ZUNEIH KI PHAO TA PHAO

(He châpaw he Deiva Mara Daily liata papua hawpa a châ)

 “Zuneih ki phao ta phao” (a châh ta “sasu-zuneih ki phao ta phao”) tahpa Mara bieso he, tovyuh nata châna eimâ pachâ papha leipa topa nata piepa hawhta eimâ pahno tita a panawhna reihkâh châta hmâ tyhpa a châ. Khi kha liata awnanopa chhihtuhpa pakha cha a daihti hneina châhki ta he bie he biehmia châta reih tyh thlyu aw ta, ano ta daihti a vaw châ nahta satlianah ta a “zuneih ki phao kyh avaw reih heih aw lah y” tah tyh ei ta, he satlianah chhochhilina bie he a vaw tlô thlah ha tyh thlyu aw. He bieso he zuneihpa, a kiphao pha ta a rôh ngâsâ thlah hapa, châhrasala a kiphao cha a hmâ awpa hawhta hmâ thai leipa ta nata hmâ thei leipa ta chakeih nata sahrâh hropazy â pasiesa thlah ha tyhna tawhta a vaw puapa châ sala pangiasa â chhih. Ramawh thih â to kawpa liata a chatlie thei chaipa hawhta â râ awpa a ki ta pakhâ haw ta, chavâta sahrâhpazy ta nao tata ama sie theipa, ano kiphao cheingei ta ano a paraotuhpa lâta â lie theina lâ chhâh reina a chakhi thei hra.

“Zuneih ki phao ta phao” tahpa he achô laita reipa hawhta, kao kha lâ liata cha a reisina reihkah châ ta, kao hropa liata deikua cha a raihria a pahnie leipazy reipasipasuana châta hmâpa a châ heih hra. Châna (position) ta â chakaihpa nata â hnawpa raizy a phapa ta hria thei awpa ta veihseih palôhhâhna, thaina, tlohna (qualification) nata hohna a hnei leipazy chô liata palôhtlâh leina palâsana ta, “a châna nata a maohphaona â sâh thlâ bao nahta, châhrasala a pahnie vei hao tlyma; zuneih ki phao ta tlâ a phao hao” tah tyhpa a châ hra. Pahnie lei awpa tovyu kho kawna nata a chhuhraopa kyh reina châta “Zuby masiah phei a pahawh ta a pahawh” tahpa Mara bieso chhao a y heih hra. Râhsazy ta masiah sahaw hmô ei ta, zuby ta, “Kei a phei” tahpa ta â pahawh tua chai. Chatanachata, masiah sa cha pachhaih ei ta a rai ei ta, ama phao thei awpa rakha a pahawhpazy cha masiah sa o ama tlôkhei khai. Zuby deikua cha phao cha rei lei ta, masiah phei cha a papie dâhdei chhao papie thei leipa ta, a chhâ a chhâna lâta cha a ku ruapa ta o a tlô bâ, ama tah.

Zuneihpa ta a kiphao a hmâ phahnai chaina cha a paw â lai daihti liata a zuneih heihpazy chô liata a châ. Zuneihpa nata zuneihpa amâ tu tita a tlô viapa ta a kiphao hmâpa ta a tlô lei viapa pavyh nata a pôhpa su hropazy chaphiepa ta a thie thei. Chavâta “zuneih ki phao ta phao” tahpa heta, ama biehneina khihtlâh, râh nata py hmahsie nawpa lâ hlâta âmo phasa nawpa ta a hmâh viapazy nata ama hrialâhpazy nata âmo dyuchhai liata a kaw tyuh thei awpa duahmo liata a ypazy teina châta a hmâh thai viapazy hro a chakhi thei hra. Zuneihpa nata zuneihpa a tuna liata ama ki nata ki a chakhi tlamaw khiahta cha phia thai khao leipa ta ama panoh ta kâhmapa ta thi thei aw ei ta, sahrâhpazy ta a chiehpa ta ama nie thei hra aw. He he ta maniah a pachupa cha, Marapa nata Marapa eimâ dyuh haw khiahta cha hmia tôh thai leipa aw pi ta, “awpanô cha, sahawh pahnei” tahpa hawhta, chi hropazy alyna nata chi hropazy ta maniah ama pahniena a châ aw.

Atlia liata Mizoram Governor Siaha a kaw tly nona kha Deiva thâtihbu hiahrina achhypa ta, “Mara râh cha Autonomous District Council biehneina lai ngaitapa piepa châ haw ei chi ta, nama vâhnei hmeihseih na” tahpa ta a reipa hawhta biedaopa a châ. Governor zachhihpa pi ta “biehneina laipa” a tah khiahta cha, Council biehneina he a vaw lai kaw tlai ei aw. State/UT tawtaw a vaw châ thlah ha ei aw. Sawhkhâ pi ta a dauh thei awpa duahmo liata a vaw y thlah ha ei aw. Hehawhta Autonomous Council biehneina lai kawpa ahneipazy he India râh liata a chyhta dei ama châ. Cha a chyhta hry liana cha ta Maraland he â hlao hra.

