AMERICA MARASAW (American Mara Community)

Myanmar râh riethei sipasa tu vâta nata pheisaih ryureina ry liata riethei tao tu vâta USA nata râh thokhazy ta kô hrawh hlei a vaw sie hawpa tawhna kha ta Myanmar chyhsa abohna tluatuhpazy (refugees) ama râh lâ a ngia pasai pathao ei ta. Myanmar tawhta Thailand sie pahliepa ta Malaysia lâ a râ ei ta, chatawhta USA nata râh hro lâ zy cha ama sie. Thokha cha India (Delhi) tawhta a siepazy chhao ama y hra. Malaysia nata India zy he abohna tluapa ta ama siena liata amâ chhâh chyna, “râh nona” tah ei ta, a ma y patlô nawpa USA, Australia, Norway, Canada, etc zy he “râh thôhna” (third country) ama tah.

Nochhi Marasawzy chhao abohna tluapa ta a hluhpi sie hra ei ta, USA atlôpa ama hluh chai chy. Atahmâ USA liata Marapasaw sâh kha (1000) hlei tlai ama y haw bâ. Delhi nata Malaysia liata Nochhi Marapa a y chypazy cha kao nanopa ta soh chy sih la, USA tah leipa ta “râh thôhna” liata Marapasaw ama hluh chaina cha Australia châ ta, he liata 300 daihmâ ama y haw ei aw. Cha leipa ta Canada, Norway, Denmark, Sweeden, Germany, New Zealand nata Japan lâzy chhao ama sie hra. “Râh thôhna” râhzy hry liata he rohtuhpa ta ei mo cheingei ta ei hmôpa cha USA (America) Marapasawzy ama châpa vâta âmo duahmo he reih chai aw pi ta, he hawhta America Marasaw (American Mara Community) kyh eima reipa he ta râh hro lâta a sie hawpa Diaspora Marasaw hropazy duahmo chhao a tlâhpipa ta a chakhi thei hra aw. He biezy he atlia liata USA lâ eima chhôhkha ta eima va chakao nota eima hmô dâh tawhta ropa ama châ.

A sâkhana ta, America Marasawzy raihria ama tiama ngâsâ thlah ha. Hria leipa ta cha nie a y thai awpa a châ lei vâta tiama ta ama hria lymâ. Noh kha ta a tlâhpipa ta dawh 8 chhôh hria ei ta, hâta eikha ta noh pangawh hria ei ta, dawh 40 chhôh ama hria. A dawh bitaipa khôlâ (Over-time) rai hria awpa ama hmô theina daihti liata cha hâta eikha ta dawh 50 chhao ama hria tyh. A rai, a saomâzie (skill) nata thaina (education) yzie lymâ hawhta hlao ei ta, â hnai chaipa ku raihria (skill a hlao leipa) cha dawh kha ta America dollar ta tlaw 8 tawhta tlaw 10 rachhôh a châ. He he India tâkâ ta châ mawh sa la, dawh kha ta Rs 600 rachhôh ama hlao tahna a châ. Plumbing (tipai tao), electricity, etc lâ chhâh athaipazy ama hlao hluh via ta, computer athaipa nata degree phapa ahneipazy â sâh via heih. Marapasaw âmo tata niedo daoh a pahypazy chhao ama y haw hra. Chhie (tax) nata medical insurance zy chakâpa a châ khai tawhta a hlao a hnai via chaipazy he ta India tâkâ ta thlah kha ta thy charu tawhta thy charie likawh ama hlao. Chahawhta ama hlao a hluh kawpa a lyu no ta, o tlô mâ nata hmo mâ â sâh ngâsâ thlah hapa vâta huhnopa ta thla ama pachhâ theipa tah leipa ta cha thlai ta kaw hneirô khi la tloh hmeihseih vei. Atlâhpa ta y ei sa la, raihria ama pazao lymâ thei khiahta cha azyh azyh ta cha ama khihsa tôhtu chhao â kaw chhua laih hra aw.

Bus nata taxi zy ama hluh lei tho ta, ama daihti amâ mohchhih kaw saipa vâta, Marapasaw ama zydua rô ta mawtaw ama hnei khai. O phapa a chalei hawpa chhao ama hluh via lymâ. Ama sawzy siku phapa liata kiah ei ta, châ chhao kaw thai pathao ei ta, presidential lymâ adaopazy chhao ama y pathao laih haw hra.

