MARALAND LIATA HAWSAIH THINA

(He châpaw he Deiva Mara Daily liata papua hawpa a châ)

India he khizaw liata hawsaih ama thi hluh chaina râh sâkha hawhta reipa châ ta, India liata Mizoram he hawsaih ama thi hluh chaina state sâkha châ heih ta, Maraland he Mizoram State chhôh liata hawsaih ama thi hluh chaina a châ heih. Hawsaih dei châ leipa ta pitlohpa a machâ hlâta a thipa hluhna râh a châ hra. Hehawhta a sie lymâ khiahta cha Marapa chi pôh thei aw mapi. Pitlohpa thi hluhna chhâpa he daihti hropa liata rei a chhuah sih la, he châpaw liata cha hawsaih thi hluhna chhâpa a laichadai eimâ chhuah aw.

Khazohpa hriena a châ thei aw ma? Saw a pachhâsapa he Khazohpa khozie châ leipa ta, châhrasala Marapasawzy ta saw eimâ pachhâ lymâpa vâta Khazohpa palôh patlâh khao leipa pi ta, chavâta a pachhâsa ngâ kaw awpa byuh leipa ta ano Khazohpa tlai ta maniah a pachhâpa haw hi, tahpa lâ chhâh ta a pachâpazy ama y thlyu aw. Eima râh liata moleina pôh via lymâ ta, adona nata ngâchhihna hrozy y thai khao leipa ta, chavâta Khazohpa hriena eimâ tyhpa a châ aw, tahpa lâ chhâh ta a pachâpazy chhao ama y thei hra. Hehawhta ngiapâna hro kyh lâ chhâh tawhta alaichadaipazy pachâzie he za â chhih kaw nota, hehe a chhâpa a châ thei na ta a ngia vei. Keimo hlâta ama molei via leipa chhao ta, keimo hawhta moleipazy râh liata chahawhta hawsaih thi ngâ kaw hlei veih ei. Keimo hlâta saw a pachhâsa hluh viapazy râh liata chhaota chahawhta hawsaih thi ngâ hra veih ei.

Sipasa rietheina tuna vâta a châ aw ma? He he cha a châ thei nawpa kao khazie rakha ma a y. Sipasa riethei tuna vâta nôzy ta saw ama phao daihti liata nie phapa nie thei leipa ei ta, chavâta nawh chhao chieh-leina chôta a vaw pipa a châ thei aw. Hawsaih a pi khai tawhta chhao ta sipasa rietheina vâta nie phapa nie thei leipa vâta nô sâhpiti pua pha leipa ta; hawsaih sâhpi a pathleih tawhta chhao ta nie phapa nie awpa a y leipa vâta hri-iah nanopazy â la nawpa a nao kaw heih. Sipasana vâta chieh-lei tlâh-lei daihti liata thohna o ngai thei leipa ta mo hluhpi ama y thei hra. Châhrasala, atahmâ daihti cha sawhkhâ ta nawh hnei nô ta nie awpa vitamin nata niedo hropazy health center nata angawadi-zy siepahliepa ta rai lymâ ta, hawsaih paniesa awpa chhao a rai lymâpa vâta sipasa riethei kawpa chhaota hawsaih thi pâ ngâna taih cha a châ awpa châ khao vei. Thohna o liata a mohôh nawpa châta chhao medical reimbursement zy tao theipa a châ haw bâ.

Hri-iah pha leipazy vâta a châ aw ma? He chhao he a châ thei nawpa kao a y hra. A eihpachaipa ta hawsaihzy ta meningitis ama vei khiahta cha chi â chhih kaw tlai. Pneumonia, chhôhpatlaipa nata hri nanopazy chhao hawsaihzy ta ama vei thei kaw hra. Châhrasala, atanoh cha he hrizy tawhta a vai nawpa nata a patlâh nawpa thohna phapa nata a mohôhna phapazy y khai haw bâ ta, chavâta hawsaih thi kheina taihta ama châ awpa châ khao vei.

