(He châpaw he Deiva Mara Daily liata papua hawpa a châ)
Marapasaw
chyhsa phapa eima châzie nata keimo nahta keimo â pasô kawpa eima châzie niedo
eimâ phahlana daihti zy, rairuna kheihhawhpa ma eimâ tyh daihti zy, tlâh lei
ziah lei daihti zy nata thina mâchhiesa daihti zy liata â lâ tyh. A baokhâ pi
ta, a deichhypa ta thlah eimâ palôh tyh. Ryhpaoh leina daihti liata cha
kyhchhina lâ (pha noh lâ) a luah leipa ta eima y thei. Tlâh lei ziah lei daihti
nata thina mâchhiesana lâ (chhie noh lâ) deikua eima lalao kawpa nata ryhpaoh
lei kawna daihtizy liata chhao ta eima rai nata hmotao ngâpazy siesai chypa ta
a luah lyhlia eimâ chhuah tyh. Aly’pa a châ kaw. He hrozie phapa he chhy lymâ
ei suh u!
Chahawhta
hmo pha kawpa eima tao ngâ nota, ri eima kia dâh nata rikô liata bie eima rei
tyhpa kyhzy liata deikua so thai via awpa a peimawhna kao khazie rakha ma eima
hneipa ta â lâ. Ahmiatua chai ta eima rei khohpa cha, mothlih tla ta cha awpa
eima pakhâpa nata a cha ngâ thlah hapazy ngiapâtuh thatlô leipa hawhta pachâna
he a châ. He he do khai vei. Eima kyhpachâpazy hmô khao lei awpa ta ama y bâ
awpa cha, mothlih pathlapa ta cha lei thei awpa châ vei. Mothlihzy palo ta
chapa heta mâchhiesana chhao a papai patoh via thei hra. Chavâta mothlih pathla
ta chapa a pakhâ khao khah ei suh u!
Mahnô-mawhpaw
daihti liata cha chyh-hao sa ei ta, chaphôh ama za tu tyh. Chyh-hao sapa he
chapaw, a eihpachaipa ta pasaiphazy, taopa châ ta, ama kyhpachâpa cha chhôhkha,
sanawh nata khihsaw zy ngiabâh leipa ta lôhhia lei ta sie ta, pakhâtuhpa
ahripazy pahnie laih ta, peirâh a ngia awpa ta thlah palôh ei ta, athipa vyuhpa
ta moh amâ chhuah tyh. Chaphôh atupazy ta athipa ama pasai leizie zy, achô
liata ama hmotaopa nata biereipa kheihhawhpazy vâta amâ ngiapachhina nata ngiathaina
ahawna zy, a hro phazie nata a hro ngia tlâh a châpa zy, a nônai notlyhna, a
riahphana nata hlaotlohna, etc zy nata ama palôh yna zy taihta chaphôhtuna hla
ta ama sa tyh. Hehawhta taopa he atanoh ta rikô liata thlahchhâpa nata
biereipazy nah heta miakhapa a châ. Atanoh deikua chaphôhtupa nata chyh-hao
sapa chatlupo ta hmâ khao mapi. Chavâta chhôhkhazy ta ama chapa he pahnokhei
thai ta a py thai awpa a peimawh kaw. Cha tlai ei se, ama kyhpachâpa ama pahlei
hawpa cha!
A sânona
liata eima rei khohpa cha ri eimô to dâh he a châ. Chini, sâhpi phaoh nata
phusa zy ta ri eimâ topa he mawh lâ rei ngâ kaw awpa y hlei vei. Py ta
taokheina dawhbeih, sanâh, etc zy hawhpa chhôhkha hnohta hlâpa kyh chhao rei
awpa y hlei hra vei. Rito poh nata rito pawpi kyh deikua rei awpa achyhta a ypa
ta â lâ. A pei muaruana mawh la y vei. Châhrasala chyhsa hmiamo ypa nata y
leipa likawh thi noh lia taihta a palâsa thei. Chhôhkha thokha liata poh a hluh
tupa vâta a rai nawpa kyh liata bua theiaw ei ta, pawpi a hluh tupa vâta a so
nawpa kyh liata rairuna taih a tlôkhei thei. Thy awpa hra ta pasai a chhi vâ,
so ngâ thlah ha awpa ta vâna a pathieh ngâ thlah ha tho ta, o a pabie pathypa
vâta noraih khei khi taih a tloh thei hra. Chavâta rito pawpizy he o liata a
chyhta so ta, a hluh via zydua thlâ liata so khai hapa pha via aw khiah ma,
tahpa pachânazy a y tyh. Poh nata pawpizy ta ri a to châpa ta, a phusâ lâ ta a
to hri sih la, vâdua a tyh penawh hryuhna khazie rakha ma pachha aw ta, ama
khihsa tôhtuna châta chhao poh nata pawpi hlâta cha ama phahnai khei via thei thlyu
aw. Thlâ lâ pangai chy ta, tlyhmia liata ri nohthlahpa a la kheipa chhao he a
rakhapa ta châ leipa ta pakipazy tupa khiahta cha daihti a pahawhpasâ tho ta, a
sô awpa hawhta pasô lei nawpa chhao a nao kaw aw.
Achhâna
liata nata a peimawh chaipa ta eima rei khohpa deikua he he a châ – rikô liata
biereipa nata thlahchhâpa hi. Thlah chyuta chhâpa mawh la rei awpa y hlei leipa
ta, biereina kyh liata deikua a chu awpa eima hneipa ta â lâ. Khatlu ta bierei
phapa hmâh châ sa la, rikô liata mâchhie a sa ngâpa chhôhkhazy ta la thei thai
hmeihseih veih ei. Chavâta bie a reihpa ama hluhpa a pha kaw nota, kaokha lâ
tawhta pachâpa ta cha bie rei awpa ta a duahpa ama hluh tupa he hmo pha chaipa
a châ aw ma, tahpa chhao pachâ khi a tloh. Thokha ta sermon pi pathla chaihmiah
ei ta, crusade speaker khiah ma tah ngâ kaw awpa ta pachha thai khao leipa ta
ama y. Thokha heih ta, athipa chhôhkhazy âmo hmahta ama vâsâh thlâ bao na ta,
thina amâ tyhpa cha athipa moleina vâta tlyma a chhôhkha moleina vâta tlyma a
châzie lâta pakaw chheih thlah ha heih ei ta hmiachhie nozana ta mâchhie asapa
chhôhkhazy ama pabai thlu lao heih. He rohtuhpa chhao heta rikô liata paôpazypa
pha leizie a reihpa eikha ei hmô haw. A daihti nahta a su nahta â hmie lei kaw.
Chavâta, ri
pasiena program châta deita châ leipa ta, ri kiana daihti chhôh châta chhao
chairman/chairperson zy local awnanopa ta rao ei sa la, bierei awpa tlyma,
thlahchhâ awpa tlyma, âmo ta patohpatia ei sa la, bie a rei khohpa nata thlah a
chhâ khohpazy chhao ta âmo liana heta pasaina hiah ha tua ei sa la, a thlâzi
viapa ta thlahlôh chhao a chhih via aw khiah ma, tahpa ta he rohtuhpa heta a pachâ.
Reihtuhpazy kheihta ma nama pachâ hra tly?
No comments:
Post a Comment