Ateiparupa (Conspiracy)

(He châpaw he Deiva Mara Daily ta a papua haw)

Ateiparupa (conspiracy) tahpa heta a lâhâhpa ta châ leipa ta ru lâta âteipa a chakhi. A lâhâh ta ateipa cha eima pahno khai. Râh kha nata râh kha (chariahpa nata chariahpa) adyuhpa zy, pôliti py sâkha nata sâkha ateipa zy, etc. Ateiparupa deikua cha chariahpa nata chariahpa ateina châ leipa ta, pôliti py sâkha nata sâkha ateina châ hra leipa ta, râh kha chhôh liata chhihtuhpazy âmo nata âmo a ru lâta ateipa nata nata pôliti py sâkha chhôh liata chhihtuhpazy âmo nata âmo a ru lâta ateipazy â nua. Awnanopa liata hmahta hrialâhpa nata hrialâhpa a ru lâta ateipa he hmo a y theipa a châ hra. Sawhkhâ (department nanopazy), NGO, siku, etc zy liata chhaota âmo nata âmo ateiparuna a y thei hra.

Khâpa vâta ma ateiparuna a y tyh? Ateiparuna a y tyhna chhâpa rei awpa hluhpi a y aw. A chhâpa lai chaipa cha biehneina (power) nata châna (position) achhuna vâta a châpa ta â lâ. Biehneina nata chânazy ta sôh nah piah nata tovyuh phapa hropazy â chakaihpa vâta mo hluhpi ta biehneina nata chânazy to ama kho kaw sai. Chavâta chyhsa thokha ta âmo duasu liata a kaw a kaw duah thei hra awpa hawhta a lâpazy tlyma, âmo hlâ chhao ta hmahta zawpi ta ama kho viapa hawhta a lâpazy cha a ru lâta ama tei tyh. A ru lâta chyhsa a tei thaipazy ta cha, ama chô liata a pha kaw tyhpa, sôh nata piah lâ taih ta a vaw deichhy hawpazy chhao ama tei khoh laih thlah ha. Noâh â chhih kaw. Bie ama rei leipazy pareisa laih ei ta, hmo ama tao leipazy pataosa laih ei ta, ama palôh phaozie a châ leipazy paphaosa laih ei ta, mapaihpa ama châna zy rei khoh kaw ei ta, hmo a sie tyhpa hawhta a sie leina kao dita a ypa chhao Beinô tisaih tlu a laipa ta reih thai ei ta, ama rei khoh kaw.

Ateiparupa he Khazohpa ta a kho lei kaw. Izarei beisawzy âmo nata âmo ateiparuna vâta Khazohpa hiehâhna Izarei chô liata a vaw tlô (Ezekia 22:25,30-31). Krizyhpa a tah tlôh sih la, sawhkhâ miakha nata department sâkha liata eima hrialâhpazy, pôliti py sâkha liata eima hrialâhpazy, siku liata eima hrialâhpazy, awnanopa liata eima hrialâhpazy, NGO nata py kheihhawhpa liata eima hrialâhpazy a ru lâta eima tei thlah ha khiahta cha eimâ ngiapâna kyh liata a mo pasia awpa eima hneipa a châ thei aw. Chavâta a chatliena lâta ro ta Abeipa lâta ngiathaina a haw ta, teiparutuhpa châ khao lei awpa ta a hlâ hawpa a pha chai. Chata leipa ta la, “chyhsa a tei paru thaipazy he hmo pha leipa na âmo lâ na â vaw lie thlu thai kaw tyh” tah ei ta, saw chhâ nawh chhâ châta pha aw vei. Teiparupa ta a ypazy chhaota viari thô khona palôh hnei awpa châ vei. Viari thôpa hlâta Khazohpa chho hri ta, teiparutuhpazy châta thlah chhâ hripa ta hmo a tao thei via (Rawma 12:19). Teiparupa ta a ypazy cha Khazohpa ta a châh aw ta, a daihti ta liata a palyupalih aw ei.

Mara bieso sâkha ta “Awh a thi chy ta âmo nata âmo amâ pachu” a tahpa hawh ta, Marapasawzy nata Mara râh he a kaw duah hmeihseih mâh leipa pita, chavâta keimo nata keimo eimâ tei paru haw chhyh khiahta cha a duah thei aw mapi. Eima Autonomous District Council zy, eima reih zy, eima râh zy he khôtho lâ tawhta teipa ta ama y ngâ hai. Chavâta Marapasawzy liahsa ta eimâ pôhkha haw leipa khiahta cha leina lâ eima pangai laih thei. Pôliti kyh liata py nanopazy ta chi hro pho hropazy hnohta eima Mara heihpa kyhchhie za chho ngâ kawpa nata eima Mara heihpa za leih ngâ kawpa chhao a pha lei kaw. Mara bieso pyly ta “Awh-panô chana, sawhawh pahneina” a tahpa tlâ eima châ aw. Chi hropazy a ru lâta ama pahneih ngâ kaw aw.

Awnanopa liata chhochhi cha ateiparuna palôh a hnei rai ta hnei awpa châ vei. A chakaolâhpazy a tei paru thlah hapazy cha chakaona liata a ngia tlâh châ veih ei. Hrialâhpazy apôhkha leina nata ateiparupazy he awnanopa tha a pachhâ thei chaipa hmo châ ta, he he Sâtâ ta phie pahno haw ta a chatlie kawpa ta a hmâ lymâ. Sâtâ châta su eima pie awpa châ vei. Awnanopa chhihtuhpazy âmo nata âmo a tei paru ei sa la, amâ pôhkha leina awnanopa liata cha a hrana hmeihseih tlô thei leipa aw ta, awnanopa memberzy thlahpa kyh liata laiseih thai leipa aw ei ta, kyhpachâna diah via laih aw ta, buana nata buana sai ta â pazi ngâ thlah ha aw. He vâna he ta Mopathaihpa Pawla ta apôhkhana he teina to rai ta tei ta, rie apôhkha ha awpa ta maniah a pasyu (Ephesi 4:3).

Achhâna liata eima rei khopa cha, ateiparupa he Krizyna hro nata a hmie vei. Chavâta Krizyha eima châ khiahta cha sawhkhâ liata eima hrialâhpazy, pôliti py liata eima hrialâhpazy, NGO liata eima hrialâhpazy, siku liata eima hrialâhpazy, awnanopa liata eima hrialâhpazy nata eima khih kha, chi kha râh kha châ lâhpazy eima tei paru awpa châ leipa ta, a deichhy ta tha eimâ patlô raih-ri awpa a châ hri. Marapa chhochhi cha maluh chyhta eima châ tho ta, a kaw duah pathla mâh leipa pi ta, chavâta a lâhâh ta ateipa tlyma, a ru lâta ateipa tlyma, kheihawhpa ateina rai ta a tei khi châ mâh mapi.