PHO LÂ LÂ NOTA A TOBI DÂH

(He châpaw he Deiva Mara Daily liata papua hawpa a châ)

Marapasawzy ta eima pho lâ eima lâ nota eimâ tobi dâh awpa kyh internet nata magazine thokha liata ei ro hawpa ta pahno na ta. Châhrasala eima tao tyhpa eima tao ngâ thlah hapa vâta, cha ei article parohpa cha baichhi via heihpa ta atahmâ ei vaw ro heih. He article he ta chapawzy a tobi dâh â nua via chai.

Sawh lâ eima kia tita nata lâ hropazy eima lâ ti heta, chapaw nawh cha dua kalâpa a peipa ta tlyma, dua kalâpa a lyupa eima chaopasy ry chô lâta a saih thlupa ta tlyma a tobi pi ta, eima chai tawhta achô lâ khâpa hmâh a ky leipa ta, eima sasaihpa ta y pi ta, eima lâ tyh. A châhta cha eima dua a peipa hra ta eima ziehchhôhpa su chahru khai thei leipa ta, eima chaopasy-ry zy pua eima palâ khai ha tyh. Thokhazy chaopasy-ry heih hra ta vaw chha tu leipa ta, eima chapaw châna chhao a vaw hno pâ khai ha tyh. Eima lâ a ngia ngaitapa nata eima pasô ngaitapazy hehawhta thlahrua daihmâpa ta chapawzy ta eima lâ thlah ha tyhpa he ta, atahmâ daihti liata a mohtuhpa thokha châta cha kâchhie â chhih pâ kaw tyh. Chi hropazy châta chhao mo ngiaryh a chhih tu hra vei. A châhta cha Via nawh ta nâmo lâ la a sexy kaw na, maniah ama tah pâ tyh.

MARA MOH, MARA CHI NATA PHO PABOHSANA

(He châpaw he Deiva Mara Daily liata papua hawpa a châ)

Facebook liata ei vaw pahlao tawhta Marapasaw châta Mara moh tlai hneipa a pha chaizie ei vaw pachâ pathieh heih. Facebook tahpa cha internet khizaw liata bie to bie zaw rei khohna a châ. Facebook a vaw y pathao tawhna kha ta, chyhsa hluhpi ta ama viasa châ awpa nata ama group liata a hlao hra awpa ta na hrua tyh ei ta, châhrasala a pyh thei tyh va na. A chhâpa cha Facebook ta ei raihria daihti a la hluh tlamaw aw, tahpa ei chipa vâta a châ. Atahmâno deikua he Taiwan liata furlough ta eima y chhôh châ ta, chavâta daihti a rakhapa ta ei hneipa ta ei pahnopa vâta Facebook khizaw liata ei vaw charei pathao hra. Kô 59 lâ a ngia ngâpa châta cha Marapasaw Facebook a hmâhpa hry liata uthei chaipa chhao ei châ thei.

Cha ta, Facebook liata ama viasa châ hra awpa ta hruana ei dao ti ta, Mara moh tlyma, Mara pho moh chhâ tlyma a hneipa cha a palalao leipa ta ei py lymâ. Mara moh nata Mara pho moh a châ leipa deikua ama thâtih rona lâ ei mo tua cheingei tyh. Mei saih lâ zy nâ phôh tlamaw awpa hmah châ lah ei, tahpa ei chipa vâta. Râh hro lâ liata a ypazy châta chhochhi cha Mara moh hneipa a vaw peimawh via pachai heih. Mara moh (keimo lâ moh) a phaohpa cha moh rei paw nahta thlai ta eimâ pasô haw tyh.

KHICHHAI NIE LAIBÂHPA

(He châpaw he Deiva Mara Daily liata papua hawpa a châ)

Sâlâ kawpa hawhta, eima chyhvia nota, khichhai eima hneipa eimâ ly kaw tyh, khichhai nie laibâhpa ahmie pahâhpa nie awpa a y awp vâta. Ei paw nata ei puhpa zy he khihpipa lâ châ a chupa, sawhkhâ rai ahriapa nata a tlyhkapa châ ei ta, chavâta khichhai eima hnei ngâ thlah ha tyh. Kha daihti liata cha khichhai ano deita pati paniesa tua tyhpa châ ta, chhôhkha cha khichhai a nie khai tawhta a nie laibâhpa nie tyhpa a châ. Ei puhpanah hnohta a laiseihpa châ na ta, âhmie pahâh viapa niena special daihti liata cha ei paw nawh ta pati nie eina vaw hrua tyh ei. Hehawhta khichhai pasô pi ta, ngiaryh kawpa ta pa-ysa ta niedo pahâh chaipa paniesa ta pasiesa eimia chhuah tyhpa heta Marapasawzy pi he chi sopa nata phopi rôhnahpa eima châzie a palâsa.

