HLAPHÔH BIEHMIA

Ahmiatua chai ta hla nata biezy nâ pie tyhpa ei Khazohpa hnohta alyna bie reih nahta, hlaphôh pahâna chi ei hro liata a tutuhpa ei puhpa Laisa Hlychhoh (chhâzaw râh lâ maniah a siesai hawpa) hnohta chhao alyna bie ei reih hra.

He ei blog liata hlaphôh hluh via zydua he a bu ta ei vaw papua chiehpa CHHÔSO RÔS PAW (Siaha: MTP Hqrs, 1998) nata he he mopado heih ta baichhi via heihpa EI CHHÔSO RÔSPAWZY (Siaha: Maraland Publishers, 2010) liatahpazy ama châ. Châ nata bie (literature) kyh liata hmahsie viapa chi nata phozy liata cha, a sa ta sapa hlazy deita phi thlah ha leipa ei ta, a rei ta reipa hlaphôh (poem) zy chhao ama phi lymâ hra. Eima râh liata deikua a rei ta rei awpa, a bievaopa (recitation) chhao taihta noh peimawhpazy liata rei awpa, hlaphôhzy phipa hluh mâh vei. Keima dyutlai leipa ta a bu ta ei papuapazy kha a y tua chaipa a châ thlah ha ei aw. Atahmâ deikua cha thyutliazy ta hlaphôh liata vaw pahâh pathao ei ta, alypa a châ ngaita kaw. Hmialâ liata cha Mara hlaphôhzy lapakhy ta a bu ta papua awpa chhao byuh â chhih kaw aw.

Mara reih he reih hneirôh ngaitapa châ ta, hla phi n’awpa nata bie ro n’awpazy châta a thlôh ngaitapa nata a ngia ngaitapazy a châ. Marasawzy chhao hla nah bie a pahâh kawpa, a phi thai kawpa nata a roh thai kawpa eima châ hra. Manômapaw daihti tawhta atanoh taihta Marapasawzy ta Mara hla nata bie ama za phi hapa zydua a bu cheingei ta za paso thei khai hapa châ mawh ei sa la, châbu tho hluhpi tloh aw ta, Mara reih nata Mara chi nata pho châta chhaota hla nata bie kyh liata hmahsiena thata a tlôkhei hra aw. Châhrasala a hluh via zydua cha chahawhta za taopa ama châ lei vâta, hla nata bie phapa hluhpizy a phituhpa nata a reihtuhpazy ama thi tita tlâ thi pâ hra ei ta; pakah ta a chho pachhuah laihpazy, a bu ta papuapa chyhta nata kuropa thokhazy deita atanoh eima pahno theipa nata hneipa a châ bâ. Lôhhia â chhih kaw!

Chavâta, hla nata bie keima hlâta a thai via syulyupazy ta he hlâta a pha viapa nata â ngia viapa hlaphôh hluhpi ama phi lymâ n’awpa nata, a bu cheingei chhaota ama papua lymâ n’awpata tha pathyuna nata pathaona châta, ei hlaphôh nawh ngaitapa lapakhypazy: EI CHHÔSO RÔSPAWZY cha a ei nona châta a bu ta papuapa châ ta, he blog liana chhao heta sopa ama châ hra. Â chhuahna a hlaotloh khei cheingei aw tahpa ei hnabeiseih. A bu ta papua tua chaipa kha MTP Headquarters ta papua ta, a einona he Maraland Publishers ta a papua. High school hawti ei châ no tawhta atanoh taihta ei chhôhso liata a rie tyhpa nata ei phipa hlaphôhzy lapakhypa châ ta, thokha deikua, rei hmopa pyly ta, a phathipa ta vaw chhy leipa ei na ta ei pahlei haw ei.

