Râh hro Mara (Diaspora Mara)

 “Râh hro Mara” tahpa he ta Marapasaw Mara râh liata pahrâ leipa ta râh hro liata a pahrâpa, khih a sa hawpa, â nua. Râh buana vâta tlyma, râh riethei sipasa tu vâta tlyma, mopakha khihsa tôhtu rairu tu vâta tlyma, hmo pha viapa hmô khoh vâta tlyma, râh panyu viapa pawti zy khoh vâta tlyma, chi hropa lapi/vahpa ta hnei vâta tlyma, sawhkhâ rai vâta tlyma, company rai vâta tlyma, Abeipa chakaona rai vâta tlyma, sôh tlupa (business) vâta tlyma, kyh nano nanopazy vâta khizaw chyhsa hluhpi ta ama liahri tlona nata pina râhzy puasaipa ta râh hro lâ amâ paih tyh.

Hehawhta râh hro lâ a paihna a vaw y ti heta, thokha cha âmo kho muarua vâta châ hlei vei. Chariah adyuhna liata ama tlô leipa vâta pahnietuhpa râh lâta sei ta a chhipa ta ama y. Hehe Biehrai Parohpa liata Izarei sawzy duahmo kha a châ. Asuria nata Babylaw râhzy lâta sei ta a chhipa ta ama y. Thokha deikua cha âmo khotlyna tlai ta râh hro lâ amâ paih hra. A kheihhawhpa kao vâta a paihpa a vaw châ hawpa chhaota, amâ paihna râh tawhta ama liahritlona pina râh lâ a lie heih awpa he hmo ru ngaitapa a châ tyh. A hluhpi cha a lie khao tyh veih ei. Izarei sawzy cheingei chhao kha, Ezra nata Nehemia zy chhihthana ry liata ama râh lâ a zâ lie heih awpa ta pasaipa ama châpa chhaota, a hluhpi cha Babylaw (atanoh Iran, Iraq) liata a ngua awpa amâ tly haw hri.

Atanoh khizaw duahmo saipa ta, râh hro lâta a paihpa dei châ leipa ta, âmo nata ama râh chhôh liata chhao ta thotlâh khih tawhta khihpipa (urban center) lâta chyhsa hluhpi cha amâ paih lymâ. Khihpipa liata cha siku zy pha ta, ti zy pha ta, telefaw nata elethi zy pha ta, kesih (gas) zy pha ta, thohna o nata dâh o zy y ta, sievawna lâthlôh zy phapa ta khihsa tôhtuna châta peimawhpa hmozy â ki viapa vâta khihpipa liata y awpa he amâ chhu khaipa a vaw châ. West Maraland (Nothla Mara râh) liata chhao ta, râh maluh â khophie cha eima khihpi Siaha liata eima y haw bâ.

East Maraland (Nochhi Mara râh) liata deikua cha khihpipa (urban center) a y mâh leipa vâta, râh hro lâ khihpipazy (Haka, Thlantlang, Matupi, Paletwa, Yangon, etc) liata rai a hria ngâpa tlyma, sôh paliepazy tlyma, pension ta a y ngâpa Marapasawzy châta Mara râh liata ama pina khih lâ a lie heih awpa ta rairu ama tah kaw aw. Chavâta a hluhvia zydua cha ama yna khihpizy liana heta a ngua pathla ta ama chuahmo a paryh thlah ha awpa ama lyu. Notla Marasaw râh hro lâ ta a y ngâpazy deikua pi cha Siaha khihpi eima hnei chhopa vâta eima râh lâ a lie heih awpa he bâh ta ta a nao via. He chôna chhao ta thokha cha ama pahrâna Lawngtlai, Lunglei, Aizawl, Shillong, etc zy liata pahrâ pazao achhuahpa khazie rakhama ama y hra aw.

