Mahnô mahpawzy hro tawhta a chu awpa sâthôh eima hnei

Atanoh chhâtliasawzy ta mahnô-mahpawzy hro tawhta a chu awpa eima hnei hluh kaw. He châpaw (article) liana he ta sâthôh rei eimâ chhuah aw.

Sâkhana: Tiama nata hriapasana hro. Mongyuh officer thokha (pakhona ta Puhpa Locke) ta Marapa he chyhsa thathipa hawhta maniah ama hmô. Châhrasala, hezy heta mahnô mahpawzy kha ama za hmô pasu leipa ta he rohtuhpa ta cha ei pachâ.  Achhâpa cha, hlano Marâhpasawzy kha rai thata zâ hria ei ta, kô kha ta noh 365 a ypa liata noh 300 hlei rai ama hria. Ama raihria chatlupo ta a theilâpa (productivity) a papua nata papua lei tlyma, ama raihria dâh â thôhnazie ta a châ nata châ lei tlyma nata ama chichei bialopa amâ tly dâh zy a pha nata pha lei cha kao nanopa châ sa la, rai hria thlah hapa liata la, ama za hria kaw; thathipa za châ tiah-râh veih ei.

Mahnô mahpawzy kha ta, kyhchhina nata thina leina daihtizy tah leipa ta cha chhuti chhao za hnei veih ei. Lyu nata o rai ama hria leina daihti nata râh a khiepa ta chavah-chahaoh zy ama sao leina daihti zy liata chariah a dyuhna lâ sie haw heih ei ta, raitlyna daihti rai za hnei veih ei. Pawtloh nôtlohpa rai a hria leipa ama hmô khiata cha, “Tlâh va chi ma?” tahpa ta ama zâ hiahri tyh. He vana heta niedo (sâh nata chhâmeih) kyh liata ama zâ dôkhâ kaw hleikhô ta, zua awpa chhao ama za hnei thei tyh.

Chysia chhao amo tlai ta pala thih ama taopa tawhta a puapa pala cheingei ta sapa ta â ngia kawpa nata a lalôh kawpa ta a zâ bu a zâ sai theipa ama châ. Atanoh ta jean eima tahpa hawhpa he hlano Marapasawsy ta ama vaw hnei syulyu haw. Chapi-Ngiaphia reih ta, lahypa viahpakao, lahypa chaopasy tlâ ama za tah. Dawh-râ beihphiah, nyu nata phiathla zy kyh liata chhao tho nata ramawh zy tawhta taopazy hmâpa ta ahy hmaohmô leipata âdôkhâ kawpata khih ama za sa thei. Tlâh-lei ziah-leina daihti liata chhao thohna a thaipazy za y ei ta, chazy chata ama theina hawhta ama za mohôh tyh. Chavâta Lewin ta Marapasawzy cha phopi ta a duah mâh leipa, chi chyhpa (tribe) châ leipa ei ta, phopi laipa (nation) na ama châ a za tahpa he â do hmeihseih. Lewin heta Marapa eima châna maniah a vaw hmô pasu kaw.

Atanoh eima râh nata Marapasaw duahmo eima mo ti ta, châ a chu tiamana kyh liata zy, sawhkhâ raihria kyh liata zy, râh paduana pôliti raihria kyh liata zy, daoh taona kyh liata zy, sôh paliena kyh liata zy, contract raihria kyh liata zy, lyu nata sahdô taona kyh liata zy, sahroh awhva palypa nata ngakhaohzy taona kyh liata zy, ku raihria ta a hlawhfâhpa nata nie tluana chi nano nanopa raihria kyh liata zy, châ reina kyh liata zy, châ rona kyh liata zy, olyu nata khihtlâh pathaisana kyh liata zy nata Abeipa chakaona raihria kyhzy liata atahmâ ta eima tiamapazie hlâ heta tiama via awpa â ngiahpa ta â lâ. Mahnô-mahpawzy za hriapasana hro kha a chu sih la, Mara kawpa ta tiama pazao lymâ ei suh u!

