Nôpih Mara Sawzy

Nôpih Mara riethei taona

Khazoh pha ta byhnâ pie ta,

Mohmô beih lei, nah thei beih lei,

Hmo pha to nah ngôh tâkâ hry,

Marasawzy laih hrapa ta,

A zyh a zyh a kaw chhua lyma pi.

Châ’sa, thokha kaw pha laih ti,

Âmo vâta Nôpih Mara,

Mathlai thisaih, riethei toti

Za tao laihna my khai ei ta;

Nôpih khopa sâkha chhâ ma

Taopa hra awpa a thei khao veih ei.

Thokha heih ta, ngôh tâkâ vâ,

Nôpih Mara mathlai thisaih

Ryu, lyu, o zy tlâ zuah ei ta;

Nôpih vyhhai za la tyhna

Mara Opi khôpheih chô lia

Katuh kamâh tlâ pahnawh zaolao bâ.

Tho hro heih ta, ama pathla

Saw chhâ nawh chhâ pachâ lei ta,

Nôpih Mara hneina rôna

Pazu pavaw, thoti ramawh,

Râh leilô zy ‘tlupâ ei ta;

Chi hluh a mua pathao ha ei.

Mo thokha heih, khaihly thlâh tlôh,

Chahrasala a chu hoh lei,

Raihria hoh lei, Nôpih Mara

Vaw hriah chiehpa tlâ nie ei ta;

A chhâ tita chyhsa nôhmô

Tlâ a zaoh ta niedo rai ta sa ei.

Mo hro heih hra, heih siena lâ

Sie khoh lei ta, pilâh thy ta,

Khichhai khahrah tlao kei ei ta;

Phiah la lâh tyh siechawzy châ

Chybâ lâkhâh châ laih ei ta,

Nôpih Mara lôhpasa ta soh ei.

Nôpih Mara y, he tawhta la,

Vyh ta phao nô châ my awpa,

Na ryu sôhzy a zuah khai’pa,

Na râh leilô a parao awpa,

A unawhzy a heisai awpa,

Saw leilô la hnei khao khah y.

Chahrasala, Nôpih Mara y,

Hnabeidy ta lôh chhâ khah y!

Na kyhpachâ my beih lei ta,

A maohphaona a pahnopa

Na sahrôsi Marasawzy

Sâh hluhpi eima y lah y!