he a ro heih hra. Hmo kheihhwhpa kyh liata rai, a theilâpa hmô awpa ta a chyhpazy eima palôh phaozie nata hro a peimawh chaizie nata a chyhsapazy ta hmâ tlâhpa eima châ awpa â ngiah chaizie pahnie kawpa ta a ro. Hmâ tlâh châ ta, hlaotlohna to awpa ta chyhsa palôh phaozie nata hro kyh liata peimawhpa sâsari hehawhta a paziah. Reipasiana liana heta keima reipakawh viapa nata baichhipazy ama hlao.

1. Hmah a la tuapa châ a chhuah awpa: Hmâ tlâhpa nata hlaotlohpa châ awpa ta, mo hropazy ta agenda ama tao awpa tlyma, châ a vaw tlô awpa tlyma, bie a vaw y awpa tlyma, ha thlah ha leipa ta, hmo phapa patuapalua ta, hma a la tuapa châ awpa a byuh. Hehawhta hmah thiehpa la tita, hmah lapa a hlao tloh tita deita châ leipa ta, a hlaotloh lei tita chhaota a maohphaona nata maohphyunazy to ngâh awpa a peimawh hra.

2. Pachhâ daihti pachâna chôta pathao awpa: Eima rai tawhta eima pension tita tlyma, eima rai eima bâsai tita tlyma, khizaw eima khô tita tlyma zy ta, eima hrialâhpa, eima chhôhkha sanawh, eima opa lyuhri nata khih kha râh khapazy ta kheihta ma maniah ama vaw rei aw, tahpa pachâna chôta raihria nata hro a thao ta pachhâ awpa a châ. Eima raihria patlô tita a theilâpa eima hmô khopazy chhao pathao daihti liata hmô chhili haw awpa a peimawh.

3. Hmiapasa awpa hmo hmiapasa lymâ awpa: Keimo hro kyh he hmiapasa tua chai awpa cha châ ta, adona, ngâchhihna, pathaihna, kyhpachâna nata tiama hrozy eima hnei vei khiahta cha hmâ tlâhpa nata hlaotlohpa châ thei aw mapi. Chakhai tawhta hmiapasa heih awpa cha theilâ phapa hmô awpa ta tao awpa hmo peimawhpazy châ ei ta, hmo peimawh tu leipazy tlao hmiapasa hri ta, hezy buakheina liata daihti hluh via zydua pahryuh tlamw a nao kaw. Chahawhta a châ lei nawpa ta, hmiapasa awpazy pahnopasia ta, a ro ha ta, chazy cha tao tua lymâ awpa a pha.

4. Pahnietuh châ veichâh awpa: He heta, ahyzy tlyma pha nawpa nata athôh nawpa ta ahyzy tlyma pasasa ta paky awpa châ leipa ta, mo to châta a pha awpa nata mo to palôh a patlâh awpa hmo tao ta, chahawhpa lâ chhâh ta biechhâna chhao tao tyh awpa a châzie â nua. “Chyhsa zydua palôh patlâh khai awpa cha hmo thei leipa bao na” tah ta ahyzy tlyma chari-chamy pâ laih ta sie thlu laih awpa châ leipa ta, chyhsa zydua palôh patlâh khai khâ a chhuah lyhlia awpa tlao a châ hri.

5. Mo hropazy pahno thai a chhuah ha tua ta, chakhai tawhta mo hropazy ta maniah ama pahno thai awpa ta hnabeiseih awpa: He heta, chyhsa ta maniah ama pahno thai awpa khohpa ta hnabeiseih pi ta, keimo deikua ta âmo pahno thai eimâ chhuah leina lâ chhâh a chakhi chai. Hehawhta kaw châ awpa ta keimo pachâna eima rei hlâ nahta eima pachâna maniah a hly khei hra ei se, tahpa palôh eima phao hlâta mo hropazy biereipa nahthlie ha tua ta, ama pachâna, ama hmo sai dâh, ama veipa, amâ lyna, ama palôh pasana, ama nozana, etc zy pahnokhei ha tua awpa a peimawh. Hehawhpa hro heta a chakao veichâhna lâ maniah â ngia khei aw.

6. Apakaoh awpa: He heta py ta hria khohpa (team work) lâ chhâh â nua via chai. Mopakha tlyma, chyhsa chyhta tlyma hlâta chyhsa hluh via thaina, sona, zôthaina, lathli, ku nata pheizy pahlyh pakhy ta, pakaoh ta, raihriapa nata hmotaopa ta hlaotlohna lâthlôh a chhihpa ta theilâ phapa hluh via a papua aw. Py ta chakao khohna a phana lia maih ta hlaotlohna a y tyh. He heta chhihtuhpa ta a ry liata hriatuhazy hnohta a biehneina pachhaih ta (power delegation), rai a pahriasapa lâ chhâh chhao a chakhi hra. Biehneina pachhaih thaina lia maih ta theilâ phapa a pua khoh kaw tyh hra.

7. Tâkô chata awpa: Tâkô maopa cha hmâ tlâh châ vei. Hmâ tlâhpa nata hlaotlohpa châ ta, hmahsiena to awpa ta, sapa, thlahpa nata palôhrupa kyhzy liata eima hnatlâna pha ta hmia eima tôh lymâ awpa a peimawh. Sapa hnatlâ pha awpa ta niedo phapa byuh ta, nie tlahra baw tlahra leipa ta a sohsi awpa peimawh hra ta, raihria kyh liata a chado thai peimawh heih ta, â ngiahpa zie a mô awpa peimawh kaw ta,  mathlai papua awpa ta esasai (exercise) chhao la tyh awpa â ngiah. Thlahpa hnatlâna pha ta, thlahpa kyh liata eima thatlô ta pitloh viana lâ pangai lymâ awpa ta apakhypazi, Biehrai rei ta achuna nata thlahchhâna kyhzy liata eima diathlâ awpa châ leipa ta, apathiehna nata awnanopa parôkarâ (program) chi nanopazy chhao eimâ hlao tyh awpa a peimawh. Thlahpa lâ kyh châbuzy chhao rei hluh awpa a peimawh kaw hra. Palôhrupa kyh liata hnatlâna nata hmahsiena phapa hnei awpa ta, apalypa-uasana pathaihpa chi nanopazy tao tyh ta, viasa richâhzy a charei-chakâ ta, châbu, mekazi, châpaw nata thâtihbu zy rei hluh ta, hmahsiena lâ chhâh achuna theni zy sie ta, chahawhpa parokarâzy a hlao hluh awpa a peimawh kaw hra.

      Achhâna liata eima rei khohpa cha, chyhsa ahy rai hmâ tlâhpa nata hlaotlohpa eima kaw châ thei khai. Achhuana hnei ta, khie achô liata palâsapa hro hawhta hro ta, lôhpi phao awpa tlâ a peimawh. Palôh chyhpa nata achhuahna a hnei leipazy châta theilâpa hmô awpa a sôh kaw. Lôhpi phao ta achhuahna a hneipazy châta cha a daihti liata a theilâpa a vaw pua cheingei tyh.