MARAPASAWZY CHARIAH LAIPAZY: PAÔPAZYPA, PARITHEIPA, RAIHRIA A CHHUAH LEINA

(He article he Deiva Mara Daily liata papua hawpa a châ)

Paôpazypa nata paritheipa zy ta Marapasaw hluhpi chhâ chhao a palo hmâ leipa ta maniah a thie ngâ hai. He vâna heta hawti hluhpi hara ei ta, nôhmei pawhmei khi leipazy nôhmei ei ta ama pawhmei lymâ. Raihria hoh leina vâta Marapasaw hluhpi kudaopa lâta eimâ lie ngâ kaw. A hra â daih hmeihseih haw. Chata leipa ta la eima leidia tlamaw aw.

Paôpazypa nata paritheipa chariah

Paôpazypa (karao, châhnamei, sâdâ, khainie, kuvâ nata paôpazypa hropa zydua) nata paritheipa (sahma, thohna, etc) zy he hrao leipa liata sôh pahryuh thlâhthlina a châ tho ta, chyhsapa hnatlâna châta a pha lei ngaitapa hmozy ama châ. Paôpazypa nata paritheipazy he ta hri pha leipazy tlôkhei thei ei ta, a eih pachaipa ta hri chi chhih ngaitapa cancer hri ama tlôkhei thei. He vâna heta khizaw râh hluhpi liata cha paôpazypa ataopa hmô awpa ama sôh kaw bâ. Sahma a paripa nata thohna a taopazy chhao hmô awpa y tu khao veih ei. India râh liata Mizoram he pa-ôpazypa nata paritheipa a tao hluh chaipa state sâkha châ hra pi ta, Mizoram chhôh liata Maraland he paôpazypa nata paritheipa a taopa ret â sâh chaina eima châ heih thei. He vâna heta a châ aw – eima râh liata cancer aveipa hetlupo ta eima hluhna chhâpa he.

Chyhsa thokha ta bie chaopopa reipa ta, “Paôpazypa a tao leipa nata a niedoh leipazy chhao cancer hri vei pyly thlah ha hra ei ta…” ama tah. Â do. Ahyrai ta cancer hri ama vei thei. Châhrasala paôpazypa a taopa nata a niedopazy liata cha a vei theina (risk) â sâh via syulyu haw. Âmo paôpazypa a taotuhpa dei châ leipa ta, a tao hra leipa, khih ama sa lâhpa ama lahpi/vahpa saw nata chhôhkhazy chhao taihta cancer hri ama vei thei hra. Hehe dawhtynah nata science lâ chhâh ta a thaipazy ta pasia haw ei ta, chavâta, ei chakhyh thai awpa châ khao vei.

Vârâh kia nata kia lei kyh châ vei. Paôpazypa a taopazy, sahma a pari tyhpazy, thohna a tao tyhpazy chhao vârâh la ama kiah thlah ha hra thlyu aw, Krista amâ ngiapâ haw khiahta cha. Ngiapâtuhpa a tah tlôh sih la, eima hnatlâna a parao thei awpa hmozy eima tao ngâ thlah ha khiahta deikua cha pachâ khi a tloh. Vârâh kia nata kia lei hlâta, lei râh liata Marapasawzy paôpazypa nata paritheipazy ta maniah a pamua thlah a awpa he, he rohtuhpa ta la ei pachâ peimawh via hri. Paôpazypa nata paritheipazy vâta Marapasawzy sôh a phahla aw pi ta, chhôhkha nata khihtlâh pabua aw ta, eima sapa riethei aw ta, nôhmei pawhmei khi leipazy nôhmei pawhmei aw ei ta, hawti hluhpi harapa ta ama y awpa he ei pachâ peimawh via hri.

Paôpazypa nata paritheipa hmozy he eima chariahpa lai ngaitapa châ ei ta, chavâta a dyuh ta, pahniena hladyuh pathluah thlu â daih haw bâ. He eima chariah laipa he hrâ sie hnaoh bâ tua ei suh u! Marapasawzy ta chariah eima za pahnie thei leipa za y tu veih ei. He paôpazypa nata paritheipa chariah chhao he eima pahnie thei hra. Chavâta, eima moh a chhuah sih la, “Keima na, Mara pasai pha na, riah pha chai na, thatlô chai na, paôpazypa nata paritheipa luhzy ei la haw ei na” tahpa ta pahniena hladyuh pathluah thlu sih la, sawh-lâ kia thlu bâ tua ei suh u. Chata leipa ta la, he chariahpa he ta maniah a pamua tlamaw aw. Chi nata pho ta rei tlâh awpa ta a dua thei khao leipa ta eima y tlamaw aw.

Raihria a chhuah leina chariah

Châ a chyhta a kaw thaipa maih ta sawhkhâ rai sai hnabeiseih pi ta, châ a thaipa maluh ta eima râh liata sawhkhâ rai a y theipa zie hlâta hluh via haw bâ ta, chavâta châthaipa hluhpi raihria hnei leipa ta ama y. Châ a thai leipa, sawhkhâ rai a hria thei lei aw hluhpizy hra heih ta keimo ku tata raihria ta nie tlua a chhuah khao leipa pi ta, sawhkhâ baona kheihhawhpa tlyma hiapa nata a chadaipa he eima rai tôhpi chaipa ta hmâh bâ pi ta. Mo hluhpi  zawkâ (job card) liata a pahnieh pi ta, mo hropazy heih ta leihbâh sai ta la pi ta, eima leihbâh chhao ta nie pi ta, a mô pi ta, a pakhy pi ta, chareipakhy pi ta, a lâ chhao eima lâ pâ tyh. Hehawhta eima sie lymâ khiahta cha eima râh hmialâ daihti awpa pachâpa ta hupo â chhih ngâsâ thlah ha aw. Raihria a chhuah tlôh leipa ta a pathlahpasa kawpazy he … noâh ama pachhih kaw.