Hla he a sa ta sapa tlyma, a rei ta reipa hlaphôh tlyma rai vaw châ sa la, a bie yzie nata a pachunazy peimwh kaw ta, a ao nata a lo zie chhao a peimawh kaw hra. Cha zydua amâ pôhkha thei n’awpa ta, Mongyuhnah ta “poetic licence” ama tahpa, reih sie dâh tyh leipa ta ro â ngiahna daihtizy y tyh ta, bie pachyuna hmâ â ngiahna su chhao a y tyh hra. Hlâno Mara hla nata bie thokhazy kha a phapa ta eima mo khiata cha, Mongyuhnah ta “rhyme” nata “meter” ama tahpazy hmâpa ta ama za phipazy ama châ. Mara reih he reih chanôpa nata reih chapawpa a bao ta hmâ pakaopa â paoh kaw; pakhona ta, lâpi piah-la, chavah chahaoh, thokô râhkô, lyurâh obyuh, khih-liah râhpâh. Mara reih reih hropazy nata â nano eihna sâkha chhao, biesâ (word) nata mohchho hluh via zydua bikawh (syllable) sânopa ama châna he a châ. He vâta a châ aw, Mara moh hluh via zydua biekawh sâno ta bipa ama châ; Pakhona ta, Hlichhy, Hlyâh. Mara literature hmahsie via n’awpa pachâpa ta, he hlaphôh bu liata hlabie thokha chhao, he reih sieziezy hmâpa ta phipazy ama y hra.

He ei hlaphôh phipazy liata a hluh via zydua he chi nata pho hlaphôhzy châ ei ta, ei raihriana – pastor nata missionary ei châna – nata a hmie âh leipa hawhta a pachâpazy chhao ama y thei aw. Chi nata reih kyhpachâna he moleina châ leipa ta, chi hropazy, chi hropa ama châ vâ hrahro ta hroh a hao ta a hao thlah hapa deikua Krizyhpazy hrozie awpa chi châ vei. Mara chi nata Mara reih he ano y ta a vaw ypa (by chance) châ leipa ta, Khazoh chhâzaw hmochhuah chhôh liata a hlao hra ta, chavâta Mara chi nata Mara reih he pasô ta Krista rônana châta hmâ ta, Marasawzy Krista khozie hawhta hro awpa he Mara Krizyhpazy maophaona a châ.

Politicianzy deita he râh kyh a pachâpa nata râh châta rai a hriapa châ hlei veih ei. Eima zydua ta eima hneina, theina, thaina nata pahâna kao chyu ta ngâchhih ngaitapa nata tiama ngaitapa ta râh châta hriapasanazy he kei ta cha râh kyhpachâna dopa tah nahta; cha cha Krizyhpa râhsaw phazy tao hialia awpa chi a châpa ta ei pahno. Chahawhta pachâna ei hneipa nâ hly khei hrapa Puhpa Pachi Hlychho, Dr K Zôhrâ nata Machâ S Hrachu zy ta, ei hlaphôh phipazy vâna heta nâ lykhei kaw ei ta, ama daihti sôhpazy vâropi pahryuhpata papua tuapa liata hlaphôhzy reipa ta, a pha viapa nata â ngia viapa a châ thei n’awpa ta pachâna pha ngaitapazy na pie ei ta, ama chô liata ei ly hmeihseih. Moh hmâpazy he phi chhyhpa deita châ ei ta, chyhsa manôh hmeihseihpa (a hroh chypa tlyma, khizaw a khô hawpa tlyma) a nuapa hnei vei. Moh a lyu chho tlamawpa a vaw ypa chhaota phituhpa a chhuahpa châ vei. He hlaphôzy heta chyhsa mopakha tlyma, py tlyma, a nua eihpa hnei hra vei. Hmahsie viana châta padona biezy, eina nata seina biezy chhao rai, phituhpa ta â ly.

Papua tuapa (1998) kha ei hlaphôh phipazy nâ ly khei kawpa nata ano MTP Hqrs President a châ chhôh cheingei ta papua awpa ta a vaw paryhsa hapa, Puhpa Khaihrâ Choza, BA, MCS, a thei thlâhna châta MTP hnohta hlâ nata, “NA LO HMÂ KAW DIA, MARA THYUTLIA” tahpa chhao he ano Pawhrâ ei phipa hla châ ta; papua heihpa nata he blog liata chhao ano Pawhrâ nata râh kyh a pachâpa Marapasaw ama lochona daihti liata khizaw maniah a khôsai hapazy pasai leina nata athei thlâhna châta rei awpa a châ.