PACHI HLYCHHO BIETAPA

Hla nata bie liata Marapasawzy hmahsie via n’awpa hluhpi eima hnei chy na, tahpa he chyhsa hluhvia hmô dâh a châ nota, eimâ kaw sosâh n’awpa nata hmahsie n’awpata a hriatuhpa deikua chyhsa chyhta ama châ. Literature Board zy a vaw duah ta, seminar zy chhao MTP, MSO zy pachhuahpanoh pata hnei tyhpa châ ta; a hria pazituhpa deikua chyhsa chyhta ama châ tyh. He chyhsa chyhta, Mara literature hmahsie n’awpata a hriatuhpazy hry liana heta Pastor Laiu Fachhai (Vânoh Paw) he pakha a châ hrapa ta ei pahno. Ano he chyhsa reih hluh leipa hria hluh kawpa, a chhaohdaohlaoh leipa hmia a sapa, hmô theipa liata râh kyhpachâtuhpa hmeihseih pakha a châ pata ei pahno.

EI CHHÔHSO RÔSPAWZY tahpa High School hawti a châ no tawhta pastor/missionary a châna taihta a hlaphôh phipazy la pakhypa ta a vaw papua theipa he pachia â chhih tah kaw na ta, a hmo padopazy thaina he mopâ tlâh a châ kaw. A hlaphôh phipa thokha he cha a biepa a lâluah ta thyutliapazy chhaota za pahno thai thei awpa hlazy a za châ. A hlaphôh thokha lia hei ta ‘prose’ siezie ta a free kawpa ta a za phipa chhao a y. Thokha deikua reih machâ pha kawpa nata a ngia kawpata phipa, hlaphôh phituhpa palôhrupa, pachâna nata veipa zy a sia kawpata za reipasia thei awpazy châ ei ta, he hlaphôhzy he ryu tlohpa a châ pata ei pahno.

A hlaphôh thokha: BIETAI RÂH; REIH EIH, CHI EIH, RÂH EIH MARAPASAWZY; RÂH RYU SÔH; AHY A MY TLÂ LEITA SY, tahpazy nata missionary ta a siena Afrika râh Sudan tawhta eima râh a kaw vâna hla, EI VÂ KAW TYH, LIAHRI TLONA RÂH tahpa nata hlaphôh hropazy ei rei tita, a biezy a ngia ta, râh kyhpachâna palôhrupa tawhta phipazy a châna â lâ kaw. Notlarâh bypi tawhta Mara râh ti nata tlâh, a su nata hmiazie a kaw vâna nata a kyhpachâpa Mara râh siesai ta Khazohpa chakao heih awpata lâhlapi lâ sie heih awpa ta â piena zy za reipa ta, Hlazy 137-na liata Israel sawnah duahmo zy kha he hla nohpahlipa tawh heta la â lâ pasia kawpata ei pahno. Mara râh padua ta a pabohsatuhpa Khazohpa reithaina nata Mara râh chhihthatuhpa châ lymâ awpa ta ahawna, HY KHAZOH, MANIAH CHHIHTHA MAH Y, tahpa hlabie zy za rei nota la eima râh heta Khazohpa chhihthana ahawna châh pahno lei pata eima y tlamaw aw tahpa chi pata pachih palâ ngâ kaw awpa a vaw nao kaw.

A chhâna liata cha ano Vânoh Paw rei zie hawhta, eima râh châ heta khâpa chhâ tlyma za roh hr’ei sila, cha cha Mara râh châta ryu sôhpa eima paryupa, thyutlia vaw y lymâ awpazy ta atanoh Mara râh duahmo ama vaw pahno hra n’awpa a vaw châ aw.

Pachi Hlychho

Siaha, Maraland: 2010