TU IN NGE VENGTU CHU VENG ANG?

(Who will watch the Watchman?)

(This article was published by The Aizawl Post)

Vawikhat chu international conference ah ka tel ve a. Sweden atanga rawn kal palai, radio ministry-a hotu pakhat nen kan inkawm a. Ram pakhatah chuan an radio production leh broadcasting hmunpui  sakna tur bungruate a bo  hnem thu leh a veng tura an rawih (chawkidar) chu ringhlelh theih dinhmunah a awm avangin, chu vengtupa chu vengchhawng leh turin vengtu dang pakhat ruat angai ta a ni, a ti a. Nui deuh chungin, anih leh, vengtupa leh amah vengtu chu inthurual ta se, vengtu dang ruat a ngai leh dawn a, in project chu vengtu hlirin a khat mai dawn a nih chu, tia ka comment chu, “Ni a, vengtupa leh amah vengtu inthurual chu thil awmthei a ni a, chutiang dinhmun kan thlen chuan a hmaa vengtu pakhat chauh kan neih lai ai  khan a vanduaithlak zawk ang,” tiin min chhang a. He a thusawi hian kan ram dinhmun min ngaihtuah tir nasa a ni. Kan ram hi Corruption awmlohna ram, emaw, corruption tlemna rama siam turin “tu in nge vengtu chu veng ang?” tih zawhna hi kan chhan theih a pawimawh ta a ni.

Entirnan, Zoram mipui te ei tur buhfai kudama dah luh tawh venhim hna thawk tur leh dik taka buhfai ration sem hna thawk turin sorkarin chhawng hrang hrangin vengtu (watchman) a dah thin, Chutiang bawkin sawrkar budget anga kim taka kudamah buhfai dah turin chunglam atangin hnuai lamah vengtu an awm thin: Supply Minister, Supply Secretary, Supply Director, DCSO/BDO, SK leh Chawkidar te an awm a, veng tin a sem chhuak turin retailers an awm leh a ni. Supply minister pawh hian amah vengtu Chief Minister, Legislative Assembly, Governor, Central Supply Minister, Prime Minister, Parliament, President te a nei ve leh a. Heng mawhphurhna inkhaidiat chhawng hrang hranga mawhphurhna chelhtute hi mipuite chanvo vengtu leh enkawltu an ni a, an hna hi rinawm taka an thawh theuh chuan ram leh hnamin hmasawnna nasa tak a nei thei dawn a ni.

Mahse, heng vengtu chhawng hrang hrang zingah hian vengtu rinawm lo pakhat lek pawhin thil nasa takin an tibuai theih a, heng bakah hian vengtu chhawng hrang hrangte hian an mahni mawhphurna (level)ah theuh eiruk dan an dap thei bawk a, hei hi an chunga mite emaw an hnuaia mi ten an hriatpui vek kher lo thei. Tin heng vengtu chhawng hrang hrangte hi thil diklo (corruption) ti tura an inthurual lek phei chuan nasa takin ram leh hnam in a tawrh phah ngei dawn a ni. Mahse mipui vantlangte tan erawh chuan an thil tih dikloh hi hmuh mai theih a ni chuang lo. Phuahchawp UC (utilization certificate) te siamin an thukru thei tlat a ni. Mipui chanvo vengtu ten an ven tur veng lova, thil diklo ti a, mipui leh sorkar an bum chuan mipui ten kan tuar ang a, khawtlang leh ramin a tuar phah dawn a ni. Mipuite pawh vantlang leh kohhran thil vengtute kan ni ve a, vengtu tha kan tum theuh tur ani a, chuvangin sawkar hnathawhte thil dik lo kan tih tir tur ani lo.  

Entirna dang han sawi leh lawk i la. Computer program hack tih te leh khawl, eng khawl pawh ni se, tichingpen thei leh thei lo thuah te hian tunlai kawvel thiamna ah chuan hack thei lo leh tichingpen thei lote hi an vang hle ang. Chuvangin a programte leh a khawlte tichingpen thei ani leh ni lo lam aiin a vengtuten rinawm tak leh dik takin an veng em, vengtute veng chhawngtu ten an hnaah an rinawm em, tih lam hi ngaih pawimwh zawk tur chu a ni.

Hmun tam takah chuan mipui chanvo te a nihna ang taka hman a nih theih nan Vengtu hna thawk turin monitoring & evaluation team te an nei thin. Mizoram ah pawh an awm ve awm e. Hna an thawk tak tak em, tih erawh chu he thuziaktu hian ka hre lo. Mizorama hetiang lam hna thawktu kan hriat lar berte chu sawrkar din Vigilance Department hnuai a anti-corruption bureau (ACB), Central sawrkar hnuai ami Comptroller and Auditor General (CAG) leh independent NGO PRISM te SOSA (Society for Social Action) hi an ni awm e. Social media leh chanchinbu, a bik takin investigative journalism, te pawh’n vengtute vengtu hna an thawk ve thei bawk. ACB, CAG, PRISM, SOSA, social media leh chanchinbu te hnathawh hi an fakawm a, mahse anni pawh hian hmuntinah vengtu hna an thawk seng lo ang. Hlemhletna do nan dan chi hrang hrang sorkarin siam thin mahse, eiru duh tan chuan kawng a lo awm zel tho mai.

Kristian tha tehna atan zu in leh inloh aimaha pawimawh zawk chu vengtu tha, mi dik, mi rinawm a ni em, tih hi a ni. Pathianin ringtute chu vengtu rawngbawlhna thawk turin min ruat a (Ezikiala 3:17; 33:7). Kristian tha leh dik chuan corruption (thuneina corruption, sum corruption, hun corruption leh sual chi hrang hrang) ah te a in hnamhnawih lo ang. Kristian dik, Pathian tih mite chauh hi vengtu tha leh dik an ni thei ang a, vengtute vengtu tha an nithei bawk ang.

Vengtu rinawmlo leh diklo taka thawk thin te hi mipui vantlang leh sorkarin hrechhuak in hmu nghal vek lo mah ila, hmutu leh hretu pahnih an awm tlat – Vengtu (mahni) leh vengtute Vengtu Pathian. Kan thil tihte min hmu vektu leh min hriatpuitu, vengtu Pathian a awm tih chiang taka hretu chu Kristian dik tak an ni a, Vengtu Pathian chu an hlauh tlat avangin an corrupt ngam hauh lovang. Chuvangin  Vengtu Pathian hlauhna chang hre lo a, corrupt pawi ti lo vengtu hna thawkte chu vengtu dik an ni lo; Kristian dik an ni lo bawk. Rinawmna tel lo rinna chu rinna dik a ni lo. Hetiang vengtu mi dik lo sawrkar, kohhran leh pawla hnathawkte an awm chuan ram tan a vanduai thlak hle a ni.

Pathianin amah ringtu leh a hnung zuitute hi he khawvela Vengtu leh enkawltu (watchman & steward) hna thawk turin min duh a, chuvangin kan hnathawhna hmun theuh vah hian ven ngai Kristian ni lo vin, vengtu nih i tum ang u. A nih loh pawhin kan thawhpuite zingah vengtu rinawmlo an awm a nih chuan an mahni veng turin tan ila ang u. Kan ram hian vengtu dik leh rinawmte a mamawh tak meuh ta a ni. Vengtu Kristian tha leh dikte lo tho rawh u le!