Achhâpa lai chaipazy cha hezy he châ ei sala pangiasa â chhih: hawsaih mohôh dâh thai leina vâta nata sawhkhâ a maohphaona a patlô leipa vâta. Ahmiatua ta hawsaih mohôh dâh kyh reih tua sih la. Khazohpa ta hawsaihzy kyh pachâ ngaita ei ta, chavâta kaw laiseih ei sa la, chhôhkha, khihtlâh, râh nata awnanopa zy châta chyhsa phahnaipa ama kaw châ thei nawpa ta a phapa ta mohôh ta papitlohsa awpa he nôpawzy eima maohphaona châ ta, cha eima maohphaona cha patlô awpa ta hawsaihzy a phapa ta mohôh awpa ta Khazohpa ta maniah a khoh. Eima mohôh nawpa dâh thokhazy:

1.     Hawsaih ti chakuapa bao awpa châ vei

Hawsaih ama pipa nahta, a eihpachaipa ta charâta a hu a so leipa nata a cha leipazy, ti chakuapa bao eimâ paoh kaw. Ti chakuapa eima bao khiahta cha, cha hawsaih cha keimo ku tlai ta eima thie haw aw, tahna a châ. Pi tlohpa hmâhta ti chakuapa eima pahnie leipa châ ta, hawsaih a nô chhi lalôh ngaitana chhôh tawhta a kaw puapa nahta ti chakuapa bao thlah hapa cha, pneumonia ama vei lei nawpa y vei. Ti chakuapa bao khai tawhta a hroh thei thlah hapazy cha a thi thei leipazy deita ama châ aw. Hawsaih ama pi tawhta noh kha noh no chhôh cha ti chhao hmahta pasi mâh leipa a pha.

2.     Hawsaih khô puakhei tu awpa châ vei

Nosa, vâsua, ziza rupa nata chakuapa, doh-hâh nata roh-hiahzy hawsaihzy châta pha veih ei. Chavâta a peimawh ngâsâna daihti na tah leipa ta cha hawsaihzy khô puakhei tu awpa châ veih ei. Raihria khei awpa ei châ leipa ta, apakhypazi nata pakhypi a hlao chhao tao khei mâh leipa a pha.

3.     Hawsaih nata a mohôhtuhpazy ama pathaih awpa a peimawh

Hawsaih chysia a pathaih awpa peimawh ta, a pôhpa chhao a pathaih awpa peimawh ta, olyu nata hawsaih palaona a pathaih awpa peimawh heih ta, hawsaih yna nôpaw nata chhôhkha hropazy chhao ama pathaih awpa a peimawh kaw hra. Paôpazypa rôh nata sahma rohzy he hawsaih hnatlâna châta a pha lei ngaitapa hmozy ama châ. Hawsaih ku pasi ngâ thlah ha awpa byuh ta, nôpaw nata hawsaih a mohôhtuhpazy chhao eima ku eimâ si ngâ thlah hapa â ngiah hra. Hawsaih niena dawh-râ beihphiah nata a hriapa hmozy a pathaih awpa peimawh ta, hawsaih lao hmaopa tlyma, a kheihhawhpa hmo hmaopa tlyma a tao rai ta tao awpa châ vei. Pathaihna he Khazohpa Bie liah-mari chaipa sâkha a châ.

4.     Avaina thohna (vaccination), thohna hropa, vitamin nata hawsaih laozy a daihti ta tao ta pie lymâ awpa â ngiah

Nawh hnei nota nie awpa vitamin nata niedo hropazy nie cheingei awpa peimawh ta, hawsaih châta vaccination, thohna hropa, vitamin nata hawsaih laozy a daihti tata pie lymâ awpa a peimawh hmeihseih. Hezy he chalei thei awpa ta thohna daohzy liata y ta, a chalei nawpa a hnei leipazy hnohta sawhkhâ ta a pie awpa ei a châ. Hnatlâna thabypa (primary health care) liata cha sawhkhâ ta a mâ leipa ta a râhsawzy mohôh nawpa dâh hnei pi ta, cha cha sawhkhâ chhaota hlao a patloh cheingei awpa a peimawh.

