Hmâ tlâhpa nata Hlaotlohpa Chyhsazy Hro

(He châpaw he Deiva Mara Daily ta a papua haw)

Einstein ta, tao tyhpa tao pazao ngâ thlah hana chôta, theilâ (result) nanopa (pha viapa) hnabeiseihpa he palôh a ki leina ama tahpa cha a châ, tahpa ta a rei. A yzie: Hmo phapa nata theilâ phapa hmô khoh sai pih ta, chahawhta theilâ phapa hmô thei nawpa ta tao awpa nata tao dâhzy y ta, eima tao dâh tyhpa tao pazao lymâpa ta theilâ phapa nata nanopa a pua hlei vei khiahta cha eima tao dâh pa nano awpa a peimawh aw. He he atahmâhlâ Mongyuh reih ta paradigm shift (sie dâh thiehpa) tah ei ta, achhuahna a hlaotloh sa la, theilâ phapa nata nanopazy hmô thei nawpa ta palôh phaozie zy, hmo saizie zy, hmo tao dâh nata raihria dâh zy nata sie dâh zy pananopa ta hmo pachâna thiehpa nata sie dâh thiepa tlua ta hmâpa lâ châh â nua.

Mara Paw Byhnâ Awna

Khazoh pha ta Marasawzy,

Lâthlôh do lia khâ chhi sa la;

A bietai râh Mara tlâhzy,

Byhnâ vao via lymâ sa la;

Râh chô lia ryurei kôzaw se!

Khazoh Sâbu Chakhi lei Marazuahnô

Khazoh sâbu chakhi lei vâ,

Ei saduthlie Marazuahnô,

Hawka zoh ta tlâh hro kiah haw.

Keima chhao cha bôhpi laih tawh,

Ei chôhsu nô, tiriah zuah nah

Hro chhôh châta a kao’pa ta,

Dyhchâ khôpheih ’kiah bâ hra aw.

Na Lo Hmâ Kaw Dia, Mara Thyutlia!

Kyhpachâ lyuhbie thlôhzy a hlâ ta,

Chhôhkha lôhkhy viasa phazy nah,

Lôhhia lei ta a kao pha lichih ta,

Heih lei râh lâ miah khôsai ha chi;

Na lo hmâ kaw dia, Mara Thyutlia!

Râh pha n’awpa kyh zy rohpady ta,

Kô pha tlô mokhâh khoh tyhpazy,

A pawti thlôh zy khoh hmâ lei ta,

Chhâzaw râh lâ miah siesai ha chi;

Na lo hmâ kaw dia, Mara Thyutlia!

Chi nata pho kyh na pachâna zy,

Khitlâh châ na hriapasana zy,

My aw mapi, Mara Thyutlia!

Na hnazô hmô khao vei hra ei si,

Na moh pha eima za reih tyh aw.

A tlâhpa ta, Mara Thyutlia paw ngia!

Mara sopavaw ao ngia chai zy ta

Hla ngia to cha paryhpa tyh ei se!

Mara tho sôh maihtopaw ngia zy,

Chhâzaw râh lâ cha zi laih ei se!

A tlâhpa ta, Mara Thyutlia paw ngia!,

Tahmâ lôhpasa a chhaih chy hr’ei si,

Noh hro lâ Bei chhuahdy o rôhnah lia,

Vâ tota hla ngiazy paryh ta,

Chhâzaw ly ta charei khoh aw pi.

A tlâhpa ta, Mara Thyutlia!

Râhsaw Pha

Râhsaw pha cha,

“Râh ta khâma eina taopa aw” tah châpa ta,

“Râh châta khâma ei tao aw” tahpa tlao a pachâ tyh.

Liah-ri ei â Marazuahnô

Liah-ri ei â Marazuahnô,

Mara kuzô thai chainô y,

Chyna posâh Â-uh châta

Na sapa mah y!

Palâ Tipo

Palâ Tipo, Khazoh hmosai sôh,

Marasawzy alyna tihnawh thlôh;

Sai na ai vei, Khazoh kuzô ngia,

Tly na ai vei, Mara Tipo ngia.