Chahawhta biehneina laipa cha zuby masiah phei a pahawh ta a pahawh thlah hapa nata zuneih ki phao ta a phaoh thlah hapa vaw châ thlah ha lah pi, tahpa chi â chhih kaw. Atahmâ ta eima hnei ngâpa biehneina lai ngaitapa hmahta a hmâh thai leipa, a hmâh khai leipa, a hmâ hoh leipa nata a hmâ ngâh leipa eima châ khiahta cha biehnei lai viapa eima to tita chhaota zuneih ki phao ta a phaohpa eima châ pyly thlah ha aw. Mizoram sawhkhâ nata officer-zy ta Marapasawzy ta eima Council he zuneih ki phao ta a phao thlah hapa hawhta maniah hmô ei sa la, ngâ leina maniah ama hnei chhochhi khiahta la … Âh, nohzaoh â chhih ngâsâ thlah ha aw.

Pakhona ta, Council liata hriatuhpa hluh tu (over-staff) haw ei ta, ama office awpa nata amâ tyu nawpa nata ama raihria awpa chhao y vei, tahpa ta reina zy a y tyh. He rohtuhpa ta cha hriatuhpa kâh tata ama y khiahta cha ama raihria awpa pachâpa awpa tlâ châ ta, chahawhta hriatuhpa ama hluh khiahta cha eima râh hmahsie nawpa tlao châ hri aw ta, a pha kaw aw cha maw, tahpa ta ei pachâ. Atahmâ ta Council office hmâ ngâpa he cha Secretariat châta hmâpa ta, Siaha khih vaih nano nanopazy liata chyhsa o tlôpa ta office hropazy cha â soh thei laih thlah haw. Department eima hnei ngâpazy pakawh ta tha patlô theipa a châ tho ta, department thiehpa nata project thiehpazy chhao â tao thei lymâ. Pakhona ta, hmo parohpazy tlua ta thao papuapa (archaeology), pawpi sahdô laipa (botanical garden/park), sa sahdô laipa (zoological park), tho lo (plantations), a eih pachaipa ta ramawh nata teak, hawsaih thi hluhna chalihsa awpa ta health outreach raihria, Siaha khihpi a pathai thei nawpa ta pathaina (sanitation) raihria nata râh hmahsiena raihria hropa hluhpi hria awpa â hôh chheih thlah ha. Abyuhna hawhta â ngiahpa trainingzy chhao pasiesa lymâ theipa a châ hra.

Iakâh nakawh ma, “Ei tilih liata cha kei na a lai chai na” tah ta a kupi pakai ta â pakawpa hawhta a pakaw dâh chhao eima thai awpa a peimawh kaw hra. Governor reipa hawhta Council he biehneina lai ngaitapa a chabapa sawhkhâ châ ta, chavâta Siaha khihchhôh liata office nanopa paduapazy liata “Government of Maraland” tahpa ta signboard eima taw thei leipa chhaota, “Government of Mara Autonomous District Council, Office of the Senior Revenue Officer”, etc. tahpa ta cha eima taw thei thlah ha nahta pangiasa â chhih. Mara râh chhôh liata cha office zydua, Mizoram sawhkhâ officezy liata chhaota, Mara reih he official reih sâkha ta amâ py khai awpa ta â tao (imposition) theina dâh chhao a y nahta pangiasa â chhih hra. Eima biehneina lai ngaitapa he hmâh thai ta, hmâ ngâh ta, hmâ hoh ta, a zydua ta hmâ khai eimâ chhuah awpa a peimawh kaw.

Zuneihpa ta a ki vâta ramawh thih liata a taw ta, a ki cha ano châta chhiena nata leina lâta tlao â lie haw hripa hawhta, Council biehneina laipa chhao he hmâ thai leip’aw sih la, a vai leip’aw sih la, keimo nata keimo ateina châta eima hmâ tlamaw khiahta cha Marapasaw abohna hlâta leina tlao a tlôkhei thei. Vote hmô hluh ta abei châ khona vâta chi hropazy ohmo lyuhmo, sawhkhâ rai nata contract rai zy pie lymâ ta, Marapasaw hmahchhah o chaki o chapâ liata pahrâ ta, khichhai nie laibâhpa tlâ a nie awpa lâta eimâ lie thei.

Mopakha hro liata chhaota eima tlohna (qualification) ta a tloh leipa tlai ta chhihtuhpa hrahro kaw châ khohna palôh eima hnei tlamaw aw, tahpa chi â chhih kaw hra. Tovyu a sâhpa liata a tyuh tlôh sih la, a raihria eima pahnie tlôh vei khiahta cha zuneih ki phao ta a phaohpa tlâ châ aw pi ta, a py nata a râh ta a tao awpa tho ta, keimo mopakha sapa nata thlahpa hro châta chhaota pha aw vei. Pakhona ta, pachutuhpa ta a sikuhawtizy pahnie kawpa ta pachu thei awpa ta thaina a hnei vei khiahta cha  a pachutuhpa rai cha zuneih khi phao ta tlâ a phao tahna a châ. Chavâta, chhihtuhpa duahmo liata a ypazy nata rai kheihhawpa rai hria awpa ta, eima raihria awpa pahno ta eima pahnie thei nawpa ta sasyh hmah a pasienana (self-improvement) hnei lymâ awpa a peimawh. Abeipa lâta sona eima hia lymâ awpa â ngiah kaw hra. Achuna dopa cha classroom liata ngahlah châ vei; hro chhôh zydua ta khâ a chu ngâ thlah hapa (life-long learning) tlao a châ hri. Zuneih ki phao ta a phaopa châ leipa ta, eima raihria awpa pahno ta a phapa ta eima hria thei nawpa ta a chu thai awpa nata a chu thei awpazy a chu lymâ ha ei suh u!