Ei Vâ kaw tyh, Ei Liah-ri tlona Râh

Chhôhso paru ta rohpady châh,

Ngiahna sôhsa chhôhso lia;

Lôhhia lei ta laih zaolao tyhna

Liahri tlona ei râh ngia kha!

Nohlynô a chhina ki,

Thosôh paw ngia saih, râh, maihnô hry lia,

Sopavaw nah raihnô ao ngia zy,

Hâhzo sidia pathai pha,

Chôthlapi khaih ngia ry lia

Zâbeinô rôh pahâh zy kha,

Ei chhôhso lia khâ châh thlah ha tyh.

Lailâh rikhazy nah chhôhki ta,

Khiluh tlâhpadâ pha lia

Thlihua tlaih ta tyulâh sa tyhpa zy;

Lôhkhyzy chhao ta lôhtlâh ta,

Tlyliah nohdi pha ry lia

Châkizoh khoh tyhpa zy;

Kaolâhzy chhaota lôhraoh ta,

Su pathaih akaonazy lia

Bei reithai khoh tyhpa zy kha

Ei kaw theina maih ta

Ei kaw vâ kaw tyh.

Liahri tlona ei râh ngia kha,

Chhôhso ta kaw rohpadyna maih,

Ngiana a sôhsa rili chhôhso lia,

khati lâkô ei kaw daih heih va!

Sihnôh kua ta ei sy heih thlyu aw;

Cha ti lôh ei rie chai ei pina râh kha

A ualua khâ châ aw tlyma i!