Khichhai

Marapasawzy pi ta khichhai kyh he â lâhâhpa ta za rei ngâh tyh mapi, byhnâ dythapa hmâh châ tlamaw lah, chyhsa chhiepa hawhta maniah hmô tlamaw lah ei, tahpazy eima chipa vâta. He rohtuhpa cheingei chhao he ta rei ngâh kaw hra leipa na ta, châhrasala râh hro lâta ama hrozie zy saipa ta nata eima râh liata khichhai vâta rairuna a tlô ngâpazy saipa ta, rei awpa daihti a tlô haw bâpa ta ei pahnopa vâta kâchhie kawna chô ta, a rei ngâh leipa zydua vyuhpa ta bâh ei vaw rei thlah ha tua rai aw.

“Khichhai cha byhnâ na a châ” tahpa ngiapâna he Mara krizyhpazy palôh liata â vaw i kaw. Chavâta Marapasawzy khichhai eima pasô kaw sai. Khichhai a ly leipa nata khichhai ta ama tlô thei leipa chhôhkhazy cha ama kyh thata za rei tyhpa châ ta, saw chhâ nawh chhâ taihta byhnâ to leina chhao a châ thei zie, ama za rei tyh hra. Kri vaw zyh pi ta, eima Biehrai chhao ta khichhai patlôsa ta khichhai chô liata pha awpa kao lâta pachuna a y hrapa vâta (Zawba 31:32; Mathai 25:35; Rawma 12:13; Hebrai 13:2), Mara Krizyhpazy khichhai chô liata eima pha kaw sai. Alypa a châ ngaita kaw.

Châhrasala, tah thlah ha tua ei sih. Atanoh eima khizaw he â nano kaw bâ. Marapa chhôhkha cha hluhpi khihpipa liata sawhkhâ rai hriapa nata a hlawfâh ta niedo tlua chhyhpa ta eima y. He hry liata thokha cha my nata zâ thla awpa ama pavia thlah hana daihtizy a y tyh. Cha chôna cha ta khichhai tlô pâ lao heih ei ta, pachârôhpa ta ama y tyh. Châchavata eimâ pachuna chhao khichhai chô liata pha awpa lâ chhâh deita ta a daih khao leipa sa la, khichhai châ dâh thai awpa na ta, a châh ta cha khichhai châ lei dâh chhao thai awpa a pachu awpa daihti a tlô ha bapa ta â lâ.

Hlâno daihti liata cha vâtlâh riebu nata pati daoh zy a za y leipa vâta, khitlyhpazy cha amâ riena khih liata chhôhkhazy ta ama o liata ama patlôsa thlah ha leipa khiahta cha a rie nawpa su nata nie awpa hnei aw veih ei. Kha daihti liata cha khichhai hnei chhao a rai vaw ru tu thlyu aw vei. Kô kha chhôh nie awpa sâh za hnei thlah ha ei ta, awhti, awh, satlaw, ngachawhpa, barô, achhi, etc zy za hnei thluh thlah ha ei ta, chavâta khichhai hnei a ngiaroh veih ei. Cha chôna chata chhôhkha thokha cha khichhai rai ta a patlôsa khoh leipazy ama za y tyh thlyu aw. He rohtuhpa ta ei pangiasana dâh ta cha, hehawhta khichhai a zâ patlôsa khoh leipazy he a tlâhpipa ta riethei viapa, ochaki ochapâ saw za châ thei aw ei ta, ama hneina ta a zâ daih ngâsâ leipa vâta hmiachhie noza tah thei khao leipa ta khichhai ama o liata ama za patlôsa thei leipa châ chai sa la ei pangiasa.

