VEIHSEIH PALÔHHÂH

(He châpaw he Deiva Mara Daily liata papua hawpa a châ)

Mara reih ta “veihseih palôhhâh” eima tahpa he Maw reih ta “tlawmngaihna” ama tahpa nah heta â hnia kaw. Châhrasala miakhapa châ veih ei. “Veih” nata “seih”, “palôh” nata “hâh zy he pazao awpa ei ma, pazao lei awpa hri ma, tahpa ei palalao kaw. He châpaw (article) liata cha “veihseih” nata “palôhhâh” tahpa ta pazaopa ta biesâ (word) kha ta eima soh aw.

Mara reih ta “veihseih” tahpa heta khichhai nata o chareipa chô liata phana zy; sanawh chhôhkha, viasa rihchâh nata opa lyuhrizy charei chakâ châh nata thopi do nata patinie hruana châh a pahnopa zy; mo hropa châta â pasaina zy; biechhô thâhchho phana zy; pathluapa hnei leipa ta nata mohnao viapa hnei leipa ta chyhsa to chô liata phana palâsapa zy; paphôh palyuh leipa zy; maoh-ôh theina zy; hiehâh ruchhôna palâsa leipa zy; chyhsa kyh chhie rei leipa zy; tlâh-rai sâh-rai kyh liata pua phapa nata bao ngiahpazy baona kyh liata ria phapa nata chaolei ahuana zy a pahly khai. Hlâno Mara laihsa veihseihpazy cha ahy satlia tlai kha ma a khoh, tahpa pahno thei’pa châ veih ei ama tah; o chareipa zydua chô liata reikah phapa ta amâ chhy khai thlah hapa vâta.

“Palôhhâh” (Chapi reih ta “palôh hawh”) tahpa he ta sona nata novâhna zy; reingiana zy; adona zy; ryh-rao thaina zy; tao awpa nata tao lei awpa pahnona nata rei awpa nata rei lei awpa pahnona zy; pitlohna hro zy; khichhai châ dâh thaipa zy; sanawh rinô pahnona zy nata khih kha râh kha chyhsa pahnona zy a chakhi khai. Palôhhâh leipa cha pitloh leipa tahna tlu châ ta. Chyhsa manôhzy he eimâ nano khai. Thokha a palôh a hâh patoh viapa y ei ta, thokha ama hâh hawh via. Thokha cha pawpi nôpina taih ta a palôh rai ta a hâh thai leipazy ama y heih.

Veihseih nata palôhhâh rei pakaohpa ta veihseih palôhhâh tah thei awpa chyhsazy cha chyhsa phapa, sopa, dopa, tiamapa, ahneina sôh apasaihpa, a chaolei ahuapa nata a mopâ tlâh awpa ta phana to rai ta a biepa chyhsa reina a châ. Veihseih palôhhâhna he tlâh kha ta eima chhopasia khiahta cha, “Sasyh tlu ta mohropazy pha nawpa a pachâ peimawh hrapa” tah sih la, a chhei tu nahta a ngia vei. Hlâno Marapazy ta cha khihsaw nata râhsawzy ta “ano la a veihseih palôhhâh kaw na” ama tahpa châ awpa za tlaichhai chai ei ta, khâ ama zâ chhuah tyh.

Hlâno Marapasaw kha a chipho pôhpa ta reipa ta chi veihseih palôhhâhpa eima za châ. “Reihkah phapa cha seihpi seihtôh na a chale”, za tah ei ta, chavâta reihkah phapa hmâ ta, chyhsa phapa châ ama zâ chhuah lyh-lia. Chahawhta sasyh tlu ta mohropa pachâ peimawh hrana a za lai kawpa vâta, ama rairuna nata chieh-lei tlâh-lei daihti liazy ta ama zâ deichhy lymâ. Khihsaw hropazy ta niedo ama hnei thlah ha khiahta cha nôhmei chyh-lapa nata hara rietheipazy chhaota nie hnei leipa ta nodipa ta za y veih ei.

Veihseih palôhhâhna hro vâta, chhôhkha, khihtlâh nata râh moh pachhie awpa tlyma, pabua awpa tlyma ama za chi kaw. Khih nata râh châta hmo pha tao awpa kyh liata chybâ lâkhâh châ awpa khoh veih ei. Âmo hriapasana theilâpa deita nie a chhuah ei ta, khih nata râh pha nawpa ta chyhsa tota ama theina nata thaina zydua papuapa ta ama za hria paraoh tyh. Khihtlâh diadaipa, khihtlâh thlahlôhpa, khihtlâh hawsai phapa, khihtlâh a tluatlâpa nata khichhaizy ngia a ryh kawna khih châ awpa khâ ama zâ chhuah tyh. Ama lâpi nata khihchhôhzy pathaih ta, tlâh-rai siah-rai hriana kyh liata chhaota ama pua pha kaw tyh.

Khihsawzy ama veihsei palôhhâh kaw sai ta, bei-machâzy hmao nata mozy mopa ta reingiapa nata reiraoh kawpa ta ama za sie tyh. He vâna he ta a châ aw; chavah chahaoh, thokô râhkô, pazu pavaw, lyurâh obyuh nata sahroh awhva zy za mohhôh papha ei ta, ama thlu awpa nata thie awpa daihti liata yzie hnei kawpa ta thlupa ta thie ei ta, pabohsa byuhna liata a phapa ta ama za pabohsa tyh. Chavâta a daihti liata avâ suapa ta chhâ ta, kôvei chhao a pha lymâ tyh. Bei-machâ veihseih palôhhâhpa a hnei phapa khih cha ama khih a hu a hno ta, khih hropazy ta ama za uahva kaw tyh.

Saw-nawhzy ta veihseih palôhhâh kawpa ta nôpaw hmao nata mozy mopa ta, “a nô rei a ngiah leipa cha apo na a su” tahpa bieso khâ atheina chôta za hroh ei ta, ama lâthlôh a patlâ lymâ. Saw chhorupa tahpa tlyma, a sâlâ kaw, tahpa tlyma ta rei awpa ama za sôh kaw. Hmohmia a pha kawpa ta pasaih ei ta, raihria tiama ei ta, âdopa ta hroh ei ta, saw phapa nata khihsaw ta ama reithaipa thyutlia châ ama zâ chhuah tyh. Chyhsa hmao liata ama moh a tie sa la, thlaohchhi vâhkiana hmô lei awpa ama za chi kaw. Vânoh atopa nata ataopa châ awpa ama zâ chhu tyh. “Ei thi tawhta chyhsa ta kheihhawhta ma eina vaw rei aw ei?” tahpa pachâ peimawh kaw ei ta, chavâta ama hro chhôh ta hmo pha tao lyh-lia ta moh pha to awpa khâ ama zâ chhuah tyh.

Atanoh Maraland liata deikua veihseih palôhhâhna he eima khih bôpi Siaha khihpi ti sôpa hawhta a sôh haw bâpa a lyu. Marapasaw, a eih pachaipa ta Mara thyutliazy, veihseih palôhhâhpa chi eima za châpa kha a huah pathi heih sih la, hrokhei heih tua ei suh u. Chata leipa ta la eima hmialâ daihti awpa pachâpa ta hupo â chhih tu aw.