Krizyna nata Nômâ-Thyukhei

(He châpaw he Deiva Mara Daily ta a papua haw)

N.E. Parry ta a châbu The Lakhers liata Marapasawzy ta nômâ (lapinô mâ) eimâ mâ dâh he khizaw liata nômâ â mâ dâh zydua hry liata a khiakhi (“most complicated”) chaipa châ sala a pangiasa. Â do kaw. He rohtuhpa cheinei chhaota hmahta pahno ru ei tah chaipa hmo sâkha a châ hra khiahta cha a chhôh liata a y leipa (Marapa a châ leipa) khôtho chyhsa châta chhochhi cha pahno rairu kaw awpa hmo a châ tlai. He vâna heta a châ aw; mâ kyh rei awpa daihti liata chyhsa sopa nata hmo a pahno viapazy ama za hrua cheingei tyh. Thyukhei kyh he cha a pahno rairu tu vei. Hmô sôhpa nano nanopazy ama sawchanô nata sietanôzy za pathyukhei tyh ei ta, abei sawchanô thokha cha râh zy taih ama thyukhei tyh. Nô thyukhei chanô thihsôh cha sawchanôzy eih châ ta, a hluh vei khiahta cha sawchanô utheipa ta to khai ta, a dychâna lâ â chei pachhuah laih tyh.

Hlâno Marapasawzy ta cha ama sawchanô dyh ama pachâ tita ama lâ nata si ta hawhta mâ za haw tyh ei ta, ama zâ mâ tyh. Chapaw lâ hneina ta â daih ngâsâ vei khiahta cha a bâh awpa ta a haw ei ta, chanô chhôhkha lâ chhaota ama pachâ thai lymâ tyh. Chahawhta a châ nota, mâ kyh liata a karâ a y kawpa, a bâh awpa kho leipa ta a luh a chaho thlah hapa, ama sawchanôzy cha thih nata sôh a vaw ngia khei awpa deita ta a pachâ thlah hapazy ama za y hra thlyu aw. He hry liata Hlyâh paw nata Leidoh pawzy amâ hlao hra. (Hlyâh nô nata Leidoh nô pahlaopa châ veih ei; hlâno ta cha nôzy mâ kyh reina liata amâ hlao leipa vâta.) Laihsa Hlyâh ta Satlia Hlichhy a vâ-ia ngâsâ thlah hapa chhaota, Satlia Hlichhy kha riethei sipasapa chhôhkha tawhtahpa a châpa vâta, Hlyâh Paw nata, “Hlichhy cha a rupa ma maniah a mâ aw” tah ta dyh hro a pachâ haw.

Leidoh hla tawhta mopa ta Leidoh paw kha Chapi-Ngiaphia kao abei pakha châ sa la pangiasa â chhih. Leidoh cha Khahrieh (Kahrieh Tlâh) khao khôh Chaomâh Rôh-mâh lâta dyh châ ta. Chaomâh Rôh-mâh he Zyhno kao bei a châ thlyu aw. Nohkha cha Sawhmo (Sawhmo Tlâh) chha khô Lyubie Saihthâh (Lyutu) beipa ta Leidoh paw o liata za tlô ta. Chaomâh Rôh-mâh ta Leidoh mâ a mâpa zie ei a hiahri. Leidoh Paw ta paveih pathâhpa ta (Chapi-Ngiaphia reih ta, a ngai a ngâpa ta), “maniah a mâpa chhao y bao vei,” tahpa ta â chhy. Lyubie Saihthâh ta, “keima lâ dyh nama kaw pachâ khiahta cha na tlyhmia liata abôh kô hna zie hao na mâ ei cha mâ aw ei” a tah. Achyuna zie ta reih sih la, sôh nata thih tlaichhai tuna vâta Leidoh cha a paw nata a rih-lâhpazy ta Chaomâh Rôh-mâh tawhta kaw pakuasa ta Lyubie Saihthâh lâta dyh pachâ amâ chhuah haw. Chaomâh Rôh-mâh heta mâ pakua awpa chhao khoh vei.

