(He châpaw he Deiva Mara Daily liata papua hawpa a châ)
Rei pakawh
byuh leipa ta, NLUP achhuahna nata phahnaina kyh cha hawti machâ, a lai a chyh
ta eima pahno khai. Maraland tawhta tlyma, Mizoram tawhta tlyma ta atlohpakhypa
chhie tawhtapa sôh châ leipa ta, India râhsaw eima châ lâhpa “Viah” nawh chhie
piepa tawhtapa NLUP sôh thysâh hluhpi cha Maraland liata chhôhkha hluhpi hnohta
piepa châ haw ei ta, aly’pa a châ hmeihseih. Mizoram sawhkhâ, Central sawhkhâ
nata chhie apiepa râhsaw zydua hnohta alyna bie rei awpa thata eimâ bâh. He
sawhkhâ hmochhuahpa phapa he Krizyhpazy pi ta eima Krizyna nahta a hmiepa ta
eima hmâh ma, eima siekhei ma, tahpa kyh rei pahmaoh awpa ta he article ta a
pahrua.
Ahmiatua
chai ta, Krizyhpazy pi cha haipa bie reipa tlyma, dôveipa tlyma eima hmâ awpa
châ leipa ta eima tao awpa châ hra vei. NLUP sôh hmâpa ta hria awpa nata tao
awpa ta sawhkhâ lâ eima pangiapa hawhta a phusa eima hmâ cheingei awpa a byuh.
Kemo he sawhkhâ cha châ pi ta, chavâta sawhkhâ dôveipa cha keimo nata keimo a
dôveipa a châ. NLUP sôh he âchhuahna hawhta hmâpa a châ vei khiahta cha, phi
chhyhpa nata dôveipa ta a hmâna report pangia awpa a byuh aw. Vialuh viakhyh
pathipa ta nata phiehphu lâhkâ ta a via ta viapapa ta a hriapazy châ chhao ta,
cha hawh pyly ta phi chhyhpa report pie awpa a byuh hra aw. “New Land Use
Policy” tahpa cha “Chhaohlei Hmâ Dâh Thiehpa” ta nietluana châ ta, No Land Use Policy, chhaohlei hmâ leipa
(raihria leipa) ta nietluana châ vei. Chavâta a rai hria tlôh leipa ta a sôh a
daopazy châta chhao phi chhyhpa report pangia awpa a byuh hra aw. Chahawhta phi
chhyhpa report cha sawhkhâ ta pahno vei hra sa la, Khazohpa nata keimo a sôh a
daotuhpa nata a hmâhtuhpazy ta pahno pasia pi ta, chavâta Krizypa dopa nata
phapa eima châ khiahta cha eima thlahchhâna maniah a pakhâ ha aw. Thlahpa liata
alyna hmeihseih hnei thei aw mapi.
Thokha ta,
NLUP ama raipa he chyh tu haw ta, chavâta hmo tao ta aduana khi tloh hmeihseih
vei, ama tah. Chyhsa nohkhihpazy ta cha asaipa ta hmôpa a chyh tu na, tah beih
veih ei. Raihria hmeihseihna khi a tloh leipa hawhta a pachâpazy ta cha a sôh chhao
la lei awpa tlâ a châ. NLUP sôh a y leipa vâta a phahla via muaruana châ hraoh
aw vei. Ama rei tyhpa kha â do tlyma? Aizawl hneirôpa Puhpa Pachhunga kha awh
zy, pazu chawhpa zy nata satlaw zy zuana tawhta pathaopa ta a tiamana nata
hriapasana vâta a kaw hnerôpa hawhta ama reih. A hlawhfâhpa nata thua chhiepa a
pakhy laihpa Viahpa a kaw hneirô hawpa rei awpa ama hluh kaw bâ. NLUP ta
âchhuahna he a sôh hmô kô cheingei ta tlyma, kô kha kô no chhôhta tlyma ta kaw
hneirô ha nawpa châ vei. Tiama kawpa ta hria hualua ta a kaw dua nawpa châta
pachhuahpanohpa a châ hri. Chavâta achhuahna ahneipa nata raihria tiamapazy
châta cha NLUP sôh he a kaw duana khi a tloh thlah haw.
Zawkâ (job
card) he sipasa riethei patluapa, BPL (Below Poverty Line) zy châta
pachhuahpanohpa a châ via chai ei aw. Thokha ta a hria khohpa zydua ta –
hneirôpa nata sawhkhâ raihriapazy chhao – ama hria thei khaipa hawhta reih ei
ta, he he â do tlyma? Hneirôpa nata sawhkhâ raihriapazy ta zawkâ hria ngâ kaw
awpa cha â ngia chhao a ngiali hra aw vei, a tahpazy chhao ama y heih hra. A
kheihhawhpa cha a châpa chhao ta, Krizyhpa eima châpa vâta zawkâ kyh liata â
chhuahna hawhta â do kawpa ta tao awpa a pha chai. A hria rai ta a hria leipazy
hria mâ pie awpa ei châ leipa ta, a dawh chyhta a hria thlah hapazy nata
phiehphu lâhkâ ta a hria thlah hapazy chhao nohkha hlao bohpa piepa pha hra
vei. A hria thei awpa odyh ziepa chhao khihchhôh odyh ziepa dopa hmâ awpa a
châ. Zawkâ hria awpa ta ama moh a piepazy tlai ta a rai hria awpa ta hlawhfâh
lapachhuah a chhuah thlah hapazy ama y chhochhi khiahta cha, âh … rei ngâh
chhao a chhih vei. Khihtlâh châta hmo pha viapa a châ thei nawpa ta, zawpi ta
hria thei lei awpa zawkâ raizy bulldozer (JCB, etc) zy hmâpa ta hria a chhuahna
zy chhao a y tlamaw thei hra. He chhao he zawkâ dâh ta a pasaih ma, tahpa a pha
kawpa ta mo awpa a peimawh kaw.
Achhâna
liata cha, Marapasaw he chati kôsy kha NLUP leipa nata Zawkâ leipa ta khih zâ
sa theipa nata zâ sa tyhpa eima châ. Chavâta mahnô-mahpaw daihti nota raihria
tia ama za ma tyhpa hawhna khata eima tiama pazao khiahta cha NLUP nata Zawkâzy
ama y leipa chhaota chatlu muarua ta eima nodi dâhphi hraoh aw vei. NLUP nata
Zawkiazy liata tlokhuh a pahnie khaipa ta hmahta thathina râh lâ a ngia thlah
ha lah pi, tahpa chhao pachâ chhie â chhih kaw. NLUP nata Zawkâzy he a hmâh
thaipazy châta la phahnaina a tlôkhei cheingei aw. Chavâta, Krizyhpa eima châpa
hawhta, eima hmâpa a châ khiahta cha â do kawpa ta nata tiama kawpa ta hmâh ta
tao ei suh u.
No comments:
Post a Comment