Hlâno ta zâ chahra kaw tyhpa Marapasawzy khazia ma atanoh eima chahra khao vei tly i? Party politics ma maniah a parao khai ha aw tly? Ngiapâtuhpa dopa cha raihria tiamapa ta ano hriapasana theilâpa a nie awpa a châ nota, ngiapâtuhpa a tah tlôh pi ta, eima hriapasa hoh leipa he eimâ ngiapâna kyh liata eima chhei hawpa vâta ma a châ aw tly? Achhâpa pachâ khai tua ei si. Sawhkhâ baona nano nanopazy he eima phahlana liata maniah a pazao awpazy deita ama châ. Tlokhuh ta zakha liata zakha eimâ pahnieh nawpa châta taopa châ veih ei. Châhrasala, eima thathina vâta mo hluhpi cha hezy lia sai ta tlokhuh ta eimâ pahnieh thlah ha bâ. Chavâta pha kheina lâ hlâta tlao eima chhie khei via haw hripa ama lyu bâ. BPL (Below Poverty Line) tahpa cha “sipasapazy hry liata sipasa chaipazy” tahna chakhi ta. Mahnô-mahpaw daihti liata cha Marapasawzy ta sipasapa châ awpa ama noza ngâsâ thlah ha ta, a chi chhao ama za chi kaw tyh. Chavâta sipasapa ama châ lei nawpa ta thata ama za hriapasa tyh. Atanoh deikua cha sipasapa (BPL) châ awpa â chhu ta a chhu thlah hapa eima lyu bâ. Noza nawpa châh chhao pahno thai khao pi vâ!!! Kraws Pheisaih Rev Mâthao rei dâh hawhta, hmia kawhna thlahpa ma eima to khai haw bâ aw tly!

Thathipazy châta hlo-ia tawhta hriapasana hro a chu awpa ta Biesozy 6:6-na ta maniah a chho. Hlo-ia lâ vawh sih la, vâ chu heih bâ tua ei suh u! Chata leipa ta la eima râh he a rao dâhdei aw. Zawkâ zy, NLUP zy nata sawhkhâ baona hropazy liata tlokhuh ta a pahnieh thlah ha khao khah ei suh u. Achô liata eima rei hawpa hawhta, hezy he tlôkhuh ta eimâ pahnieh nawpa châta taopa châ leipa ei ta, hezy he cha eimâ phahlana, eima tlo-âh leinazy liata mania a baichhituhpa châ deita ta hmâ awpa a châ. Khazohpa ta râh phapa nata râh kawhpa maniah a piepa he hmâ phahnai heih bâ tua ei si. Ku raihria nohhlao â chhih zie a thiehpa ta pahno heih bâ tua ei si. Keimo hriapasana theilâpa tlai nie a chhuah heih bâ tua ei suh u.

Achuna kyh liata Marapasawzy eima hmah a kaw sie pathao laih. He hlâta hmahsie via nawpa hluhpi eima hnei chy. Châ athaipa, a thai hmeihseihpa châ a chhuah ei suh u. Châ a thai hmeihseihpa cha, sawhkhâ rai a hmô leipa chhaota châthaipa a châpa vâta hmo patuapalua thai ta, hriapasa hra ta, a nie awpa a hmôpa dei châ leipa ta, hneirô khi taih ta a hria thei aw.

Sasyh ta a vaohi ta a chyh a chhuah heih bâ tua ei suh u: Âhna-lasi chi to, theilâpa chi to, sa chi to, sâh nata chhâmeih nata chicheipa nanopa hluhpi, thopi, kawfi, ramawh, tik tho, briks, etc zy râh hro lâ tawhta a vaw ngiakhei khao leipa ta, keimo ku tata papua bâ tua hra ei si. Hydroelectric power (ti hmâpa ta current pakhaipa) nata lôsôhpa nata hmo sôhpa hmô papua awpa eima râh liata hluhpi a y. Hmô papua a chhuah bâ tua ei suh u. Direct finance a pha kaw, eima hmô thei khiahta cha. UT chhao a pha kaw hra, eima hmô thei khiahta cha. Direct finance zy, UT zy eima hmô hlâta nata eima hmô leipa chhao ta tao thei awpa eima hnei. Hriapasa sih la, keimo nata keimo a chyh thei haw sih la, Maraland khôlâ zuapapua awpa eima hnei thei haw khiahta cha ahy hmao hmô a ngiah khao leipa aw pi ta, sawhkhâ ta keimo palie kha tlao maniah a panao-papâ ngâ kaw bâ aw. “Marapasaw, keima na, pasaipha na, chahra chai na, tiama chai na, ahy hmao hmô khao aw va na” tah ta eima moh a chhuah sih la, hladyuh pathluah sih la, thathina chariah pahnie sih la, chahra a chhuah thlah ha bâ tua ei si. Chata leipa ta la eima leidia tlamaw aw.