Marapasawzy eima pahrâna India râh nata Myanmar râh khihpipazy lâ a paihpa dei châ leipa ta, a tlia tawhna kha ta, sawhkhâ chhie tu vâta nata râh riethei tu vâta Nochhi Marapasawzy a sâh a sâh ta râh hro (foreign) lâ amâ paih lymâ. Thokha Malaysia, Singapore, India (Delhi), Australia, USA, Canada, Norway, etc zy lâ a paih ei ta (thokha cha rai buakha vâ hriapa ama châ), thokha Notla Mara râh lâta ma zâ paih. Notla Mara râh lâ a zâ paihpazy he mawh la ama nôpaw, puhpa nata pihnô, heih-nawh sietano nata tusawzy yna lâ â zupa châ ei ta, 100 liata 100 Marapa châ pazao lymâ ei ta, eima biepipa “Râh hro Mara” tahpa he ta pahly vei. “Râh hro Mara” he ta Nochhi nata Notla Mara râhzy puasaipa ta râh hro lâ a paih hawpazy ky â nua via chai. Eima biepa siezie hawhta, Marapasaw râh hropa liata a pahrâpazy he “Râh hro Mara” (diáspora Mara) tahpa ta moh eima bi aw. Chatanachata, khizaw liata Marapa hly thôh eima y, tahna a châ: East Maraland (Nochhi Mara râh = Myanmar liata Marapasawzy yna), West Maraland (Notla Mara râh = India liata Marapasawzy yna) nata Râh hro Mara (râh hro lâta a ypa Marapasawzy).

Atanoh Nochhi Mara râh lâta hmahsiena thiehpa hluhpi khie Râh hro Marapazy hriapasana nata khih nata râh veina nata kyhpachâna theilâpazy ama châ. Malaysia, Singapore, Australia, USA, Canada, Norway, etc zy liata a ypa Râh hro Marapazy vâta Nochhi Mara râh liata ama chhôhkha sanawhzy nie nata do kyh liata a pazao lyh-lia thei ei ta, hawtizy siku kiah thei ei ta, tlâh leipazy thohna o a ngia thei ei ta, olyuzy kaw pha via laih ta, khih hluhpi cha mawtaw chhao â ngia thei haw bâ. Sôh tluana (business) kyh liata chhao amâ kaw duah pathao ngâ kaw hra. Nochhi Mara râh tawhta a siepa, atanoh Râh hro Marapazy he reithai tlâh ama châ hmeihseih.

Hlâno Mara phoryhpa (culture) liata cha, khih hro râh hro lâta a paih hawpazy “A lei haw” ama tah tyh. Achhâpa cha amâ paihna khih nata râh phoryhpa hawhta 100 liata 100 hroh bâ ei ta, ama pina khih nata râh veina âmo liata a y khao leipa vâta. Atanoh ta râh hro lâ a paihpa, Râh hro Marapazy, deikua he cha a lei hawpa (aleipa) châ veih ei. Ama pahrâna râh maih liata Marapa ama châna my leipa ei ta, Marapa nata Mara râh thapasana khâchâ hnei haw ei ta, Mara reih cheih ei ta, Mara awnanopa padua ei ta, Mara phoryhpazy ama chhy pazao lymâ. Reithai tlâh ama châ kaw. Thapawh chhao â chhih kaw. Nochhi nata Notla Mara râhzy châta byhnâ hnawh ama châ lymâ aw.

Eima pahrâna khizaw he buah kaw bâ ta, chavâta Râh hro Marapa maluh ama pôh via lymâ aw. He he a phana lâta hmâ thai awpa a peimawh. Chavâta eima Council he ta râh paduana (pôliti) kyh liata Marapa (Notla Mara, Nochhi Mara nata Râh hro Mara) zydua châta opi a châ awpa nata a châ thai awpa a peimawh kaw. Awnanopa lâ ta py lai viapazy – ECM, MEC, BAM (Baptist Association of Maraland) – chhao ta, Râh hro Marapazy mohhôhna nata deichhyna kyh phapazy patuapalua ta tha patlô awpa a peimawh kaw hra. NGO-zy chhaota Râh hro Marapazy he my lei awpa a peimawh kaw. Eima Council patohpatiana ry liata kô thôh padai ta eikha Global Mara Meet Siaha khihpi liata a hnei tyh sa la, he he ta Nochhi Mara, Notla Mara nata Râh hro Mara zy maniah pahniasa via aw ta, maniah a chahry pabaoh via aw. He Marapazy he khizaw liata Marapa a y chhôhpa cha châ pi ta, chavâta keimo nata keimo ta eimâ pasô vei khiahta cha maniah a pasô hro awpa y veih ei. Keimo nata keimo a pasô ha ei suh u!