(He châpaw he Deiva Mara Daily liata papua hawpa a châ)
Marapasawzy ta eima pho lâ eima
lâ nota eimâ tobi dâh awpa kyh internet nata magazine thokha liata ei ro hawpa
ta pahno na ta. Châhrasala eima tao tyhpa eima tao ngâ thlah hapa vâta, cha ei
article parohpa cha baichhi via heihpa ta atahmâ ei vaw ro heih. He article he
ta chapawzy a tobi dâh â nua via chai.
Sawh lâ eima kia tita nata lâ
hropazy eima lâ ti heta, chapaw nawh cha dua kalâpa a peipa ta tlyma, dua
kalâpa a lyupa eima chaopasy ry chô lâta a saih thlupa ta tlyma a tobi pi ta,
eima chai tawhta achô lâ khâpa hmâh a ky leipa ta, eima sasaihpa ta y pi ta,
eima lâ tyh. A châhta cha eima dua a peipa hra ta eima ziehchhôhpa su chahru
khai thei leipa ta, eima chaopasy-ry zy pua eima palâ khai ha tyh. Thokhazy chaopasy-ry
heih hra ta vaw chha tu leipa ta, eima chapaw châna chhao a vaw hno pâ khai ha
tyh. Eima lâ a ngia ngaitapa nata eima pasô ngaitapazy hehawhta thlahrua
daihmâpa ta chapawzy ta eima lâ thlah ha tyhpa he ta, atahmâ daihti liata a
mohtuhpa thokha châta cha kâchhie â chhih pâ kaw tyh. Chi hropazy châta chhao
mo ngiaryh a chhih tu hra vei. A châhta cha Via nawh ta nâmo lâ la a sexy kaw na, maniah ama tah pâ tyh.
Chapaw nawh thlahrua daihmâpa ta
lâpa he Mahnô-mahpawzy za tao tyhpa Mara phoryhpa (culture) châ vei, tahpa eima sia awpa a peimawh ngaita kaw. Lyu sie
tita tlyma, râh pua tita tlyma, chavah chahaoh lâ sie tita tlyma nata chariah a
dyuh awpa ta hrâ sie tita tlyma la eima mahpawzy kha dua kalâ a peipa ta ama
sasaihpa ta ama za sie tyh tlai thlyu aw. O liata
ama y daihti liata chhao a châhta cha hehawhta ama za y tyh thlyu aw.
Châhrasala, ei paw ta eina za chho dâh nata hlâno ta nohthlahpa thokhazy
y dâh tawhta mopa ta, kyhchhi, sâh ia, chariah ia, abei-machâ a hmaohpakhyna
nata noh peimawhpa hropazy lâ pua daihti liata la, eima mahnôzy kha hnokawpa,
viahhno, chyna poh, sâkâ, etc zy ta â ngia thei chaipa nata a “formal” ngâsâpa
ta a zâ tobi tyh ei ta, eima mahpawzy chhaota ama dua kalâ chô lâta chyna poh
nata chylao poh zy abupa ta, ama sapa palâ rai rai leipa ta ama padih za khuna
taihta ama pohzy cha abupa ta ama za pua tyh. Chyna nata chylao a hnei leipazy
ta thâkao poh nata pohzâhpa (lahypa poh) zy abupa ta ama za pua tyh. Sathaw a
thu ei ta, ama sâ a zei ei ta, ama hrô chhao a pha ngâsâpa nata â ngia thei
chaina hawhta a syhpa ta kyhchhina lâ ama pua tyh. Chahawhna hra cha ta Sawh lâ
kia tita nata lâ hropazy ama za lâ tyh tita chhaota chyna chylao zy chhao heta
ama za lâ tyh hra.
Thluahrua daihmâpa ta lâpa he
eima phoryhpa a châ lei tho ta, atanoh eima khizaw duahmo
nahta eima pachâzie nata hrozie mopa ta, zawpi mo hmô ta tao awpa a ngia lei
ngaitapa hmo a châ. Chadei châ vei. Eima mahpawzy kha thluahrua daihmâpa ta
kheihhawhpa daihti liata ma cha ama za lâh pâ tyhpa chhaota, he eima pho lâzy
he hlâno ta Mara pho lâ châ thlah ha leipa ei ta, atanoh ta eima pho lâ chhao
ama châ hrapa vâta, atanoh ta eima phoryhpa a tobi dâh hawhta a tobipa ta eima
lâ awpa a peimawh kaw. Eima chanônah â ngia thei chaina hawhta ama laki tawhta
ama padi taih a tobipa ta ama lâ ngâ nota chapawnah thluahrua daihmâpa ta a vaw
luah chheih thlah hapa cha eima chanônah ama nohhâh y’pa hawhta y thai khao
vei. Eima chanônah nohhâh taopa ta chapawnah chhao â ngia thei chaipa hawhta
eimâ tobi hra awpa a peimawh kaw.
Chavâta pho lâ eima lâ tita, chapawzy ta chaopasy pasipa a pasy thlah
ha sih la, viapakao chhao a ky sih la, cha chô lâ ta chyna, chylao nata thâkao
pohzy a bu thlu khai sih la, eima hrôtôh a syhpa ta pypi a py sih la, awh hnieh
zy a chhô pâ sih la, a chanô a chapaw ta pheiky a ky khai sih la, eima lâ chhao
a nohhâh y via aw ta, a mohtuhpazy ama kâchhie tlâ khao leipa ta, chhôhhmohpa
ta moh thei bâ aw ei ta, a mo chhao â ngia via syulyu ha aw.
Achhâna liata eima rei khohpa cha, phoryhpa (culture) he a ualua ta a y ngâ thlah hapa (static) châ leipa ta, a nano ta a thla laih lymâpa (dynamic) a châ. Mara a tobi dâh phoryhpa
chhao a ualua ta y ngâ thlah ha leipa ta â thla laih lymâ hra. Mahnô-mahpaw
daihti no kha chapaw nawh thluahrua daihmâpa ta râh puapa ta hrâ za sie tyh hra
ei sa la, chahawhta eima tao leina a rei haw bâ. Chavâta reih chanei heih sa
la, pho lâ eima lâ tita chapawnah thluahrua daihmâpa ta eima lâ thlah hapa he mahnô-mahpaw
tao dâh châ hlei leipa ta, eima phoryhpa (culture)
a kaw sie lymâ awpa châta pha hra vei. A ngia thei chaina hawhta tlao a tobipa
ta lâh bâ hri bei suh u!
No comments:
Post a Comment