RÂH NATA AWNANOPA PHA NAWPA TA AWNANOPA CHHIHTUHPAZY NGIATLÂH LIATA Â PAHNIEH

(He châpaw he Deiva Mara Daily liata papua hawpa a châ)

Atanoh eima râh duahmo eima mo ti ta, politician hluh via zydua cha awnanopa chhihtuhpazy châ ei ta; officer nata sawhkhâ rai a hria ngâpa nata a pension hawpa hluhpi chhao awnanopa chhihtuhpa châ hra ei ta; contractor, sôh daohpa, sôh paliepa nata lyu taopa hluhpi chhao awnanopa chhihtuhpa châ heih hra ei ta; NGO chhihtuhpazy nata thâtihbu a papuatuhpa hluhpizy nata siku hawti thokhazy chhao awnanopa chhihtuhpazy ama châ hra. He thota full-time ta chakaona rai ahriapa pastorzy, missionaryzy, evangelistzy, thohna o liata a hriapazy, pachutuhpazy, hara deichhyna chakaona rai a hriapazy nata hriatuhpa hropa (social worker, etc) zy eima hnei heih. Hezy he ta awnanopa chhihtuhpa châta Biehrai ta â hnawpa qualification (tlohna) hnei haw sih la, adona nata ngâchhihna ta eima chakao lymâ khiahta cha eima râh nata awnanopa pha aw ta, eima thlahpa hro chhao pitlohna lâ eima pangai lymâ aw.

1 Timothy 3:1-13 nata Titu 1:5-9 liata awnanopa chhihtuhpa châta qualification 24-pazy eima hmô. Chazy cha: tharôh a hmâh leipa, chyhsa nônaipa, a eichhiana a tao leipa, bie chôchhâh a chhuah leipa, a pathi a chhie leipa, phana a khohpa, chyhsa siapa nata pathaihpa, a sohsi theipa, sasyh a pahniepa, a kuah theipa (discipline a hneipa), a hmeihseihpa (chôpho lâta a lâ pha awpa ta a châ ta a châ leipa), a chhôhkha khihsa tôhtuna kyh a phapa ta a patôhpatia thaipa nata a patôhpatia theipa, a sawzy ta a phapa ta ama zapa (a rei amâ ngiapa), a pasaihpa (khihchhai, o charei chakâpa chô liata a phapa), seina a hnei leipa (chyhsa ta ama reipasipasua leipa), chyhsa zachhihpa, ngiapâ leipazy hry liata chhaota a moh a phapa (ngiapâ leipazy chhaota chyhsa adopa nata ngâchhihpa ta ama hmôpa), tâkâ sôh a tlaichhai leipa, â do leipa ta athôhna a tlua leipa (avyuna a tao leipa), sahma a pari ngâ thlah ha leipa (pari theipa nata pa-ôpazypa a tao leipa), lahpinô pakha a hneipa (chanô-chapaw châna kyh liata chyhsa ngâchhihpa), pasiana (mopathlina) a tlohpa, ngiapâna kyh liata pitlohpa (ngiapâ thiehpa châ aw vei), bie hmeihseihpa (ngiapâpa thabypa) khâchâ a duakhei hawpa nata Abeipa Bie a pachu theipa zy ama châ.

He qualification 24-pazy he eima mo tita, achhâna sânopenawh deita he lathli ta pahno awpa a peimawhpazy châ ei  ta, 22-pazy cha chyhsa hro (character) a chakhi. He he ta maniah a pachupa cha awnanopa chhihtuhpa chakaona rai hria awpa ta hrozie (character) a peimawh ngaitazie a sia ngaitapa ta a palâsa. Hehawhta awnanopa chhihtuhpazy châta hrozie phapa nata dopa a peimawhzie  Mopathaihpa Pawla ta 1 Timothy 4:11-12 liata hehawhta a vaw pa-i heih: Awnanopa chhihtuhpa cha bierei kyh liata zy, hrozie kyh liata zy, kyhpachâna kyh liata zy, ngiapâna kyh liata zy, nata pathaihna (chôlâ nata chhôhlâ ta pathaihna) kyh zy liata eima sahlaozy a mopâ tlâhpa ta eima y awpa a châ. Pawla ta, “Kei ta Krista hro hawhta ei hro hawpa hawhta nâmo chhaota keima hro hawhta hroh ha hra muh vy” (1 Kawrini 11:1) a tah theipa hawhta, awnanopa chhihtuhpazy pi cha eima sahlaozy ta eima hro maniah amâ mopâ awpa ta eima pahao ngâ awpa a châ.