Sânona: Adona nata ngâchhihna hro. Marâhpasawzy pi he chyhsa dopa nata ngâchhihpa hawhta pahnopa eima za châ. Mahnô-mahpawzy kha ta ama sawpâhzy châbi za khaw beih leipa ei ta, o chhao châhbi za khaw beih hra veih ei. Sahdô nata sahroh zy chhao a vaihtuhpa so awpa a ngiah hra vei. Aparupa hawhta ama pahno hapa chyhsa cha chyhsa ta ama mo dâh anano kaw ta, chahawhpa satlia-laihsazy châta cha ama dyhchâ hiah dâhdei chhao a kha pâ tyh. Nôpawzy a paru thaipa hawhta pahno hapa sawzy châ chhaota noza a chhih ngâsâ ta, ama dyhchâ hiah a kha thei hra. Chavâta chyhsa tyhpa châta cha chyhsa, sawhkhâ, khitlâh, nata py hmohneipazy paru achhuahna palôh rai za hnei veih vei.

Marapasawzy pi eima palôhrupa a do ta, eima chi-pho chhao a pathaih. Haipa bie rai za rei khoh leipa pi ta, chanô-chapaw châna moleina liata zâ ngia leipa pi ta, chyhsa hmo parupa chhochhi cha a pachâ chhao hmâh ta zâ pachâ leipa eima za châ. Khitlâh nôpawzy ta hmo pha leipa hawhta ama pahnopazy tao rarua a chhuahna za y vei. Reingia kawpa ta nata khitlâh reiraoh kawpa khih eima zâ sa tyh. Adona nata ngâchhihna kyh liata atanoh chhâtlia sawzy ta mahnô-mahpawzy hro tawhta a chu awpa eima hnei lai kaw. Mara kawpa ta ado kawpa ta hroh sih la, ngâchhihna he eima biepi chaipa châ lymâ heih tua se!

Sâthôhna: Riahphana nata sasyh angâna hro. Hlâno Marapasawzy riahphana kyh liata mohpathâhpa eima za châ. Lewin, Parry nata Mongyuh sawhkhâ molaipa thokhazy chhaota Marapasawzy pi eima riahpha zie thata ama reih. Mahnô-mahpawzy kha âmo sasyh a ngâ ei ta, chavâta lyurâh-obyuh puana kyh liata ama riahpha ta, chaoliah-masiah nata chakeih-chavyh zy chadai ngâh ei ta, chariah adyuhna liata chhaota ama riahpha ta ama chipa za y leipa ta, ama chheipâh chi hropazy ta Mara pasaiphazy ama za chi ngâsâ thlah ha tyh. Atanoh chhao, Marapasawzy ta eimâ chhuah hmeihseih khiah cha eima tao thei lei awpa nata thai thei lei awpa y vei. Keimo sasyh eimâ ngâ awpa tlâ a byuh. Mara rathli he chi hropazy rathli hlâta chhie via vei. Hlaotloh awpa ta, hmô pha hmô awpa ta, riahchhie leipa ta, mahnô-mahpawzy hawhta riahpha ta, sasyh a ngâpa ta, achhuahna laipa hnei ta, hmia tôh lymâ awpa tlâ a a peimawh.

Achhâna liata cha, Khazohpa hropa a vaw pahno leipa mahnô-mahpawzy hmahta khatlu ta raihria tiamapa, chyhsa dopa nata ngâchhihpa nata riahphapa ama za châ khiahta cha, atanoh Krizyhpa Marapasawzy chhochhi pi cha mahnô-mahpaw daihti no tahpa hlâta eima raihriana, achuna, chakaona nata hmotaopa maih liata, tiamana, adona, ngâchhihna, riahphana nata sasyh angâna hrozy he a hnei via pachai awpa eima châ. Hehawhta eima sie thei khiahta cha Khazohpa ta byhnâ maniah pie aw ta, Khazohpa a pahnopa nata Khazohpa ta a pahnopa phopi rôhnahpa ta eimâ kaw duah thei aw.