Eikha cha ei paw nawh ta khichhai hnei ei ta, a sie khai tawhta a nie laibâhpa nie awpa ta eina vaw hrua ei. Ama khichhai cha awhkhy hrâhpa tupa ei ta, awhsa cha a zydua ta khichhai nie awpa ta ama pathlu khai. Ei uhta nata khôpheih liata a tyuh pi ta, khichhai pati niepa cha eima mokhâh. Ei uhta mo cha awh tihmô liata a choh ta, keima moh deikua a chaoleimachôh liata â cho. Khichhaipa ta awh tihmô la ta a niepa nah ta ei uhta ta, “Laiu, keima eih a nie haw” tah ta, palôh chhâ kawpa ta eina vaw chho. Buakha a y nah ta, khichhaipa ta a chaoleimachoh cha la heih ta, ei uhta ta a paro kawpa ta, “Laiu, moh teh, moh teh, nâma eih chhao a la haw hu” tahpa ta a paro kawpa ta eina vaw chho heih. “He khichhaipa he duama a pangia-palina châh rai pahno leipa ta, awhsa nie khai a chhuah thlah haw” a vaw tah heih. Cha nah ta, khichhaipa ta, “A zydua ta ei nie khai ha aw” a vaw tah. Bierei pyu cha ei nô ta laikah lâ tawhta za thei ta, zâ râ ta, ei uhta nata kei cha laikah lâ a pazaw ta maniah a kaw pazaw. Kha daihti liata cha Marapasawzy ta khichhaipa palôh eima pasasa tlamaw aw, tahpa ama za chi ngâsâ thlah ha.

ATLYNA, ATLYNA

(He châpaw he Deiva Mara Daily liata papua hawpa a châ)

Eima râh liata atlyna a vaw hluh kaw – VC atlyna, MDC atlyna, MLA tlyna, MP atlyna, MTP atlyna, MSO atlyna, MChP atlyna, MJA atlyna, party atlyna, awnanopa (Local, Bia, Presbytery, Assembly, KTP, KNP, KPP, KHP) atlyna. He atlynazy he baukhei kaw sai pi ta, MDC nata MLA atlynazy he eima buakhei chaipazy ama châ, tah sih la rei chhei thlyu aw mapi. MDC nata MLA atlynazy vâta su thokha liata sanawh chhôhkha, viasa rihchâh nata khih kha râh kha zy bie a chho thei khao leipa ta maniah a pa-ysa haw. A pei kaw. A tlia tawhna kha ta ECM nôpawpazy (executive secretary-zy) atlyna chhao eima buakhei pathao hrapa a lyu kaw. He he ta, democracy nata awnanopa kyh liata pitloh awpa hawhta eima pitloh mâh leina khazie rakha ama a palâsa.

MARAPASAWZY CHARIAH LAIPAZY: PAÔPAZYPA, PARITHEIPA, RAIHRIA A CHHUAH LEINA

(He article he Deiva Mara Daily liata papua hawpa a châ)

Paôpazypa nata paritheipa zy ta Marapasaw hluhpi chhâ chhao a palo hmâ leipa ta maniah a thie ngâ hai. He vâna heta hawti hluhpi hara ei ta, nôhmei pawhmei khi leipazy nôhmei ei ta ama pawhmei lymâ. Raihria hoh leina vâta Marapasaw hluhpi kudaopa lâta eimâ lie ngâ kaw. A hra â daih hmeihseih haw. Chata leipa ta la eima leidia tlamaw aw.