Atanoh chhao Maraland thotlâh râh khi hluhpi liata riebu nata pati daoh zy a y leipa vâta khichhai zy ta chyhsa o liata tlô thlah ha leipa ta cha tao hro nawpa y thai vei. Chavâta khichhaizy pita khichhai châ dâh eima thai ngaita awpa a peimawh kaw. Hlâno hawhta kô kha chhôh nie awpa sâh a hnei thlu thlahpa y thai khao mapi. Tâkâ sôh ta my nah zâ nie awpa a tlua chhyhpa sai eima châ bâ. Chavâta khichhai a châpazy pi ta a saphâ, dailua, sathaw, satlaw, hmiahkhu, etc hawhpazy a phao ta eima tlôna chhôhkhazy pie thei lyma si la, eima tlôna o phao a pahua kaw aw. Chahawhta niebaw lâta a phao awpa ryhpaoh leina a y ha khiata cha a tâkâ sôh lâ chhâ ta thyu hra awpa a peimawh kaw. Eima thyu awpa ziepa deikua hmo mâ nata nie mâ yzie lymâ hawhta thyu awpa a châ. Eima tlôna ozy ta a tâkâ lâta la awpa ama kâ a chhie thei. Chavâta khih liata daohzy a y khiahta cha, cha daohzy tawhta khâpa hmozy chhâ ma chalei ta eima tlôna chhôhkhazy pie cheingei awpa a pha. Dao a y vei khiahta cha, “hawtinah châ” tahpa ta phusâ tâkâ lâta tlâ pie awpa a châ. Keimo ta cha he chhôhkha liata a eikha eima tlôna a châ thei. Châhrasala, he eima tlôna chhôhkha he ta keimo hawhpa khichhai he ei hluhpi a vaw hnei haw thei na, tahpa my khah ei suh u.

Khihpipa – Tipa, Siaha, Aizawl, Shillong, Guwahati, Delhi, Matupi, Thlatla, Hiakha, Paletwa, Akyab, Rangoon, Kuala Lumpur, etc, etc, – zy liata deikua cha riebu nata patidaoh zy y khai ha bâ ta, chavâta khipipa liata a ypa eima chhôhkha, viasa nata hmiapahnopazy ta ama o liata tlô awpa ta maniah ama hrua hlei vei khiahta cha, chyhsa o liata tlô ngâ nawpa daihti châ khao vei. Hotel liata tlôpa nata niepa a pha chai. Phusa â khina taih a hnei leipazy châta a byuh ngâsâ hapa tah leipa ta cha khihpipa lâ khitly ngâ kaw awpa châ hra vei.

Tlâh lei ziah leina nata kheihhawhpa rairuna zy vâta deikua la chhôhkha sanawh nata viasa richâh o liata a lei thei leipa ta tlô â ngiahna daihti chhao a y aw. Hehawhta khihpipa liata sanawh chhôhkha nata viasa rihchâh o eima tlô tita chhaota eima nie mâ dâh dei chhâ cha eima thyu hra awpa a peimawh kaw. Chahawhta tlâh leipa, rairuna a tyhpazy nata sipasa riethei kawpazy na tah leipata, khipi lâta khi a tlyh hropazy - sikuhawtizy, sawhkhâ rai vâta a tlyhpazy, sôhdaohpa nata sôhpaliepa zy – ta cha hotel liata tlô nawpa hihsâ pâ cheingei ta sôh a phao ta khitlyna lâ cha sie tyh awpa a pha.

Chhôhkha sanawh nata viasa richâh zy ta ama o liata tlô tyh awpa ta palôh hmeihseihpa ta maniah ama hrua ha tyhpa vâta eima tlô tyhpa chhaota, keimo eima tlô hleikhô ta mo hropazy hyhkha a vaw chhi ta eima tlô tyhna o liata vaw tlôkhei awpa pha hra vei. Atanoh khih pipa hro eima pahno awpa peimawh ngaitapa sâkha cha he he a châ. Nie nata do rairuna dei vaw châ khao leipa ta, chhôhkha thokha ta cha ti zy dâhdei chhao hnei pha thei leipa ei ta, ama o zy vaw lai tu leipa ta, chavâta atyu-azia nawpa chhao âmo chhôhkha sai ta hmahta a cha-ie kawpa ta khih a sapa ama châ hôlô. Cha bailai ta khichhai ama vaw hnei pâ heih nah ta cha rairuna thata amâ tyh tyh. Khih pipa liata ie-o (toilet) zy cha ti hmâpa châ khai ha bâ ta, chhôhkha hluhpi ta cha ie-o he sâkha ta vaw hnei thei ei ta, chavâta âmo chhôhkha hmâ awpa ta hmahta amâ daih lei thlah bao na ta, khichhai ama vaw tlô pâ heih nah ta cha, ie-o hmâna nata pathaina kyh liata thata a bua ha tyh. Chadei châ vei; khih pipa liata a ypazy cha ama sawzy siku a kiahpa sai vaw châ ei ta, khichhai khâ ama hnei ngâ thlah hapa vata ama sawzy châ reina daihti nata su chhao a pabua khai ha tyh.