5.     Niedo a papha awpa

Nawh hnei nota niedo pha awpa peimawh ngâsâ thlah ha ta, hawsaih sâhpi pazysa daihti liata chhao niedo pha awpa peimawh heih ta, sâhpi a pathleih tawh ta hawsaih cha niedo phapa pie lymâ awpa â ngiah. Chysia phapa hlâta niedo phapa peimawh via ta, olyu phapa hlâta niedo phapa a sôh via. O sa nawpa ta loan la ta, niedo phapa nie thei khao leipa châpa ta cha o chhiepa tlyma chyhsa ory tlyma liata tlô thlah ha ta, niedo phapa niepa tlao a peimawh via. Niedo a papha awpa, tah tita, a thawh tupa tlyma, a iah tupa tlyma, a thlôh tupa tlyma, sathaw tlâ tuhpa ta niepa tlyma nata sa nie hluh tuhpa deikua pha heih vei. A daih rakhapa ta tao khai awpa a châ.

6.     Nawh cha thohna o liata papisa cheingei awpa

Atahmâ chhâ liata “hawsaih a thipa ta na a pi” tahpa a y tu khao awpa châ vei. Nawh pi chyta cha thohna o ngai cheingei awpa peimawh ta, thohna o liata khiahta cha nawh a pi a rupa tlyma a pi thei lei awpa tlyma cha a a ta (caesarian) tlyma ta thlai tao aw ei ta, dawhtyzy nata nâsihzy ta thlai ta ama papisa ha aw.

7.     Hawsaih a tlâh leipa thohna o lâ thlai ngai khei awpa

Hawsaih sâhpi a phapa ta a pazy lei tita zy, a lao a phapa ta a nie lei tita zy, a phapa ta â mô lei tita zy, a chhôh a patlai tita zy, a pazô a sâ tita a cha tyh khiahta zy, a luh a palo tita zy, chasipa a hnei tita zy, a pakhu tita zy, a rao a hrahry tita zy, a cha ngâ thlah ha tita zy, a zao lai ngâ kaw khiahta zy, a paleih a pawh khiahta zy, a mo a pasa tita zy, a papôh tita zy, lyupâh a pua thei lei tita zy, a hah a thao tita zy, â chhuhdaih tlama tita zy nata rairuna kheihhawhpa rai a y tita thohna o lâ thlai ngai khei awpa a peimawh ngaita kaw. Liahsa ta ama pasa haw tawhta ngai kheipa cha a hawh tu tlamaw aw. pasa amâ la paw’ nata ngai khei ha awpa ei a châ.

Achhâna liata cha, a râhsawzy hnatlâna kyh pachâ peimawh ta, hnatlâ kawpa ta pa-ysa awpa he sawhkhâ maohphaona lai ngaitapa sâkha châ ta, he kyh liata sawhkhâ ta a maohphaona a patlô cheingei awpa a peimawh. Nôpawzy ta hawsaih mohôh dâh eima thai khai leina kyh cha kao nanopa ta soh chy sih la, hehawhta hawsaih ama thi hluhpa he po tlana (epidemic) a châ ma, ziza pha leipa nata pua leipazy a y ma, ti niepa a pathaih ma, cellphone, telephone, radio, etc. zy tower tawhta radiation a y ma, tahpazy a chu awpa a peimawh kaw. Cha tho ta, Civil Hospital, District Hospital, Primary Health Center, Rural Health Center nata health program hropazy a phapa ta siekhei ta, hriatuhpa, olyu, thohna nata chhaichhi peimawhpazy chhao â daihpa ta hnei ta, hriatuh phapazy lymâ pie ta, a hria pha leipazy chô liata action la ta, a maohphaona a patlôpa sawhkhâ eima râh ta â ngiah ngaita kaw.

Vânoh Paw

Email: fachhais.in.africa@hotmail.com