Awnanopa chhihtuhpa a laihsa/satlia tlyma, chyhsa nô chyhsa paw tlyma a patla ngâ kawpa cha ama y nah ta pangiasa a chhih vei. Ama ypa chhao ta rei khi tloh aw vei. Awnanopa chhihtuhpa sahma a pari tyhpa y aw veih ei. Beinô ama khô tawhta a ru lâta a doh pâ laih tyhpa ama ypa chhaota hluh aw veih ei. Awnanopa chhihtuhpa pi ta a tudai lai ngâ kawpa chhochhi y aw veih ei. Ama ypa chhaota a viachhie ta a châ aw. Sôh kyh liata adona nata ngâchhihna, party politics a hmâ dâh nata a siekhei dâh thaina, sawhkhâ rai liata ngâchhihna, contract rai a pha kawpa ta hriana, maohphaona piepa patlôpa nata thathi leipa ta tiama ta hriapasana kyhzy liata deikua cha eima râh liata awnanopa chhihtuhpa hluhpi hmahsie via nawpa nata kaw pha via nawpa hluhpi eima hneipa ta â lâ. Awnanopa chhihtuhpazy pi cha achhyna o nata awnanopa program-zy châta deita ta chhihtuhpa châ leipa pi ta, politics kyh liata zy, sawhkhâ raihria kyh liata zy, contract rai hriana kyh liata zy, lyutao oasan kyh nata nohto hro liata zawpizy chhihtuhpa eima châzie khâ a thei awpa a peimawh ngaita kaw. Eima sawhkhâ office liata chhaota adona nata ngâchhihna eima chaba lymâ khiahta cha awnanopa chhihtuhpa eima châna a lâ aw ta, hrialâhpazy chhaota maniah ama za hra aw.

Atanoh eima thyutliapa hluhpizy ta Krizyna kyh ama pachâ pahria khao leina chhâpa zy, eima râh liata chi hropa châthaipa ngiapâ leipazy ta pachâpa hawhta Kri ama vaw zy thei leina chhâpa zy nata eima râh thlahpa kyh liata eima hra thei leina nata aly thei leina chhâpa zy he awnanopa chhihtuhpazy pi ta eima hrozie awpa hawhta hro leipa ta eima tao awpazy tao leipa ta, eima tao lei awpazy eima tao hawpa vâta chhao a châ thei aw. Chavâta zawpi eimâ hnaw hlâta keima chhihtuhpazy pi eimâ mopakia awpa a peimawh tua chai. Khazohpa cha chôpho lâta eimâ lâ dâh mo leipa ta, chhôh lâ maniah a hmô khaipa châ ta, mo hropazy hmô leina liata eima hrozie nata hmotaopazy a pahno khaipa a châ. Chyhsapa cha dôvei thei hra sih la, Khazohpa la dôvei thei aw mapi.  Khazohpa dôvei khao khah ei suh u!

Awnanopa paduana chhâpa cha vârâh kia awpa deita châ leipa ta, lei liata eima y chhôh chhaota râh phapa nata râh thlahlôhpa paduana, nation-building politics (râh paduana politics) chakaona rai hria chhao â hlao hra. Chahawhta râh phapa nata râh thlahlôhpa padua thei nawpa ta awnanopa chhihtuhpazy ngiatlâh liata â pahnieh lai kaw. “Mara râh liata la avyuna y vei. A râhsawzy tiamapa ta hriapasa kaw ei ta, BPL chhao hluh veih ei. Adona nata ngâchhihna pasâhsa ei ta, ama râh liata pahrâpa pha ta, thlahlôh â chhih kaw. Achhâpa cha, politician hluh via zydua awnanopa chhihtuhpazy châ ei ta; officer nata sawhkhâ rai a hria ngâpa nata a pension hawpa hluhpi chhao awnanopa chhihtuhpa châ hra ei ta; contractor, sôh daohpa, sôh paliepa nata lyu taopa hluhpi chhao awnanopa chhihtuhpa châ heih hra ei ta; NGO chhihtuhpazy nata thâtihbu a papuatuhpa hluhpizy nata siku hawti thokhazy chhao awnanopa chhihtuhpazy ama châpa vâta a châ” tahpa ta chi hropazy nata Mizoram Governor zy ta maniah a pahnopa râh châ a chhuah ei suh u.

Achhâna liata cha, full-time ta a hria leipa awnanopa chhihtuhpazy (machâ, chakaotuhpa, KNP/KPP/KTP/KHP/Sunday Siku chhihtuhpazy) awnanopa chhihtuhpa phapa nata hlaotlohpa kaw pachâsa awpa ta pastorzy ngiatlâh liata maohphaona â pahnieh lai kaw. Pastorzy ta chyhsapa (khizawpa) lâ hmozy hlâta Khazohpa lâ hmozy pachâ peimawh via sih la, chakao awpa ta maohphaona piepa eima châpazy ngâchhih ngaitapa hriapa ta patlô lymâ sih la, sôh kyh liata liahsa ta a do haw sih la, kyh toti liata a mopâ tlâh châpa ta eima hro haw khiahta cha machâ nata chakaotuhpa nata awnanopa memberzy chhaota eima hro maniah a mopâ hra aw ei ta, chatanacha ta Maraland he râh phapa nata râh khohchhihpa ta eima padua thei aw.