SELECTION TEST NATA CHÂ PACHU DÂH

(He châpaw he Deiva Mara Daily liata papua hawpa a châ)

Atakô Maraland liata sikuzy tawhta py hrawh a khôpa (pass-pa) hluh kaw ei ta, alypa a châ hmeihseih. Siku thokha liata cha py hrawh liata moropa (regular) tawhta a ezâhpa zydua ta py hrawh ama khô khai. A ezâhpa zydua ta amâ tâ khai hawna (fail khai hawna) siku a y leipa lyu ta, a ly â chhih via pachai heih. Achuna kyh liata eima hmahsie via lymâpa ta â lâ. Pachutuhpazy hnohta alyna bie thata reih ei suh u!

Chahawhta eimâ ly kaw nota, siku thokhazy liata regular ta a ezâh thei nata thei lei thlie nawpa châta atlyna ezâh (selection test) ama hnei ngâ thlâhpa deikua he pachâ chhie â chhih kaw. Selection test he education dâh ta a pasai leipa hawhpa pahnopa châ ta. Chahawhta a châ khiahta cha, selection test ahnei tyhpa sikuzy he dâh a paraopa hawhta pachâ theipa ama châ. Sikuhawti nata nôpawzy ta he kyh liata reihkah eima pathlie leipa vâta sikuzy he ta selection test he ama hnei pazao lymâpa a lyu.

Selection test he ta achhuahna sâno a hnei ei aw. A sâkhana cha sikuhawtizy chârei tiama via nawpa châta châ thlyu aw ta, a sânona cha a pass-pa hluh ei sa la (pass percentage a sâh sa la) siku moh pha nawpa châta a châpa ta â lâ. Chavâta selection test liata a tloh leipazy cha private candidate ta pa-ezâhsapa ama châ tyh. Regular ta siku a kiah ngâ kawpa, fee zydua a pie khai hawpa, a siku kiana attendance a tloh thlah hapa, siku dâh nata discipline paraopa a hnei leipa tlai ta, selection test eikha hneipa liata a tao pha leipa vâta private ta board pa-ezâhsa thlah hapa cha palôh pasa â chhih hmeihseih.

A siku kiana attendance a tloh leipa tlyma, siku dâh nata discipline a parao hawpa tlyma, fee a pie khai leipa sikuhawtizy tlyma cha siku board ta a ezâh awpa ta a pasai lei thei tlai. Cha leipa sikuhawti zydua cha regular ta board amâ ezâh thei khai awpa a châ. Kôpi kô kha chhôh siku kia ngâ kaw hrapa ta selection test liata hlaotloh leipa vâ deita ta regular ta a ezâh awpa pasai leipa cha sikuhawtizy chyhsapa châna tovyuh (human right) paraopa châ ta, a pei ngaita kaw. Pass percentage (a pass-pa maluh) a sâh ta moh pha awpa kho tu vâta selection test liata a tloh leipa sikuhawtizy nata ama nôpawzy palôh rie pathei ta, ama hmia pachhie ta, sikuhawtizy ama kaw sie laih nawpa (future) parao thlah hapa cha a pei tu haw aw.

Chavâta, education dâh ta a pasai leipa hawhta Maraland liata sikuzy ta selection test he  khao leipa ei sa la a pha kaw aw. Selection test a y leipa chhaota sikuhawtizy chârei patiamasa nawpa lâthlôh hropa â hôh chheih thlah haw.

Châ pachu dâh nata a chu dâh (teaching-learning system) chhao panano bâ awpa a peimawh kaw. Â vao ta avaopa (by-heart system) ta vaw siekhei lymâ pi ta, hehawhta taopa he ta sikuhawtizy thaina, pahnona nata pitlohna hro ama kaw hnei awpa zie kaw pahneisa thei vei. Ezâh khaipa nahta phie ama my khai haw tyh. Sikuhawtizy amâ chupa pahno ta, thai ta, âmo tata ama chhopasia theina taih ta hmah pasiesa awpa he pachutuhpazy maohphaona a châ. A note ta pie thlah ha leipa ta, chhopasia ta ama no pavâh awpa a peimawh.

Mongyuh râh (UK) liata cha sikuhawtizy py 12 ama patlôpa tawhta college/university thlai ta pazao awpa pasaih veih ei. Ama hro pitloh via thei nawpa ta kô kha ama chalihsa tua tyh. He he siku nata university likawh kô (gape year) ama tah. He kô chhôh he y chakhyh thlah ha leipa ta rai kheihhawhpa tlyma ama hria awpa ta hnabeiseihpa nata ahnawpa ama châ. Kenya liata eima y no kha eima mission liata thla thôh tawhta kô kha taih hria awpa ta hehawhta “gape year” sikuhawtizy he vaw tlô tyh ei ta. Kô 15-19 likawh liatapa thyudyu nata thyutliazy châ ei ta, ama kô nahta â phuhpa khô lâta ama pitlohpa ta ei hmô tyh ei. Awnanopa thâtih zy, chakaona thâtih zy, khizaw thâtih zy, hro nata hmo hropa thâtihzy pitloh kawpa ta ei titi-lôhhawh khei thei thlah ha ei cha maw!

Hehawhta ama kaw châ theipa he khâpa hropa vâta châ leipa ta, ama châ a chu dâh (education system) he pachutuhpazy ta note pie ta sikuhawtizy ta cha notezy cha â vao ta avaopa vaw châ thlah ha leipa ta, thai hmeihseih awpa, pahno hmeihseih awpa, âmo tata rairuna pathlâ theipa ta hro pitlohna lâ a chhi theipa pachuna nata achuna dâh ta ama siepa vâta a châ chaipa ta â lâ. Hehawhta pachu dâh nata a chu dâh liata cha pachutuhpa ta note pie ta sikuhawtizy pavaosa ta, cha notezy tawhta ezâhna hiahriana taopa châ thlah ha leipa ta, pachutuhpa cha a chu awpa hmia a pahnosapa (introduction a pietuhpa) deita châ ta, sikuhawtizy ta amâ chu awpa nata thai awpa zydua âmo tata tlua papua ei ta, ama hmô papua awpa nata thai papua awpa tlao a châ hri. Mark hmô pha awpa hlâta thai hmeihseih awpa tlao ama pachâ peimawh via hri.

Hehawhpa pachu dâh nata a chu dâh liata cha siku nata classroom liata pachunpa nata achupa ngala châ leipa ta, khôtho lâta chhao program hluhpi ama hnei khei lymâ. Excursion nata study tour zy hnei lymâ ei ta, chhuti chhôh ta tao awpa project zy chhao sikuhawtizy hnohta ama pie tyh. Music nata sport pachâ peimawh ei ta, music nata sport châta chhaichhi peimawhpa, su a ngiahpa nata full-time pachutuhpazy chhao ama hnei.

Achhâna liata eima rei khohpa cha, châthaina (education) he hro pitlohna lâ maniah a chhituhpa a châ awpa châ ta, chahawhta kaw châ awpa ta, achô liata eima rei hawpa hawhta eima pachu dâh nata a chu dâh panano awpa hluhpi eima hneipa ta â lâ. Â vao ta avaopa (by-heart) system he ta hro pitlohna lâ a chhi hmeihseih thei vei.