Chatanachata Leidoh cha sâhpi a bâh ngâpa a sawchanô Phiahzo nata â vahpa kho ngaitapa Kahrieh khao khô Chaomâh Rôh-mâh, a hnazo maihto paw hawhta a ngiapa, a chaichhy thaimâh chaichhy hawhta a pih thaipa, a sâtô châh-rih ao hawhta a hly phapa cha siesai ta, Sawhmo chha khô Lyubie Saihthâh, a hnazô lyuhmi vyhpa, a chaichhai tho châhpi nata a sâtô awh ie tlo lâ cha a kho leina chô ta a pasai ta sie awpa â ngiah haw. Lyubie Saihthâh heta kheih zy, aki azyh zy nata hmo didawhpa hluhpi pahlao pâpa ta “abôh kô hna zie” he a patlohpa hawhta reipa a châ.

Atanoh Krizyna chhâ liata Hlyâh Paw nata Leidoh Paw zy hawhta mâ nata thih kyh liata a karâ a y ngâsâ thlah hapa nata kho hlei khona ta a bie thlah hapazy eima vaw y thlah ha chypa a châ khiahta cha eima Krizyna kyh liata sia khai leina eima hnei vâta a châ thei. Chahawhna hra chata Viah râh kao thokha liata chapaw chhôhkha lâta thyukhei (dowry) hluhpi amâ hnawpa hhawhta atanoh eima râh liata thyukhei hluhpi a hnabeiseihpa Marapa eima y thlah ha chy khiahta cha eima Krizyna kyh liata a pachâ pasia awpa a y tahna a châ hra.

Mâ pahlei awpa cha eima phoryhpa (culture) pahleipa a châ awpa vâta pha vei. Chahawh pyly ta cha-aw chalai papawsa ta eima lâ nata si hlâta â sâh via nômâ hawpa chhao eima phoryhpa (culture) châ hra vei. Nômâ nata thyukhei kyh liata awnanopa ta a chahraohpa ta a bi tu ngâ kawpa chhao awnanopa tao awpa a châpa ta a lâ vei. Awnanopa ta cha mâ nata chhyu kyh liata karâ y tu lei awpa nata khô hlei khô tu lei awpa pachu awpa he a tao awpa a châpa ta â lâ hri. Krizyhpa ahneina liata hmo pha chai awpa ta a lâpa cha, chanô nata chapaw lâ athyupakhy ta azaona kyhchhina pati pahâh kawpa nie khohpa he a châ. Eima lâ nata si cha eima paziahpa chhaota, chahawhta mâ cheingei awpa nata patloh cheingei awpa ta a hnaw lei p’aw sih la, chapaw lâ tawhta ama vaw cheipa mâzie a ly kawpa ta a py lymâpa a pha chai. Thyukhei chhao a rakhapa ta ta thyukhei ta, chapaw chhôhkha lâ chhaota, a chanô pôhpa chaipa eima o lâta â vy haw tawhta cha thyukhei zy cha hnabeiseih ngâ kaw lei p’aw sih la khoh â chhih chai.

Nômâ kyh liata, chhâzaw râh lâ maniah a siesai hawpa, Ngiaphiah bei hnôhchaipa, Abei Mâhhlei (King Mâhhlei) biereipa he pachâ khi a tloh: “Ahnei tita, Nochhi Mara lâ cha abei machhie tahpa y khao leipa ta, â haw tlâ khao leipa ei ta, Notla Mara lâ deikua machhie y khao leipa ei ta abei sai ama châ haw bâ.” Vaili Mahpaw (Lakher Pionner Mission) bia nairu liata Nochhi Mara lâ khie ama Krizyna pata via khiah maw, tah thei nawpa kao a y hôlô. Khichhai chô liata ama phazie zy, ama veihseih palôhhâhzie zy, chhôhkha sawnawh nata khih kha râh kha amâ deichhy phazie zy, a lymâ a y leipa chhaota khitlâh pha nawpa a châ hnohkua cha tahpa ta tlâh rai siah rai kyh liata ama pua phazie zy nata abei machhie ta nômâ haw khao leipa ta nata thyukheizy ama hnabeiseih leizie zy tawhta mopa ta Vaili Mahpaw nata Mahnô, Vaili Paw nata Nô zy palôhtlâhpa ta Paradi liata pakie ngâ kaw ei sala pangiasa â chhih.