KHICHHAI NIE LAIBÂHPA

(He châpaw he Deiva Mara Daily liata papua hawpa a châ)

Sâlâ kawpa hawhta, eima chyhvia nota, khichhai eima hneipa eimâ ly kaw tyh, khichhai nie laibâhpa ahmie pahâhpa nie awpa a y awp vâta. Ei paw nata ei puhpa zy he khihpipa lâ châ a chupa, sawhkhâ rai ahriapa nata a tlyhkapa châ ei ta, chavâta khichhai eima hnei ngâ thlah ha tyh. Kha daihti liata cha khichhai ano deita pati paniesa tua tyhpa châ ta, chhôhkha cha khichhai a nie khai tawhta a nie laibâhpa nie tyhpa a châ. Ei puhpanah hnohta a laiseihpa châ na ta, âhmie pahâh viapa niena special daihti liata cha ei paw nawh ta pati nie eina vaw hrua tyh ei. Hehawhta khichhai pasô pi ta, ngiaryh kawpa ta pa-ysa ta niedo pahâh chaipa paniesa ta pasiesa eimia chhuah tyhpa heta Marapasawzy pi he chi sopa nata phopi rôhnahpa eima châzie a palâsa.

Eikha cha ei paw nawh ta khichhai hnei ei ta, a sie khai tawhta a nie laibâhpa nie awpa ta eina vaw hrua ei. Ama khichhai cha awhkhy hrâhpa tupa ei ta, awhsa cha a zydua ta khichhai nie awpa ta ama pathlu khai. Ei uhta nata khôpheih liata a tyuh pi ta, khichhai pati niepa cha eima mokhâh. Ei uhta mo cha awh tihmô liata a choh ta, keima moh deikua a chaoleimachôh liata â cho. Khichhaipa ta awh tihmô la ta a niepa nah ta ei uhta ta, “Laiu, keima eih a nie haw” tah ta, palôh chhâ kawpa ta eina vaw chho. Buakha a y nah ta, khichhaipa ta a chaoleimachoh cha la heih ta, ei uhta ta a paro kawpa ta, “Laiu, moh teh, moh teh, nâma eih chhao a la haw hu” tahpa ta a paro kawpa ta eina vaw chho heih. “He khichhaipa he duama a pangia-palina châh rai pahno leipa ta, awhsa nie khai a chhuah thlah haw” a vaw tah heih. Cha nah ta, khichhaipa ta, “A zydua ta ei nie khai ha aw” a vaw tah. Bierei pyu cha ei nô ta laikah lâ tawhta za thei ta, zâ râ ta, ei uhta nata kei cha laikah lâ a pazaw ta maniah a kaw pazaw. Kha daihti liata cha Marapasawzy ta khichhaipa palôh eima pasasa tlamaw aw, tahpa ama za chi ngâsâ thlah ha.

Atanoh eima râh duahmo kaw pachâ na ta. Maraland châta Central tawhta sôh â khypazy he khichhaipa ta nie khai rô hawpa ta, Marapasawzy cha khichhai nie laibâhpa a chhuhraopa châ thlah ha bâ khiah pi ma, tahpa pachâna zy eina kaw pahneisa tyh. Chysia, niedo, osana nawpa hmobaoh nata eima nohto peimawh hropa zydua Maw râh nata Viah râh lâ tawhta a khypa sai châ ei ta; college nata university a kiahpa sikuhawti hluh via zydua Maw râh nata Viah râh lâ sie ei ta; eima râh liata thohna o phapa a y leipa vâta tlâh leipazy ta Maw râh nata Viah râh lâta thohna o phapa lâ ngai lymâ ei ta; eima râh luhpa, officer, sawhkhâ raihriapa, contractor, sôhdaohpa nata khihsa thei viapa zydua ta Maw râh, Viah râh nata foreign lâ khitlyh lymâ ei ta; o a sapa, lâthlôh a chaopa nata rai hropa a hria hmeihseihpazy chi hropa viarô sai châ ei ta; chavâta Mizoram sawhkhâ nata Central tawhta sôh akhypa a hluhvia zydua cha Maraland liata a tâh rei leipa ta amâ lie lilaw haw tyh. Marapasawzy cha khichhaipa nie laibâhpa a niepa tlâ eima châ bâpa ta â lâ.

Kao hro lâ tawhta sai heihpa ta, atahmâ cha eikhano hawhta châ khao leipa ta, khichhai nata chhôhkhazy hmaohkha ta pati eima nie kho haw bâ. Khichhai nie laibâhpa ha awpa a ngiah khao leipa ta, khichhai nata chhôhkha â raohpa ta eima nie khoh thei haw bâ. Khichhaipa a kâchhie lei nawpa ta ziza ahuapa nata phapa deikua tao awpa a byuh. Khizaw hmahsiena ta eima râh chhao kaw khu hra ta, chavâta keimo deita ta a y thai hmeihseih awpa châ mapi. Khichhaizy peimawh pi ta, khichhaizy ta keimo maniah ama peimawh hra. Chahawhta a châ nota, Mara pawti zyna kyh liata khichhaipa a kâchhie leipa ta khihchhôhpa palie tlao eima kâ a chhie thlah hapa eima lyu. Business taona kyh liata tlyma, contract rai hriana kyh liata tlyma Marapasaw eimâ kâ a chhie kaw chy. Chahrao-chatôh ngâh mapi. Risk chhao la ngâh tu hra mapi. Tiama ta hriapasana kyh liata chhao tao via awpa hluhpi eima hneipa ta â lâ. Siaha liata khihsa thei viapazy he chi hropa viarô sai ama châ.

He tlu ta râh phapa nata râh kawhpa Khazohpa ta maniah pie ta, kao hro lâta eima tao thei mâh leipa chhao ta, niedo kyh liata chhâ cha sasyh eimâ chyh thei cheingei awpa a châ. Tomato dâhdei chhao taih ta a mâ ru ngaitapa ta Phai râh lâtapa chalei ngâ thlah ha chypa cha … Âh, rei ta noza lâta tlao â chhih. Phura leipalie by dâhdei chhao chi hropazy ta ama hnei khai thei awpa duahmo liata eima y bâ. Krizyhpa a tah tlôh pi ta, keimo hriapasana theilâpa nie a chhuah leipa ta sawhkhâ baona liata khâ a pahnieh a chhuah thlah hapa cha pachâ khi a tloh hmeihseih. Hehawhta eima sie lymâ khiahta la khichhai nie laibâhpa chhâzaw nata tlyzaw ta a niepa eima châ aw.

Chavâta ei pahrua khohpa cha he he a châ. Niedo kyh liata chhâ ta la eima râh tawhta a puapa ta a dua thei awpa he eima biepipa ta hmâ tua ei suh u. Hriapasana nata âdôkhâna he MSO, MTP, MChP, MPP, KTP, KNP, awnanopa nata sawkhâzy ta eima kô phuahpa ta hmâ bâ tua ei suh u. Chata leipa ta la khichhai nie laibâhpa a chhuhraona liata keimo nata keimo palie tlao eimâ pasasa ngâ thlah ha aw.