ACCIDENT, ACCIDENT

(He châpaw he Deiva Mara Daily liata papua hawpa a châ)

Accident (apiepasipa) he mosiapa chô liata tlô thei ta, moleipa chô liata chhao a tlô thei hra. Accident a patlôsa theipa hmo hluhpi a y: Nie tlamaw do tlamawpa zy; a tai a hlua tlamawpa zy; a chhuh a dai tlamawpa zy; â sâhpa tawhta tla tlamawpa zy; a ka tlamawpa nata bomb a papua thlu tlamawpa zy; mawtaw, zawtheina, balyh nata rail accident zy nata accident hropazy. Chyhsa thokha ta thi daihti a tlô haw khiahta cha accident leipa chhaota thina a tlô pyly thlah ha bao na, ama tah. Hehe â dona kao a y thei. Châhrasala a do khai vei. Niedo phapa nata niedo dâh thaipa vâta nata dawhty nata thohnazy vâta chyhsa hnatlâna pha via laih ta hro chhao a pasi via laihzie pahno khaipa a châ. Chahawhna hra ta, avaina chi nanopa nata phapazy vâta accident hluhpi chhao â khôkhâh theizie khizaw ta pahnopa a châ hra. He article liana heta eima râh ta â tyh hluh chaipa mawtaw accident tawhta avaina kyh rei eimâ chhuah aw.

Hezy he mawtaw accident a patlôsa theipazy ama châ: Lâthlôh chhiepa, buahpa, âpakopa, chutla chakhâ tupa, pahnia tupa nata laikathi lâta pakhâna y leipa vâta zy; mawtaw duahmo pha leipa vâta zy; hmo a hri tupa nata chyhsa hluh tu phaopa vâta zy; mawtaw haoh chatlie tupa nata side la leipa vâta zy; lâko nata â ryhpaoh leina liata mawtaw hropa chhao âchhuahpa vâta zy; a para tupa vâta zy; driver tla-uapa nata amôpa vâta zy (he he riethei tuna vâta a châ via chai); driver sahma/thohna paripa vâta zy; driver ta mawtaw haoh ngâna chôta mobile phone a hmâpa vâta zy; driver ta laihsa/satlia chaku pâna chôta a haohpa vâta zy; driver a sao a mâ leina (mawtaw haoh thai hmeihseih leina) vâta zy; mawtaw hropa liata driver su leina vâta zy nata laikachha lâ tawhta alô ahluahpa nata tho atleipazy vâta.

Lâthlôh chhiepa, buahpa, âpakopa, chutla chakhâ tupa, pahnia tupa nata laikathi lâta pakhâna y leipa vâzy ta accident atyhna he reih pakawh tua chai sih la. He hawhta a châna chhâpa he lâthlôh tao nawpa ta sôh sanction-pa (budget) chyh tu vâta châ thei aw ta, âkhipa ta sanction-pa a châ thlah hapa chhao ta contractor, engineer nata sôh lâ chhâh mohhôh tuhpazy nieparu tuna vâta a châ nawpa hawhta tao leipa chhao a châ thei hra. RTI hmâpa ta pasia leipa ta cha khazie tlai ma sawhkhâ ta “he lâthlôh” tao nawpa ta a hmâ haw tahpa pahno theipa châ aw vei. Eima râh lâthlôh hluhvia zydua laikathi lâ pâdawh kawpa lâthlôh châ via khai rô ei ta, chavâta concrete ta tlyma, thua tlai/phia ta tlyma mawtaw a hlua pakhâna tao cheingei awpa châ ta, he châna heta sanction (budget) liata pahlao pâ cheingei awpa a châ. Nochhi Mara râh lâta âmo khihsawzy phahnai angiahna vâta ama private sôh ta lâthlôh ama chaopazy cha chahawhta lâthlôh pha hmeihseihpa a kaw châ thei mâh leipa chhao ta pahno thai â chhih kaw. Notla Mara râh liata atanoh taihta lâthlôh phapa eima hnei thei mâh leipa deikua he pachâ khi a tloh.

Mawtaw duahmo pha leipa vâta accident chhao a y tyh. Sôh pachâpa vâta tlyma, chyhsazy peimawh tuna vâta tlyma mawtaw duahmo pha tu leipa chhao ta pasiesa raruahna daihti a y tyh. Hehe tao awpa châ vei. Mawtaw duahmo pha leipa cha a pasie rai ta pasiesa awpa châ vei. Mawtaw he a daihti ta liata pamosa (service) leipa a châ khiahta cha a rao chatlie laih lymâ. Reipasipasuapa thlai ta pataosa hawpa a châ vei khiahta cha rao chatlie via laih ta, haohtuhpa nata kiahtuhpazy châta chi â chhih ngâsâ thlah ha. Chavâta he kyh liata mawtaw hneituhpa nata driverzy ta tiama papua via ei sa la, transport department lâta chakhieh-charieh via ei sa la, accident hluhpi khôkhâh theipa a châ aw.

Hmo a hri tupa nata chyhsa hluh tu phaopa vâta accident a tlô hluh kaw hra. Pick-up, 407, tipper nata truck zy he chyhsa phao nawpa ta taopa châ leipa ei ta, hmo phao nawpa ta taopa ama châ. Hmo phao tita chhao, ama phao thei awpa âhrina limit a y khai. Chavâta mawtaw ataotuhpa company nata sawhkhâ ta âhrina limit ama taopa khô leipa a pha chai. Chyhsapa he eimâ hri hmâ kaw. Chavâta chyhsa phao hlu tuhpa chhochhi chi â chhih ngâsâ thlah ha. He kyh liata transport department ta Pick-up, 407, tipper, sumo, etc zy ta chyhsa ama phao theina ziepa a bi tu ei sala, chacha zi thei khai sih la, eimâ bohna a châ aw. Mawtaw haoh chatliesa tu leipa ta, a para leipa ta, a daihti bitaihpa liata tlô hmâ awpa ta, tlâ a thao patoh via awpa a châ. A rei tu mawtaw haohpa chhao pha hra vei. Noh-y nata zâcho taih haoh châpa ta lâthlôh liata tlao a rie hripa ta accident hluhpi â khôkhâh thei aw. Mawtaw hneituhpazy ta ama driverzy rie pathei tu leipa ei sa la, driverzy ama pahniena rakha ta pahriasa awpa ei a peimawh ngaita kaw.

Hezy leipa ta achô liata eima paziahpa, accident a y tyhna chhâpa hropa zydua khi cha driver ku liata â pahnieh lai chai. Driverzy ta a sohsi kawpa ta ama haoh khiahta cha accident hluhpi â khôkhâh thei aw.

Laiu Fachhai (Email: fachhais.in.africa@hotmail.com)