A Tlâhpa ta, Shillong!

Meihthâh zawh, meisakô thlihua nai zualua tlâh,

Shillong Khih lâ sona tlua ta eima za sie;

Marasawzy chhuah hmeihseih ta, tiama ta,

A chu pi ta, hlaotloh cheingei eimâ chhuah.

Mara Sikuhawti Sie Heih Daihti

Noh patu thai châ sa la cha,

Ei viasapa ‘Hlihchhy’ nata

Ei viasanô ‘Hlyâh’ zy chhao,

Theilâ pawpi zy lyu laih ta,

Lôvyh, siahly a châ chy’pa

Ei kho thlâ bao na.

Mara Sikuhawti

“Khazohpa china cha sona thaby a châ.”

Ngôh tâkâ hlâ sôh via thaina sona;

Miah tlôkhei aw, khizaw pha viapa lâ,

Byhnâ to hnawh, sôh chai thaina sona.

Mara Thyutlia

Maraland â bôchhâ Mara thyutliazy,

Ngâchhih ta râh châ hriapasa ei s’u;

Khazoh kuhria Maraland he Mara thyutlia zawhzi,

Rôhnah sa la, rôhnah via rili se.

BOSS PHAPA, BOSS CHHIEPA

(He châpaw he Deiva Mara Daily ta a papua haw)

Eikha cha eima nô Vânoh Nô ta, “Châbu chalei pahâh kaw chi ta, na chalei chiehpa zydua he na reih khai haw?” tahpa ta eina hiahri. Kâchhie pâ kawna chôta, “Y, a chhôh liata khâpa bie ma a y tahpa la ei chalei p’aw nah ta ei moh tyh na” tahpa ta ei chhy. Hehawhta eima nô bie hiahripa heta châbu he a chalei deita pahâ leipa ta a rei chhao a tiama via awpa ei châzie eina pahao kaw. Zâkô November thlapa liata Malaysia râh lâ ei tly nota Kuala Lumpur airport châbu daoh liata châbu sâkha tlai cha ei mo na la kaw ta, a mâ ru kaw hra sa la, châbu chalei nawpa nata papua nawpa châta cha a hnei chhôhpa sôh chhao a i leipa ei châpa hawhta thlai ta ei chalei heih. Robert I Sutton ropa, Good Boss, Bad Boss (New York/Boston: Business Plus, 2010) châ ta, a zydua ta reih khai mâh leipa na ta, ei rei chhôhpa khaihna tawhta eima râh liata hyuhtuhpa/chhihtuhpa rai a hria ngâpazy ta a chu thei awpa eima hneipa thokhazy a chyu tata ei vaw palâsa. Hyutuhpa/Chhihtuhpa reina ta Mongyuh reih “boss” he eimâ hly chy aw.

MUSIC TA ARÂPA: KHAZOHPA A PALYUPALIH AW MA?

(He châpaw he Deiva Mara Daily ta a papua haw)

Atahmâ hlâta eima râh liata chareipakhyna nata ahmânazy liata music a chatlie thei chaipa hawhta tô ta, hla chhao sa khao leipa ta a rôhpa ta nôtloh pawtlôh pizy ta hroh a râ ta a râpa kyh he a pasoh kawpa ta eima pachâ beih tlyma? Eima râh liata Khazohpa achhyna nata chakaona chi nano nanopazy vaw tla tyh ta: lyna sâhpa (Maw reih ta “hlim sang”) nata reih thei leipa zy, camping nata crusade-zy tawhta pachha châ a pahno pasiana pipathina zy, sapa a pielyupa nata hnohsy thlupa zy, Bethel chakaona zy, siphiah/alei liata pao ta kaw thyu heihpa zy, hmopiepa chakaona (ngiapâna chitupa nata o pahypa) zy nata music ta arâpa zy. He ahrana nata chakaona chi nanopazy tawhta a vaw pihpathi hawpa nata a Krizyna hro a kaw pitloh via hawpazy ama y cheingei aw. Chahawhpa hmo phapazy vâta alypa a châ kaw nota, pachâ khi a tlohpa hmo deikua sâkha a y. Hehawhpa ahrana nata chakaona chi nanopazy liata a hlao hawpa nata a hra hawpa hluhpizy hro liata adona nata raihria tiamana hro hmô awpa a y tu leipa hi!

Marapa nata eima Hlaphôh Phoryhpa

(Mara People and our Poetic Culture)

(He châpaw he Deiva Mara Daily ta a papua haw)

     Marapa he hlaphôh (poem) ta bie a reih tyhpa chi (poetic community) eima za châ. Châropa y hlâ tawh chhaota hla nata phôh zy hmâpa ta bie za reih tyh pi ta eima zâ chho tyh. Chhâreina (genealogy) chhao phôhpa hawhta pahâh kawpa ta saw nata nawhzy eima za chho tyh hra. Chavâta Marapasaw hluhpi ta ama pathlatuhzy chhâ hrawh chhâ kih taih ta ama za reih thei. Hla nata phôh nata chhâreinazy tawhta hlâno Mara chithâtih (history) hluhpi pahno theipa ta ama y.