A Chai Mara Râh

Lôhhrâ tlô chai, khizaw vâtei râh zydua hry,

Chhaohlei pathei, sa to laihna kaongâh râh pha;

Opi pazawh, viahsi kaw tlô, sa luh zâ ngiah,

Piahphawh chô lia lôhhia lei ta niedoh zaolao.

Thlalôh chhih chai, khizaw vâtei râh zydua hry,

Vâ saw thlôhchho, râh saw phazy laihna râh hlô;

Noh pha tlâh khô, thla thieh dieh ta ‘sicharu luah,

Khôpheih chô lia ramâ khaih ta pahnawh zaolao.

Ngiaryh chhih chai, khizaw vâtei râh zydua hry,

Marazuahnô pawmaihdizy lôhdu râh ngia;

Tlâhpadâ pha thlihua nai hry chôthlapi khaih,

Lyubie paru hlâ diah lei ta a kao zaolao.

Lyna ki chai, khizaw vâtei râh zydua hry,

Paw to pakai, sopavawzy lyna râh pha;

Haosai to ki, lyna kyhchhi, pakhypi hmâh,

Mara hla ngia pyu diah lei ta pathli zaolao.