Paôpazypa nata paritheipa chariah

Paôpazypa (karao, châhnamei, sâdâ, khainie, kuvâ nata paôpazypa hropa zydua) nata paritheipa (sahma, thohna, etc) zy he hrao leipa liata sôh pahryuh thlâhthlina a châ tho ta, chyhsapa hnatlâna châta a pha lei ngaitapa hmozy ama châ. Paôpazypa nata paritheipazy he ta hri pha leipazy tlôkhei thei ei ta, a eih pachaipa ta hri chi chhih ngaitapa cancer hri ama tlôkhei thei. He vâna heta khizaw râh hluhpi liata cha paôpazypa ataopa hmô awpa ama sôh kaw bâ. Sahma a paripa nata thohna a taopazy chhao hmô awpa y tu khao veih ei. India râh liata Mizoram he pa-ôpazypa nata paritheipa a tao hluh chaipa state sâkha châ hra pi ta, Mizoram chhôh liata Maraland he paôpazypa nata paritheipa a taopa ret â sâh chaina eima châ heih thei. He vâna heta a châ aw – eima râh liata cancer aveipa hetlupo ta eima hluhna chhâpa he.

MARALAND LIATA RI EIMA KIA DÂH He …

(He châpaw he Deiva Mara Daily liata papua hawpa a châ)

Marapasaw chyhsa phapa eima châzie nata keimo nahta keimo â pasô kawpa eima châzie niedo eimâ phahlana daihti zy, rairuna kheihhawhpa ma eimâ tyh daihti zy, tlâh lei ziah lei daihti zy nata thina mâchhiesa daihti zy liata â lâ tyh. A baokhâ pi ta, a deichhypa ta thlah eimâ palôh tyh. Ryhpaoh leina daihti liata cha kyhchhina lâ (pha noh lâ) a luah leipa ta eima y thei. Tlâh lei ziah lei daihti nata thina mâchhiesana lâ (chhie noh lâ) deikua eima lalao kawpa nata ryhpaoh lei kawna daihtizy liata chhao ta eima rai nata hmotao ngâpazy siesai chypa ta a luah lyhlia eimâ chhuah tyh. Aly’pa a châ kaw. He hrozie phapa he chhy lymâ ei suh u!

Krizyna nata Vyuhpa ta Sawhkhâ Rai Pahriasapa

(He châpaw he Deiva Mara Daily liata papua hawpa a châ) 

Mara reih ta “sawhkhâ rai” eima tahpa heta thla hlao hneipa ta raihriapa a chakhisa khai. Chahawhpa rai cha Mara râh liata hluh leipa ta, sawhkhâ he chahawhpa rai a pie hluh chaipa a châpa vâta hlao hneipa zydua “sawhkhâ rai” eima tah thlah hapa he châ sa la pangiasa â chhih. Pastorzy taih ta hlao ama hnei hrapa vâta “sawhkhâ rai” ahriapa py liata pahlaopa ama châ tyh hra. He article ta â chhuah chaipa deikua cha sawhkhâ hmeihseihpa (government) rai ahriapazy kyh a châ aw.

Sawhkhâ rai hria awpa ta a rai ta â hnawpa nata a rai nahta â phuhpa thaina (qualification) nata hrozie (character) zy hnei awpa â ngiah. Rai thokha liata cha, amâ ngia tua nota chahawhpa qualification nata hrozie-zy ama hnei leipa chhao ta, ama hria chhôh ta sawhkhâ ta training peimawhpazy a pasiesa thei hra ei. Thokha heih ta, ama hria pâna chôta amâ chu thei hra. Hehawhpa he Mongyuh reih ta, “experience is the best teacher” tah ei ta, a yzie cha eima hrotyhpa, keimo cheingei hria pâna chôta eimâ chupa he pachutuh pha chaipa a châ, tahna a châ. He he ta maniah a chhopa cha, thaina (qualification) nata a hrozie (character) a tloh leipazy nata, amâ thao nota a tloh leipa chhao ta kaw tloh laih awpa a chhuah hlei leipazy cha sawhkhâ rai liata ama ngia awpa châ vei. Thaina (qualification) a tloh leipazy nata hrozie (character) a pha leipazy ta sawhkhâ rai ama hria khiahta cha râh hmahsie leina châ aw ta, râhsawzy (citizens) châta rairuna hluhpi a tlôkhei aw. Hehawhpa pachutuhpazy ta ama pchupa sikuhawtizy châta chhochhi cha hawtizy hmialâ daihti awpa pachâpa ta hupo â chhih kaw.