Awnanopa kyh liata deikya py no py thôh lâta a chhaih pôhzawh haw ei ta, Mara reiraohna chhao a hria daihmâ tyh. Châhrasala awnanopa py nanopa liata y hra ei sa la, Marapa châna liata khâchâ a pôhkha ha awpa a chhuah ei ta, hehawhta apôhkhana a y lymâ thei nawpa ta Mara Community Committee chhao padua ei ta, kô kha ta eikha conference hnei tyh ei ta, hetawhta deikua cha kô no padai ta eikha hnei bâ awpa amâ chhuah. Thokha ta he hawhta eina chho ei, “Râh hro lâ ei pua tawhta na Marapa ei châna a pahno via pachai na ta, Mara chysia, niedo nata phoryhpa (culture) zy ei pasô via pachai.” Â do kaw. Ama Mara kaw.

Nochhi nata Notla Mara râh liata Marapasawzy pi ta America Marasawzy tawhta a chu awpa hluhpi eima hnei: Hriapasana zy; khichhai nata o charei-chakâpa chô liata phana zy; chhôhkha, khihtlâh nata râh châta a pasaina zy; Marapa ama châna zakhei leipa ta a palaikhei ei ta ama pasâhsana zy; ama sawzy Mara moh bi lymâ ei ta ama o liata Mara reih ama chei lymâna zy nata chhâ zydua ta Marapa ama châna chhy lymâ awpa amâ chhuahna zy; Awnanopa py nanopa liata y hra ei sa la, Marapa châna liata amâ pôhkha kawna zy; Krizyhpa pha kawpa châ ei ta Krista châta amâ pasaina zy; ama pastorzy nata awnanopa chhihtuhpazy hriapasana zy. Rei awpa a hluh kaw. Âmo vâta Nochhi Mara râh hmahsiena thata a tlô. Mawtaw lâthlôhzy vaw tao ei ta, siku ozy vaw sa ei ta, electricity zy vaw pakhaih ei ta, achhyna ozy vaw sa ei ta, tlâh leipazy thohna o lâ siena sôh a vaw tôh ei ta, sikuhawtizy achuna asâhpa lâ ama sie thei nawpa ta vaw bao ei ta, leipaliezy vaw tao ei ta, ama chhôhkha niedozy a vaw tôh ei ta, ângiahpa hropa hluhpi ama vaw tao lymâ.

“India (Notla Mara râh) lâta nama zâ hlaohfâhpa nata America liata namâ hlaohfâhpa ânanona a y ma?” tahpa ta pakha pano ei hiahriana hehawhta einâ chhy ei. “A hlao a pha viapa cha kao nanopa châ sa la, America liata cha Bâramâpa tahpa ta mohnaona dao leipa pi ta, eima hria mâ maniah a bâhpa chhao y leipa ei ta, chavâta heliata a hlaohfâhpa na eima paphasa via.” He rohtuhpa ta, atahmâ cha “Bâramâpa” tahpa tlyma, “Eidepa” tahpa tlyma hmâ khao leipa pi ta, kyh a pachâ kawpa ta na Nochhi Mara, Notla Mara tahpa ta eimâ aw haw bâ. A mohnaonazy chhao y khao vei, tahpa ta chho ei na ta, “A pha kaw bâ chu” ama tah. “Mara râh lâ vaw kua heih awpa namâ chhuah ma?” tahpa ei hiahrina deikua, thokha ta cha vaw kua heih awpa kho kaw ei ta, thokha deikua cha “vaw kua thai khao bao aw mapi” tahpa ta einâ chhy ei. Atahmâ cha eima khizaw he buah kaw bâ ta, America tawhta Siaha nôh no ta vaw tlô thei haw bâ aw ei chi ta, chavâta vaw tly tyh muh vy, tahpa ta hrua ei na ta. Mara râh lâ a vaw kua khohpa nata a vaw tlyhpazy ei chi ta, Siaha khihpi he nama khihpi hawhta pachâ u la, MADC he nama opi hawhta pachâ lymâ muh vy, tahpa ta bie a ta pi ta, eimâ pathlie haw.