Na Chi Heihzy Mohnaopa ta na My tlamaw aw ei

Hy marasaw,

Tiria haosâ

Tlâhpi khô lâ,

Saih, râh paw ngia,

’Si tlana lia,

Lôhhrâ tlô ta

Charei hra la,

Vyh châ phaoh nô

Na nô hnazô

Vaw my beih khah y.

Hy Marasaw,

So pietuh moh,

Thai hlei patoh,

Chô chai liata

Nâ tyu no ta,

Châ paduatuh,

Châ mokhâh hluh,

Na râh sawzy,

Zawpizy hry,

A thei hr amah y.

Hy Marasaw,

Taotuh kuzô,

Pha, ngia kih tlô,

Maihtopaw ngia,

Chhithai tlâh lia,

Paw ngia locho,

Pathli hai no,

Laihri tlona

O kahmi kha

Zakhei tyh khah y.

Hy Marasaw,

Byhnâ to hnawh,

Kuhria pahawh,

Siahnaoh rakhô,

Paw ngia sadô,

Ngôh o liata

Pahnawh hra la,

Na laih tyhna

Laiphô hlô kha

Mâ sa tyh mah y.

Hy Marasaw,

Chi pho moh hmâh,

Tovyu chô chhâh,

Pahmôhpi hawh

Vâ chôsâh tawh

Sâh via kiah ta,

Li toh no ta,

Châ uahnaohpa

Siechawzy lâ

Zâ heih hr amah y.

Hy Marasaw,

Thaina sona,

Hneina rôna,

Daihti pawhmao,

Hrona sôh chhao,

Châ pachâ tlai,

Châ khokhei chai,

Na paw thi mâ,

Na râh hlô châ

Hmâ pasaih mah y.

Hy Marasaw,

Khataih su lia,

Khâpa raihria,

Chhie nota chhao,

Pha nota chhao,

Taotuh rôhnah

Khazoh pha nah,

Liahri châ â

Maraland châ

Thi hro khei mah y.