Khih pipa liata châ a chupa, hostel liata y leipa ta o a tlôhpa sikuhawtizy o liata chhochhi cha tlô tiah-râh awpa châ vei. Phusa amâ phahla tho ta, ama châ rei nawpa daihti a bua khai ha tyh. Khichhai hnei hluh tu vâta niedo a phahla hapa nata exam chhao a fail hapa sikuhawti ama y hôlô haw bâ. Marapasaw khih pipa liata khih a sapa khazie rakha tlyma cha khichhai ama hnei hluh tu vâta ama sawzy hro rao ha ta, amâ chuna chhao bua khai ha ta, ama khihsa tôhtuna kyh a rao pâ hapazy ama y haw hra.

Khichhai thokha heih ta phusa tâkâ ama hnei thlah hapa chhaota ama tlôna o liata ama nie nata do mâ  tlaw kha chhao thyu khoh leipa ei ta, khih liah lâ deikua ama kho taw ta phusa ama hmâ thlah ha heih tlôh. Khichhai thokha la byhnâ ama châ tlai aw. Khichhai thokha deikua cha byhnâ châ cha rei lei ta, rairuna a tlôkheituhpa, sikuhawti hro a paraotuhpa, chhôhkha khihsa tôhtuna a paraotuhpa, nôpi-nôva likawh liata rairuna a tlôkheituhpa nata a chhaihna taihta a tlôkheituhpa, ama tlôna chhôhkhazy kyhchhie thata a rei thaipa moleipazy ama châ. Ama o liata ama tlôna chôta ama tlôna chhôhkhazy kyhchhie a rei thei thlah hapa khichhaizy he chyhsa chhie chaipazy châ ei ta, hehawhpazy he la patlôsa leipa chhao ta byhnâ to leina châ hraoh aw vei. Thokha ta ama tlôna chhôhkhazy sahma zy do thlupa ta ama pari thlu pâ tyh heih. Hehawhpa khichhaizy he cha byhnâ châ tiah râh aw veih ei; Sâtâ tlao ama châ.

Eima Maraland he thotlâh kaw chy ta, eima khihsa rie chhao thei kaw chy ta, chavâta Marapasawzy pi chyhsa o liata khasâ rakha taih ma cha eima tlô chy aw. Achô liata eima rei hawpa hawhta, Marapasawzy pi khichhai chô liata eima pha kaw sai. Khichhai ama vaw hluh pâ tu tita deikua khichhai a daotuhpa chhôhkhazy châta sôh lâta nata kao nano nanopa liata rairuna a tlôkhei ha tyh. Chavâta Marapasaw khitlyhpazy pi ta, a lei thei leipa ta sanawh chhôhkha, viasa rihchâh, khih kha râh kha, nata hmia pahnopa zy o liata tlô awpa â vaw ngiah ha khiahta cha khichhai châ dâh thai kawpa ta eima nie mâ zy eima thyu hra awpa â ngiah. Chahawhta a lei thei leipa tah deileipa ta cha khih pipa hluhpizy liata cha hotelzy a y khai ha bâpa vâta hotel liata tlâ tlô ta, sanawh chhôhkha, viasa rihchâh, khih kha râh kha, nata hmia pahnopazy pabua lei dâh ta, khichhai châ lei dâh chhao eima thai bâ hrana daihti a châ ha bâ hra.

Ama o liata eima tlô leipa chhao a, maniah a saihei kawpazy ta cha a pati ni eta maniah ama hrua thei thlah haw. Tlô thlu ta, ama chhôhkha pabua hlei leipa ta, ama o liata pati eikha va niepa â daih kaw. Khichhai châ dâh thai awpa nata khichai châ lei dâh chhao thai eimâ chu thei bâ khiahta cha chhôhkha hluhpi rairuna a pathlâ khei tuhpazy eima châ aw. Eima tlôna chhôhkhazy rairuna a tlôkheituhpazy châ leipa ta byhnâ a tlôkheituhpazy châ a chhuah khai suh u! Chavâta Marapasawzy pi ta khichhai chô liata eima phapa dei châ leipa ta, keimo khichhai eima châ tita chhao ta khichhai châ dâh thai awpa nata khih pipa liata cha khizaw châ lei dâh thai awpa chhao a peimawh kaw bâ.